Wazshı 6 bob
1 Men quyash astında adamlar arasında bolıp turatug'ın, awır bir apattı ko'rdim:
2 Quday adamg'a baylıq, mal-mu'lik, ataq-abıray beredi. Ol kewli ku'segeninin' ha'mmesine iye boladı. Biraq Quday og'an sonın' qızıg'ın ko'riwge imkaniyat bermeydi ha'm bulardın' barlıg'ı basqag'a buyıradı. Bul da biyhuda, bul – qayg'ılı bir da'rt.
3 Eger bir adamnın' ju'z balası bolsa ha'm ol uzaq o'mir su'rse, biraq ol o'mirdin' ra'ha'tin ko'rmese ha'm o'ligin ko'mgendey adam bolmasa, onda men o'li tuwılg'an bala onnan baxıtlıraq der edim.
4 'li tuwılg'an bala biykarg'a du'nyag'a kelip, qaran'g'ılıq ishinde du'nyadan o'tedi, atı da qaran'g'ılıqqa ko'miledi.
5 Ol, ha'tte, quyashtı ko'rgen de, bilgen de joq. Biraq o'li tuwılg'an balanın' jag'dayı sol adamnın' jag'dayınan jaqsıraq.
6 Sol adam, ha'tte, mın' jıldan eki ret o'mir su'rse de, ra'ha't ko'rmeydi. Ba'ri bir ha'mme de bir jerge barmay ma?
7 Adamnın' barlıq miyneti qarındı toydırıw ushın, Biraq ashko'zlikten kewil toymaydı.
8 Dananın' aqılsızdan qanday artıqmashlıg'ı bar? Jarlıg'a o'mirde o'zin qalay tutıwdı bilgeninen ne payda?
9 O'zin'de joqtı ku'segennen, barg'a qanaat etken jaqsıraq. Ol da biyhuda, ol da samaldın' izinen quwg'anday na'rse.
10 Bar na'rsenin' ha'mmesine a'lle qashan at qoyılg'an. Adamnın' da ta'g'diri belgili. Hesh kim o'zinen ku'shli bolg'an menen qasarısa almaydı.
11 So'z ko'p bolsa, biyhudalıq ko'beyer. Bunnan adamg'a ne payda?
12 Saya sıyaqlı o'tip ketetug'ın o'mirinin' ma'nissiz ku'nlerinde adam ushın nenin' jaqsı ekenin kim biledi? O'zinen keyin quyash astında ne bolatug'ının adamg'a kim ayta aladı?
