Qosıqlar qosıg'ı 3 bob
1 Tu'n boyı to'segimde jatıp, Qa'lbimnin' ashıg'ın an'sadım, An'sadım, biraq onı taba almadım.
2 Endi turıp, qalanı aylanayın, Ko'she ha'm maydanlar boylap, Qa'lbimnin' ashıg'ın izleyin. Onı izledim, biraq taba almadım.
3 Qalanı aylanıp ju'rgen saqshılar, Meni ko'rip qaldı. Olardan men: «Menin' qa'lbimnin' ashıg'ın ko'rmedin'iz be?» – dep soradım.
4 Olardın' janınan ketiwim menen, Qa'lbimnin' ashıg'ın taptım. Onı qoltıqlap uslap, Anamnın' u'yine, Mag'an ha'miledar bolg'an bo'lmege, Alıp kelgenimshe, jibermedim.
5 Erusalim qızları! Jeyran ha'm jabayı suwınlar haqı jalbarınaman: Muhabbattın' o'zi oyanbag'ansha, Ishqını oyatpan' ha'm qozg'aman'.
6 Sawdagerlerdin' barlıq xosh iyisli a'tirlerinen islengen, Mirra ha'm xosh iyisli tu'tetkini an'qıtıp, Buwdaqlag'an tu'tindey ko'terilip, Sho'lden shıg'ıp kiyatırg'an kim eken?
7 Qaran'lar, Sulaymannın' tasımalı taxtı! Qasında alpıs batırı, İzraildın' ma'rt jawıngerleri bar.
8 Ha'mmesi qılısh asıng'an, Urıs ta'jiriybesine iye. Tu'ngi qa'wipke qarsı, Ha'r birinin' qılıshı belinde.
9 Patsha Sulayman Lebanondag'ı kedr ag'ashınan, O'zine tasımalı taxt isletken.
10 Onın' baqanların gu'misten, Arqasın altınnan isletip, Otırg'ıshın shım qızıl tawar menen qaplatqan. İshin Erusalim qızları shın kewilden bezegen.
11 Sion qızları, sırtqa shıg'ın'lar! Toyı ku'ni, Ju'regi shadlıqqa tolg'an ku'ni, Anası basına kiydirgen, Tajına qaran'lar!
