Wazshı 2 bob
1 Men o'zime: «Qa'ne, endi ra'ha'tlenip, kewil-xoshlıq etip ko'reyin», – dedim. Biraq ol da biyhuda eken.
2 Men ku'lki haqqında: «Aqılsızlıq», – dedim, al kewil-xoshlıq haqqında: «Ne keregi bar?» – dedim.
3 Danalıg'ım basshılıg'ında denemdi sharap penen sınap ko'riw ushın aqmaqlıqqa beriliwdi sheshtim. Usılayınsha, adamlar aspan astındag'ı qısqa o'mirinde nelerdi islese paydalı bolatug'ının bilmekshi boldım.
4 Men ullı isler isledim: o'zime u'yler qurdım, ju'zim bag'ların o'sirdim,
5 bag'lar ha'm sulıw tog'aylar jarattım, ol jerlerge tu'rli miywe ag'ashların otırg'ızdım,
6 Ag'ashlardı suwg'arıw ushın hawızlar qurdım,
7 qul ha'm shorılar satıp aldım, u'yimde tuwılg'an qul ha'm shorılarım da bar edi, iri ha'm mayda mallarım da sonshelli ko'p edi. Mennen aldın Erusalimde jasag'anlardın' hesh birinde bunshelli ko'p mal bolmag'an.
8 O'zime gu'mis ha'm altın jıynadım, patshalardan ha'm wa'layatlardan g'a'ziyne topladım, hayal ha'm erkek qosıqshılarg'a iye boldım, erkekke unaytug'ın sulıw toqallardı alıp kewlimdi xoshladım.
9 Solay etip, men ullılıqqa erisip, o'zimnen aldın Erusalimde jasag'anlardın' ha'mmesinen asıp tu'stim. Danalıg'ım da meni ta'rk etpedi.
10 Ko'zim tu'sip, unatqannın' hesh qaysısınan bas tartpadım. Kewlim ku'segen na'rsege shek qoymadım. Qılg'an ha'r bir isimnen kewlim xosh boldı. Pu'tkil miynetime berilgen pay usı boldı.
11 Biraq o'z qollarım menen islegen islerime, Qılg'an ha'mme miynetlerime qarasam, Bulardın' ha'mmesi biyhuda, samaldın' izinen quwg'anday na'rse ekenin, Quyash astında hesh qanday paydalı na'rse joq ekenin ko'rdim.
12 Sonnan keyin, ja'ne danalıq, aqılsızlıq ha'm aqmaqlıqtın' ne ekenin ko'rmekshi boldım. Patsha miyrasxorı a'lle qashan islengen islerden basqa neler isley alar edi?
13 aqtılıqtın' qaran'g'ılıqtan jaqsıraq bolg'anı sıyaqlı, Danalıqtın' da aqılsızlıqtan jaqsıraq ekenin ko'rdim.
14 Dana ju'rer jolın biler, Al aqılsız qaran'g'ılıqta ju'rer.Biraq men ekewinin' de o'mirinin' aqıbetinin' birdey ekenin tu'sindim.
15 Sonda men ishimnen bılay dedim: «Aqılsızdın' basına ne tu'sse, menin' basıma da sol tu'sedi. Onda ju'da' aqıllı bolıwdın' ne keregi bar?» Ja'ne o'zime o'zim: «Bul da biyhuda», – dedim.
16 Aqılsız da, dana da, Uzaq este saqlanbaydı, Ekewi de tez arada umıtıladı. Dana da aqılsız benen birdey o'lim ko'rmey me?
17 Usılayınsha men o'mirdi jek ko'rdim. Sebebi quyash astında islengen ha'r bir is mag'an ju'da' qayg'ılı ko'rindi. Ha'mmesi biyhuda, samaldın' izinen quwg'anday na'rse eken.
18 Men quyash astında islegen pu'tkil miynetimdi jek ko'rdim. Sebebi olardı o'zimnen keyingi adamg'a qaldırıwım kerek edi.
19 Ol dana bola ma, aqılsız bola ma, kim biledi? Biraq ol menin' quyash astında miynet etip, aqıl menen eriskenlerimnin' ha'mmesine iyelik qıladı. Bul da biyhuda.
20 Sonlıqtan men quyash astında islegen barlıq miynetlerime ashına basladım.
21 Adam danalıg'ı, bilimi ha'm uqıbı menen miynet etedi, keyin bulardın' ha'mmesi, tap onın' payı sıyaqlı bularg'a hesh miyneti sin'begen adamg'a qalıwı kerek boladı. Bul da biyhuda, bul – ullı azap!
22 Quyash astında islegen miynetinen ha'm urınıwlarınan adam nege erisedi?
23 Onın' barlıq ku'nleri da'rtke, jumısları qayg'ıg'a tolı, ha'tte, ju'regi tu'nde de tınıshlanbaydı. Bul da biyhuda.
24 Adam ushın iship-jewden, islegen miynetinen ra'ha'tleniwden artıq na'rse joq eken. Bulardın' da Qudaydan berilgenine ko'zim jetti.
25 Aqırı, Ol bermese, kim jey aladı, kim ra'ha'tlene aladı?
26 O'zine ılayıqlı bolg'anlarg'a Quday danalıq, bilim ha'm quwanısh beredi. Al gu'nakarlarg'a bolsa, baylıq arttırıp jıynaw isin tapsıradı. Son'ınan O'zine ılayıqlı bolg'an adamlarg'a onın' jemisin beredi. Bul da aqılg'a sıymaydı, bul da samaldın' izinen quwg'anday na'rse.
