Qosıqlar qosıg'ı 5 bob
1 Men bag'ıma kirdim, a'zizim, kelinshegim. Mirra ha'm xosh iyisli zatlarımdı jıynayman. Palımdı uyası menen jeymen, Sharabımdı, su'timdi ishemen.Jen'ler, doslar, ishin'ler! İship, la'zzet alın', ha'y, ashıqlar!
2 Uyıqlap jatsam da, kewlim sergek. Tın'lap ko'r! Su'yiklim esik qag'ıp tur: «Esikti ash, a'zizim, su'yiklim, Qumırım, minsiz sulıwım! Ho'l bolg'an basım shıqtan, Shashlarım tu'ngi ızg'ardan».
3 Men sheshinip qoydım, Qalay ja'ne kiyinemen? Ayaqlarımdı juwıp qoydım, Qalay ja'ne patas qılaman?
4 Su'yiklim esik tesiginen qolın suqqanda, Ju'regim tolqınlanıp ketti.
5 Turdım su'yiklime qapı ashpag'a, Qollarımnan mirra tamdı, Barmaqlarımnan aqtı mirra, Esiktin' ildirgishine.
6 Su'yiklime esik ashtım, Biraq ol ketip qalg'an eken. Onın' ketip qalg'anına, ju'regim ezildi. Onı izledim, taba almadım, Shaqırdım, juwap bermedi.
7 Qalanı aylanıp ju'rgen saqshılar, Meni uslap alıp, urıp, jaraqatladı, Sol diywal saqshıları, Menin' jawlıg'ımdı sheship tasladı.
8 Erusalim qızları! Sizlerge jalbarınaman: Eger su'yiklimdi ushıratsan'ız, Aytın'lar, ıshqıdan qa'stemen men.
9 Su'yiklin'nin' basqalardan nesi artıq, Ha'y, go'zzallar go'zzalı? Bizlerge jalbarınatug'ınday, Su'yiklin'nin' basqalardan nesi artıq?
10 Su'yiklim menin' qızıl ju'zli, quwatlı, On mın' adamnın' arasında ayırılıp turar.
11 Bası sap altınnan, Shashları buyra, G'arg'aday qara.
12 Ko'zin'nin' qarashıqları suw jag'asında, Su'tke shomılıp, la'zzetlenip otırg'an, Qos qumırıg'a uqsaydı.
13 Shekeleri a'tir taratıp turg'an, Gu'l bag'ına uqsaydı. Erinleri mirra tamıp turg'an, Lala gu'lge uqsaydı.
14 Qolları sarı yaqıt tag'ılg'an, Altın hasag'a uqsaydı. Denesi lazurit tasları menen qaplang'an, Pil su'yeginen islengen buyımg'a uqsaydı.
15 Ayaqları altın tu'bekke ornatılg'an, Mramor su'tinge uqsaydı. Tu'r-tu'si Lebanon tawlarına uqsaydı, Kedr ag'ashlarınday sawlatlı.
16 Tili shiyrin, Qa'ddi-qa'wmeti kelisken. Usı menin' su'yiklim, usı menin' dostım, Ha'y, Erusalim qızları!
