İyshaya 29 bob
1 Dawıttın' ma'kan basqan qalası Ariel, Ariel, ha'siret shegesen'! Jılg'a jıl qos, bayramların' dawam ete bersin.
2 Men Arielge azap shektiremen. Ol jılap, pa'riyad etedi, Men ushın qurbanlıq oshag'ı kibi boladı.
3 Seni aylanıp, orda quraman, La'shkerlerdi ornatıp, qamal qılaman. Qarsın'a minaralar tikleymen.
4 Sen qulatılıp, jerdin' astınan so'ylersen', So'zlerin' topıraq ishinen esitiler, Dawısın' a'rwaq dawısınday bolıp, jerden shıg'ar, So'zlerin' topıraqtan sıbırlap esitiler.
5 Biraq sansız dushpanların' orpan' shan'g'ıt kibi, Rehimsiz sansız la'shkerler suwırılg'an qawıq kibi ushıp ketedi. Tosattan, bir ma'writte,
6 A'lemnin' Jaratqan İyesi gu'ldirmama, Jer qozg'alıwı, ullı shawqım, Boran, dawıl ha'm jalmaytug'ın ot jalını menen keledi.
7 Arielge qarsı urısqan barlıq milletler, Og'an ha'm onın' qorg'anlı qalalarına hu'jim qılıp, Onı ezgenler, Tu'ndegi tu's kibi, tu'ngi ko'rinis kibi boladı.
8 Ash adam tu'sinde awqat jese de, Oyang'anda ash boladı, Tu'sinde suw ishken adamnın' da, On'ında sho'li basılmaydı. Sion tawına qarsı urısqan, Ha'mme milletlerdin' sansız ordası da usı awhalg'a tu'sedi.
9 Hayran bolıp, tan' qalın', O'zin'izdi go'r qılın', soqır bolın', Ma's bolın', biraq sharaptan emes, Su'rnigin', biraq o'tkir ishimlikten emes.
10 Jaratqan İye sizlerge teren' uyqı berdi, Ko'zlerin'izdi jawıp qoydı, ha'y, payg'ambarlar, Basların'ızdı orap qoydı, ha'y, wa'liyler.
11 Bul ayanlardın' ha'mmesi sizler ushın mo'rlengen orama qag'azdag'ı so'zlerdey bolıp qaldı. Eger oqıp biletug'ın adamg'a orama qag'azdı berip: «Mınanı oqıp ber», – desen'iz, ol: «Oqıy almayman, bul mo'rlengen-g'o», – deydi.
12 Eger orama qag'azdı oqıp bilmeytug'ın adamg'a berip: «Mınanı oqıp ber», – desen', ol: «Men oqıy almayman», – dep juwap beredi.
13 İyemiz bılay deydi: «Bul xalıq tek so'zi menen Mag'an jaqınlap, Tek awzı menen Meni sıylaydı. Biraq ju'regi Mennen alıs. Adam jaratqan qag'ıydalardag'ı buyrıqlar arqalı Mag'an sıyınadı.
14 Sonlıqtan Men bul xalıqtın' arasında ja'ne bir qu'diretli is, Tan' qalarlıq qu'diretli is isleymen. Danaları danalıqtan mahrum boladı, Aqıllıları aqılınan ayırıladı».
15 O'z niyetlerin Jaratqan İyeden jasırıwg'a tırısıp, İslerin qaran'g'ılıqta qılıp atırg'anlar, ha'siret shegedi! Olar: «Bizdi kim ko'redi, kim bizdi biledi»? – deydi.
16 Sizler ha'mmesin nadurıs tu'sinip atırsız! Gu'lalshını ılay menen ten'lestirip bola ma? İslengen zat o'zin islegenge: «Ol meni islemedi», – dey me? Pishimi keltirilgen zat o'zinin' pishimin islep shıqqang'a: «Ol hesh na'rseni tu'sinbeydi», – dep ayta ma?
17 Tez arada a'jayıp Lebanon bir jın'g'ıllıqqa, Al jın'g'ıllıq bolg'an jerler a'jayıp tog'ayg'a aylanbay ma?
18 Sol ku'ni geren'ler orama qag'azdın' so'zlerin esiter, Qoyıw qaran'g'ılıq ishinde soqırlardın' ko'zleri ko'rer.
19 Kishipeyiller Jaratqan İyeden jan'adan quwanısh tabar, Jarlılar İzraildın' Muxaddesinde shadlanar.
20 Zalımlar joq bolar, Surbetler g'ayıp bolar, Jamanlıq ta'repdarları joq qılınar.
21 Do'hmet qılıp, adamlardı ginalag'anlar, Qala da'rwazasındag'ı qazıg'a duzaq qurar, Haqtı jalg'an gu'walıqlar menen huqıqınan mahrum eter.
22 Sonlıqtan İbrayımdı qutqarg'an Jaratqan İye, Yaqıptın' urpaqları tuwralı bılay deydi: «Artıq Yaqıptın' urpag'ı masqaralanbas, Endi ju'zi qara bolmas.
23 O'z qolım menen jaratqan balaların o'z aralarında ko'rgende, Atımdı muxaddes sanaydı. Yaqıptın' Muxaddesin muxaddes sanap, İzraildın' Qudayınan qorqatug'ın boladı.
24 Joldan adasqanlar tu'sinedi, Shag'ım etip nalıytug'ınlar ta'limdi qabıl etedi».
