İyshaya 14 bob

İordannın' batısındag'ı jerlerdin' bo'listiriliwi (1-5),Xebronnın' Kalebke beriliwi (6-15),

¹ İzraillılardın' Kenaanda mu'lik etip alg'an jerlerine kelsek, bul jerler ruwxaniy Elazar, Nun ulı Eshua ha'm İzrail urıwlarının' tiyre basshıları ta'repinen izraillılarg'a bo'lip berildi.

² Jaratqan İyenin' Muwsa arqalı buyırg'anınday, u'lesler tog'ız urıw menen bir urıwdın' yarımına shek taslaw jolı menen bo'listirildi.

³ Sebebi Muwsa qalg'an eki urıw menen bir urıwdın' yarımının' u'lesin İordan da'ryasının' shıg'ıs ta'repinde bergen edi. Biraq olar menen birge lebiylilerge mu'likten u'les berilmegen edi.

⁴ Yusuptin' ullarınan Menashshe ha'm Efrayım degen eki urıw kelip shıqtı. Sonlıqtan lebiylilerge jerden u'les berilmey, tek jasaw ushın qalalar ha'm mal-mu'likleri ushın sol qalalar a'tirapındag'ı jaylawlar g'ana berildi.

⁵ Solay etip, izraillılar Jaratqan İyenin' Muwsag'a buyırg'anı boyınsha is tutıp, jerlerdi bo'lisip aldı.

⁶ Bir ku'ni Yahuda urıwınan bolg'an adamlar Gilgalda bolıp atırg'an Eshuag'a keldi. Sonda Keniz tiyresinen bolg'an Efunne ulı Kaleb Eshuag'a bılay dedi: – Jaratqan İyenin' Qadesh-Barniyada Qudaydın' adamı bolg'an Muwsag'a sen ha'm men tuwralı nelerdi aytqanınan o'zin'nin' xabarın' bar.

⁷ Jaratqan İyenin' qulı Muwsa eldi ko'zden o'tkizip keliw ushın meni Qadesh-Barniyadan jibergeninde, men qırıq jasta edim. Men ko'rgenlerimdi haq kewlim menen jetkizip keldim.

⁸ Degen menen, menin' menen birge barg'an tuwısqanlarım xalıqtın' ju'regine qorqınısh saldı. Biraq men Qudayım Jaratqan İyege tolıq boysındım.

⁹ Sonlıqtan Muwsa sol ku'ni: «Sen Qudayım Jaratqan İyege tolıq boysıng'anın' ushın, ayag'ın' tiygen jerler sag'an ha'm senin' urpaqların'a ma'n'gige mu'lik etip beriledi», – dep ant ishken edi.

¹⁰ Sol waqıtta izraillılar sho'lde ju'rgen edi. Jaratqan İyenin' Muwsag'a bul so'zlerdi aytqanına qırıq bes jıl boldı. Minekey, Jaratqan İye O'z so'zinin' u'stinen shıg'ıp, mag'an o'mir berdi. Ha'zir men seksen bes jastaman.

¹¹ Muwsa meni jibergen ku'nde qanday ku'shli bolg'an bolsam, bu'gin de sondayman. Sol waqıttag'ıday, urısqa shıg'ıwg'a ele de ku'shim jetedi.

¹² Endi Jaratqan İyenin' sol ku'ni aytqanınday, bul tawlı eldi mag'an ber. Ol jerde anaq xalqının' jasaytug'ının, olardın' u'lken ha'm bekkem etip qorg'alg'an qalalarının' barlıg'ın sol ku'ni o'zin' de esitken edin'. Mu'mkin, Jaratqan İye mag'an ja'rdem eter ha'm men Onın' aytqanınday, olardı sol jerden quwıp shıg'ararman.

¹³ Sonda Eshua Efunne ulı Kalebke aq pa'tiyasın berdi ha'm Xebrondı og'an mu'lik qılıp berdi.

¹⁴ Solay etip, Xebron Keniz tiyresinen bolg'an Efunne ulı Kalebtin' mu'lki boldı ha'm bu'gingi ku'nge deyin bul jer og'an tiyisli. O'ytkeni ol İzraildın' Qudayı Jaratqan İyege tolıq boysıng'an edi.

¹⁵ Xebronnın' eski atı Kiryat-Arba bolıp, Arba – anaqlardın' en' ullı adamı edi. Solay etip, urıs toqtap, el tınıshlıqqa eristi.