Wazshı 4 bob
1 Men quyash astında bolıp atırg'an eziwshiliklerdi ko'rdim: Ja'birlengenlerdin' ko'z jasların ko'rdim, Olardı jubatıwshı joq edi. Ku'sh eziwshiler ta'repinde edi. Al ezilgenlerge ta'selle beriwshi de joq.
2 Sonda men o'lip ketken marhumlardın' jag'dayının', Tirilerdin' jag'dayınan jaqsıraq ekenin tu'sindim.
3 Biraq ele tuwılmag'anlar, Bular ekewinen de baxıtlıraq. Olar quyash astında islenip atırg'an jawız islerdi ko'rmedi.
4 Men ja'ne adamnın' pu'tkil miyneti ha'm istegi jetiskenligi adamlar arasında qızg'anısh tuwdıratug'ının ko'rdim. Bul da biyhuda, bul da samaldın' izinen quwg'ang'a uqsaydı.
5 Aqılsız qolların qawsırıp alıp, o'zinin' etin o'zi jeydi.
6 Tınıshlıq penen alıng'an bir uwıs zat, Samaldın' izinen quwıp, awır miynet etip tapqan bir qosıwıs zattan jaqsıraq.
7 Men quyash astında ja'ne bir biyhudalıqtı ko'rdim:
8 Bir jalg'ız baslı adam bar edi. Onın' perzenti de, tuwısqanı da joq edi. Ol tınım tappay miynet eter, Ko'zleri de baylıqqa toymas edi. Ol o'zinen: «Men kim ushın miynet etip, O'zimdi ra'ha'tleniwden mahrum etip atırman?» – dep soramaydı. Bul da biyhuda, awır bir da'rt.
9 Birewden ekew jaqsı, Olar miynetine jaqsı sıy aladı.
10 Eger birewi qulasa, ekinshisi turg'ızadı. Al eger jalg'ız adam qulasa, Onı turg'ızatug'ın adam bolmaydı.
11 Eki adam birge jatsa, jıllı jatadı. Al jalg'ız jatqan adam qalay jılınadı?
12 Eger birew jalg'ız bolsa, jen'iler, Ekew bolsa, qarsı tura alar. U'sh jipten esilgen arqan teginlikte u'zilmes.
13 Berilgen ken'eske qulaq aspaytug'ın aqılsız g'arrı patshadan, jarlı, biraq aqıllı jigit jaqsıraq.
14 Sonday jigit patshalıqta jarlı bolıp tuwılıp, qamaqxanada otırg'an bolsa da, ol qamaqxanadan shıg'ıp, patsha bolıp ko'teriliwi mu'mkin.
15 Men quyash astında jasap atırg'an ha'r bir adamnın' patshanın' ornına otırg'an sonday jigittin' izine ergenin ko'rdim.
16 Onın' izine ergen xalıq esap-sansız bolsa da, keyingi urpaqlardın' og'an kewli tolmaydı. Awa, bul da biyhuda, bul da samaldın' izinen quwg'ang'a uqsaydı.
17 Qudaydın' U'yine barg'anda, qa'demin'di oylap bas! Ol jerge islegen jamanlıg'ının' parqına barmaytug'ın aqılsızlar sıyaqlı tek qurbanlıq beriw ushın barg'annan go're, tın'law ushın barg'an jaqsıraq.
