İyshaya 28 bob
1 Efrayım ma'sku'nemlerinin' maqtang'an tajı, ha'siret shegesen'! O'nimdar oypatlıqtın' en' jaqsı jerindegi sharapqa toyg'anlardın' qalası, Biraq onın' saltanatlı go'zzallıg'ı, solıp atırg'an gu'lge megzeydi.
2 Mine, İyenin' qu'diretli ha'm ku'shli adamı bar, Ol burshaqlı dawılday, qıyratıwshı quyınday, Zuwlag'an topan suwı kibi, O'z qolı menen qalanı jerge qulatadı.
3 Efrayım ma'sku'nemlerinin' maqtanıshı bolg'an tajı, Ayaq astında qaladı.
4 O'nimdar oypatlıqtın' en' jaqsı jerde jaylasqan, Saltanatlı go'zzallıg'ı solıp baratırg'an gu'l, Erte pisken a'njir kibi boladı. Onı ko'rgen, da'rriw u'zip alıp, jep qoyadı.
5 Sol ku'ni A'lemnin' Jaratqan İyesi xalqınan aman qalg'anlar ushın saltanat tajı, go'zzallıq shen'beri boladı.
6 Ol hu'kim gu'rsisinde otırg'anlar ushın a'dalatlıq ruwxı, da'rwazanı dushpannan qorg'ag'anlar ushın ma'det boladı.
7 Mınalar da sharap iship tentireklep, o'tkir ishimlik iship ten'selip ju'redi: ruwxaniyler ha'm payg'ambarlar o'tkir ishimlik iship tentireklep, sharap iship esten ayırıldı. Olar o'tkir ishimlikten ten'selip, ayan ko'rgende shatastıradı, sheshim qabıllag'anda aljasadı.
8 Pu'tkil dasturxanları qusıqqa tolg'an, hesh bir taza jeri joq.
9 Olar bılay deydi: «Quday kimge bilim u'yretpekshi? Xabardı kimge tu'sindirmekshi? Endi emshekten shıqqanlarg'a ma yamasa jaqında emiwdi toqtatqanlarg'a ma?
10 „Ba-ba-ba, da-da-da“, – dep, olay-bılay bıdırlaydı».
11 Endi Jaratqan İye bul xalıqqa shet ellilerdin' awzı menen, tu'siniksiz tillerde so'yleydi.
12 Burın olarg'a: «Bul – tınıshlıq jeri, sharshag'anlar dem alsın. Bul – dem alıw ornı», – degen edi. Biraq olar tın'lamadı.
13 Jaratqan İyenin' so'zi olar ushın: «„Ba-ba-ba, da-da-da“, – dep, olay-bılay bıdırlaydı» boldı. Solay etip, olar ketip, shalqasına qulap jaraqatlanadı, duzaqqa tu'sip, alıp ketiledi.
14 Sonlıqtan, Erusalimde bul xalıqqa hu'kimdarlıq etip otırg'an surbetler, Jaratqan İyenin' so'zin tın'lan'lar!
15 Sizler: «Bizler o'lim menen kelisim du'zdik, o'liler ma'kanı menen pitim du'zdik. Apatshılıq kelse, bizge tiymey, o'tip ketedi. Sebebi bizler o'tirikti pana, jalg'andı jasırınatug'ın orın qılıp alg'anbız», – deysizler.
16 Sonın' ushın Quday İye bılay deydi: «Mine, Men Siong'a tiykar tasın, sınalg'an tastı, qımbatbaha mu'yesh tasın, isenimli tiykar qoyaman. Og'an isengenler hesh qashan qa'weterge tu'speydi.
17 Men a'dillikti o'lshew jibi, a'dalatlıqtı ta'rezi qılaman. Burshaq jawıp, o'tiriktin' panasın sıpırıp alıp ketedi, jasırıng'an ornın'ızdı sel basadı.
18 Sizlerdin' o'lim menen du'zgen kelisimin'iz buzıladı, o'liler ma'kanı menen du'zgen pitimin'iz o'z ku'shin joytadı. Ullı apat kelgende, jer menen jeksen bolasız.
19 Apat ha'r kelgeninde, sizlerdi sıpırıp alıp ketedi. Ol ha'r ku'ni azanda, ku'ndiz-tu'ni keledi». Bul xabardı tu'singenin'izde, sizlerdi qorqınısh biyleydi.
20 Sozılıwg'a to'segin'iz dım qısqa, oranıwg'a ko'rpen'iz dım ensiz boladı.
21 Jaratqan İye Perasim tawındag'ı sıyaqlı qozg'alajaq, Gibon oypatlıg'ındag'ı sıyaqlı g'a'zepke minejaq. Ol O'z isin, a'detten tıs isin, O'z ha'reketin, tan' qalarlıq ha'reketin ju'zege asıradı.
22 Eger kisenlerin' ja'ne de bekkemirek bolmasın desen'iz, artıq surbetlikti toqtatın'. Pu'tkil du'nyanı joq qılıwdı sheshkeni tuwralı Quday, A'lemnin' İyesinen esittim.
23 Qulaq tu'rip, dawısımdı esitin', dıqqat qoyıp, so'zimdi tın'lan'!
24 Diyxan egin egiw ushın tek jer ayday bere me? Yamasa tek kesek ezip, malalay bere me?
25 Ol jerdi tegislep bolıp, anis egip, zire seppey me? Biydaydı qatarlap, arpanı o'z tanabına, jazlıq biydaydı shetine aylandırıp egip taslamay ma?
26 Qudayı og'an na'siyat berip, usınday ta'rtipke u'yretedi.
27 Anis tu'yekke aydalmaydı, zire arbanın' do'n'gelegi menen basılmaydı. Anis tayaq penen, al zire shıbıq penen sabalanadı.
28 Nang'a arnalg'an biyday tu'yeklenedi, biraq ol ma'n'gige ezile bermeydi. Arbanın' do'n'gelegi menen u'stinen tu'yekti aydasa da, atlar biydaydı maydalap ezip taslamaydı.
29 Bul da A'lemnin' Jaratqan İyesinen berilgen. Onın' ma'sla'ha'ti a'jayıp, danalıg'ı ullı.
