Qosıqlar qosıg'ı 2 bob
1 Men Sharon nargizimen, Oypatlıqlar lalasıman.
2 Qızlar arasında menin' su'yiklim, Tikenler arasındag'ı lalag'a megzer.
3 Jigitler arasında menin' su'yiklim, Tog'ay ag'ashları arasındag'ı alma ag'ashına megzer. Sayasında otırıw mag'an ra'ha't bag'ıshlar, Miywesinin' da'mi awzımnan ketpes.
4 Ol meni zıyapat u'yine alıp keldi, Meni muhabbatı menen qapladı.
5 Kishmishler menen meni ku'shke toltır, Almalar menen janlandır. Sebebi ıshqı da'rtinde janbaqtaman.
6 Onın' shep qolı basım astında, On' qolı menen meni aymalaydı.
7 Erusalim qızları! Jeyran ha'm jabayı suwınlar haqı jalbarınaman: Muhabbattın' o'zi oyanbag'ansha, Ishqını oyatpan' ha'm qozg'aman'.
8 Mınaw su'yiklimnin' dawısı! Ol tawlardan sekirip, To'beshiklerden atlap kiyatır.
9 Su'yiklim jeyrang'a yamasa jas suwıng'a megzer. Mine, ol diywalımız artında turıp, Terezelerden u'n'ilip, A'ynektin' ko'zlerinen sıg'alar.
10 Su'yiklim mag'an bılay dedi: «Tur, su'yiklim, go'zzalım, Ju'r, birge keteyik!
11 Qara, qıs ta o'tti, Jawın da tındı.
12 Jerde gu'ller ashılıp, Qosıq aytatug'ın waqıt keldi. U'lkemizde qumırının', Hawazı esitilip tur.
13 A'njir g'oza shıg'ardı. Ju'zim shaqaları gu'llep, Xosh iyisin shashıp tur. Tur, su'yiklim, go'zzalım, Ju'r, birge keteyik!»
14 Jartastın' jarıg'ına, Tawlardın' shın'larına jasırıng'an qumırım! Jamalın'dı ko'rset, dawısın'dı esiteyin. Dawısın' jag'ımlı, jamalın' go'zzal.
15 Bizge tu'lkilerdi, Ju'zimzarlardı wayran etip atırg'an, Tu'lkisheklerdi uslap berin'. Ju'zim bag'larımız gu'l ashpaqta.
16 Su'yiklim meniki, men de onıkimen. Ol lalalar arasında sayranlap ju'rer.
17 Kesh tu'sip, ko'len'ke uzayg'ansha, Qaytıp kel, su'yiklim, Sa'nli tawlardag'ı jeyranday, Yamasa jas suwınday shapqıla!
