Qosıqlar qosıg'ı 6 bob
1 Su'yiklin' qayda ketti, Ha'y, go'zzallar go'zzalı? Ol qay ta'repke ketti? Onı senin' menen birge izleyik.
2 Su'yiklim o'z bag'ına, Jupar iyisli gu'l bag'ına, Bag'da su'riwin bag'ıwg'a, Lala gu'ller teriwge ketti.
3 Men su'yiklimdiki, su'yiklim meniki. Su'riwin lala gu'ller arasında bag'adı ol.
4 Su'yiklim, sen Tirsa qalasınday go'zzalsan', Erusalimdey su'ykimlisen', Bayraq ko'tergen la'shkerlerdey aybatlısan'.
5 Ko'zlerin'di alıp qash mennen, Olar meni bende qılmaqta. Shashların' Gilad tawlarınan tu'sip kiyatırg'an, Qara eshkiler su'riwine uqsaydı.
6 Qırqıp, shomıldırıp shıg'arılg'an, Qoy su'riwindey appaq senin' tislerin'. Ha'r birinin' sın'arı bar, Hesh biri jalg'ız emes.
7 Japqısh astındag'ı ju'zin'nin' alması, Anardın' yarımınday qıp-qızıl.
8 Patshanın' alpıs hayalı, seksen toqalı, Sansız jas qızları bar.
9 Biraq menin' qumırım, minsiz sulıwım – ten'siz. Ol anasının' da ten'sizi, Onı tuwg'annın' erkesi. Qızlar onı ko'rip, baxıtlı deydi, Hayallar ha'm toqallar onı maqtaydı.
10 Tan'day atqan, Ayday sulıw, ku'ndey jarqırag'an, Bayraq ko'tergen la'shkerlerdey aybatlı, Kim eken bul?
11 Oypatlıqtag'ı ko'klemzardı ko'riw ushın, Ha'm de ju'zim putaları bu'rtik jardı ma, Anar ag'ashları gu'lledi me dep, Usılardı ko'riw ushın, men g'oza tog'ayına bardım.
12 Bilmedim, qa'lbim meni biylep alıp, Xalqımnın' aqsu'yeklerinin' arbasına mindirdi.
