Qosıqlar qosıg'ı 4 bob
1 Qanday go'zzalsan', su'yiklim, go'zzalsan'! Ju'zin'degi perde astındag'ı ko'zlerin', Qumırının' ko'zlerine megzeydi. Shashların' Gilad tawlarınan tu'sip kiyatırg'an, Qara eshkiler su'riwindey tawlanıp turadı.
2 Qırqıp, shomıldırıp shıg'arılg'an, Qoy su'riwindey appaq senin' tislerin'. Ha'r birinin' sın'arı bar, Hesh biri jalg'ız emes.
3 Qırmızı sabaqtay erinlerin', Awzın' sonday a'jayıp. Japqısh astındag'ı ju'zin'nin' alması, Anardın' yarımınday qıp-qızıl.
4 Moynın' tik qurılg'an, Dawıttın' minarasına megzeydi, Og'an mın' qalqan asılg'an, Ha'mmesi batırlar qalqanı.
5 Lalazarda otlap ju'rgen qos suwıng'a, Egiz jeyrang'a uqsaydı qos anarın'.
6 Kesh tu'sip, ko'len'ke uzayg'ansha, Mirra tawına, Xosh iyisli shayırlar bar to'bege baraman.
7 Su'yiklim, sen sonday go'zzalsan', Hesh jerin'de minin' joq!
8 Lebanonnan menin' menen birge kel, kelinshegim, Lebanonnan menin' menen birge kel! Amana to'besinen, Senir, yag'nıy Xermon to'besinen, Arıslanlar inlerinen, Qaplanlar ma'kanlag'an tawlardan asıp kel.
9 A'zizim, kelinshegim, ju'regimdi biylep aldın', Janarın'nın' bir qarawı, Monshag'ın'nın' bir danası menen, Ju'regimdi biylep aldın'.
10 Muhabbatın' qanday tatlı, a'zizim, kelinshegim! Muhabbatın' sharaptan, A'tirin'nin' xosh iyisi, Barlıq xosh iyisli zatlardan la'zzetli!
11 La'blerin'nen pal tamadı, kelinshegim, Pal menen su't bar tilin' astında. Kiyimlerin'nin' jag'ımlı iyisi, Lebanonnın' xosh iyisindey.
12 A'zizim, kelinshegim, sen bir qapısı jabıq bag', Awzı jabıq qudıq, mo'r basılg'an bulaqsan'.
13 Sen – jaqsı miywe beretug'ın, Anar bag'ısan'. Bul bag'da qına ha'm nard bar.
14 Awa, bul bag'da nard ha'm shafran, Xosh iyisli qamıs ha'm koritsa, Ha'r tu'rli xosh iyisli terekler, Mirra ha'm aloe, A'lwan tu'rli, en' jaqsı xosh iyisli o'simlikler o'sedi.
15 Sen bag' bulag'ısan', Taza suw qudıg'ı, Lebanon tawlarının' ag'ar suwısan'.
16 Oyan, ha'y, arqa samalı! Kel, qubla samalı! Bag'ımda esip, onın' xosh iyisin tarat! Su'yiklim o'z bag'ına kelip, Onın' saylandı miywelerinen jesin.
