Qosıqlar qosıg'ı 8 bob
1 Qa'nekey, tuwısqanımday bolsan' edi, Anamnın' emshegin birge emgen! Ko'shede ko'rgenimde, su'yer edim, Hesh kim meni ayıplamas edi.
2 Aldın'a tu'sip, Turmısqa tayarlag'an, Anamnın' u'yine alıp keler edim. Xosh iyisli sharaptan, Anarlarımnın' suwınan ishkizer edim sag'an.
3 Senin' shep qolın' basım astında, On' qolın' menen meni aymalaydı.
4 Erusalim qızları, sizlerge jalbarınaman: Muhabbattın' o'zi oyanbag'ansha, Ishqını oyatpan' ha'm qozg'aman'.
5 Su'yiklisine su'yenip, Sho'lden shıg'ıp kiyatırg'an kim eken?Alma ag'ashının' astında, Anan' sag'an ha'miledar bolg'an jerde, Ol tolg'atıp, seni tuwg'an jerde, Men seni oyatıp aldım.
6 Sal meni ju'regin'e mo'rdey qılıp, Qolın'a mo'rli ju'ziktey qılıp. O'ytkeni muhabbat o'limdey qu'diretli, Qumarlıq a'zeldey ku'shli. Ishqının' otı otlı jalınday janar, Lawlap jang'an jalın kibi.
7 Suwlar da muhabbattı o'shire almas, Da'ryalar da onı ag'ızıp kete almas. Eger adam muhabbat ushın barı-jog'ın berse de, Ol jek ko'rinshi bolıp, mazaq qılınar edi.
8 Bizlerdin' kishkene qarındasımız bar, Onın' ele ko'kiregi de shıqpag'an. Onı ayttırıp kelgen ku'ni, Qarındasımız ushın ne qıla alamız?
9 Eger ol diywal bolsa, U'stine gu'mis minara qurar edik, Eger ol qapı bolsa, Onı kedr taxtalar menen jawıp taslar edik.
10 Men o'zim diywalman, Qos anarım minara mısalı, Sol sebepli onın' ko'zine, Baxıtlı ko'rindim.
11 Sulaymannın' Baal-Hamonda, Ju'zim bag'ı bar eken, Ol bag'dı saqshılarg'a tapsırıptı. Ha'r biri onın' jemisi ushın, Mın' shekel gu'mis to'lewi kerek eken.
12 Mın' gu'mis ten'ge seniki bolsın, ha'y, Sulayman, Eki ju'zi jemisin qorıg'andiki bolsın. Al menin' ju'zimzarım o'zimdiki, o'zime tiyisli.
13 Ha'y, bag'larg'a ma'kan basqan! Joldaslarım dawısın'dı esitip tur, Dawısın'dı tek men esitetug'ın bolayın.
14 Asıq su'yiklim! Jupar iyisi an'qıg'an tawlardag'ı, Jeyranday yamasa jas suwınday shapqıla.
