İyshaya 30 bob
1 Jaratqan İye bılay deydi: «Qozg'alan'shı balalar, ha'siret shegedi! Olar Mennen bolmag'an oy-niyetlerdi ju'zege asıradı, Menin' Ruwxımsız kelisimler du'zedi, Gu'na u'stine gu'na jamaydı.
2 Mennen ken'es soramay, Faraonnın' panasında panalaw, Mısırdın' sayasına tıg'ılıw ushın, Mısırg'a baradı.
3 Faraonnın' panası sizlerdi uyatqa qaldıradı, Mısırdın' qorg'awshı sayası sizlerdi biyabıray qıladı.
4 Basshıları Soanda bolıp, Elshileri Xaneske jetken bolsa da,
5 O'zlerine paydası bolmag'an xalıq sebepli olar uyatqa qaladı. Sol xalıq ja'rdem de, payda da bermeydi. Tek olardı uyatqa qaldırıp, shermende qıladı».
6 Negeb haywanları tuwralı payg'ambarshılıq so'z: Urg'ashı ha'm erkek arıslan, Za'ha'rli sur ha'm oq jılanlar jasaytug'ın, Apatlı ha'm azaplı u'lkeni gezip, Baylıqların esheklerdin' arqasına, G'a'ziynelerin tu'yelerdin' o'rkeshine artıp, Paydası joq xalıqqa ag'ılıp baradı.
7 Mısırdın' ja'rdemi paydasız ha'm u'mitsiz. Sonlıqtan Men onı: «Biykarshı Rahab» dep atadım.
8 Endi barıp, bunı bir tas taxtag'a jazıp, Olarg'a kitap etip ber. Bul keleshek ku'nleri ushın, Ma'n'gilik gu'walıq bolsın.
9 Bul qozg'alan'shı xalıq, hiyleker balalar, Jaratqan İyenin' ta'liminen bas tartatug'ın perzentler.
10 Olar ko'zi ashıqlarg'a: «Ayan ko'riwdi qısqartın'!» Al wa'liylerge: «Haqıyqattı aytıp, payg'ambarshılıq qılman', Bizlerge jag'ımlı so'zlerdi aytıp, 0 Qıyalıy payg'ambarshılıq etin',
11 Joldan shıg'ın', qaytın' bul joldan, İzraildın' Muxaddesin ko'zimizden joq qılın'!» – deydi.
12 Sonlıqtan İzraildın' Muxaddesi bılay deydi: «Bul xabardı qabıl etpey, Zulımlıq ha'm jalg'annan u'mit etip, Olarg'a su'yengenin'iz ushın,
13 Bul qılmısın'ız sizler ushın, Biyik diywaldag'ı opırılıp atırg'an tesik kibi boladı. Diywal tosattan, bir sa'tte qulap, qıyraydı.
14 Ol ılay ıdıs yan'lı qıyrap qaladı. Maydalang'anı sonshelli, Oshaqtan ku'l alıwg'a da, quyıdan suw alıwg'a da, Jarag'anday sınıg'ı qalmaydı».
15 Sonlıqtan Quday İye, İzraildın' Muxaddesi bılay deydi: «Mag'an qaytıp, ra'ha't tabın', qutqarılasız. Eger sizler tınıshlıq penen Mag'an u'mit baylasan'ız, ku'shli bolasız». Biraq sizler bunı qa'lemedin'iz.
16 Sizler: «Yaq, bizler atqa minip qashamız», – dedin'iz. Sonın' ushın qashasız-da'! Sizler: «Bizler ju'yrik atqa minip shabamız», – dedin'iz. Sonın' ushın quwıwshılar da ju'yrik boladı!
17 Bir adamnın' aybatınan mın' adam qashadı, Besewinin' aybatınan ha'mmen'iz qashasız. Qalg'anların'ız taw to'besindegi bayraq shıbıg'ı, To'beshiktegi bayraq kibi bolasız.
18 Jaratqan İye sizlerge miyrim-sha'pa'a't ko'rsetiw ushın ku'tip turadı, Sizlerge rehim ko'rsetiw ushın ornınan turadı. Sebebi Jaratqan İye a'dalat Qudayı, Onı ku'tkenler baxıtlı!
19 Ha'y, Erusalimde jasaytug'ın Sion xalqı, Endi jılamaysız! Pa'riyad etkenin'izde, Ol sizlerge miyrim-sha'pa'a't ko'rseter. Esitiwden-aq, Ol sizlerge juwap berer.
20 İyemiz sizlerge azap sho'regin berip, Apat suwın ishkizgen bolsa da, Mug'allimin'iz endi jasırınbas, Ko'zin'iz benen Onı ko'resiz.
21 Qulag'ın'ız art betten: «Mınaw durıs jol, sonnan ju'r», – degen dawıstı esitedi. Sonda on'g'a burılıw kerek pe, shepke burılıw kerek pe bilesiz.
22 Sonda gu'misin' menen qaplang'an butlardı, Altının' menen qaplang'an ha'ykellerdi, Haram dep sanap, haram na'rsedey ko'rip, ılaqtırıp taslaysız. Olarg'a: «Joq bolın'lar!» – deysiz.
23 yemiz jerge ekken tuqımın' ushın jawın jawdıradı, Jerdin' zu'ra'a'ti mol ha'm bereketli boladı. Sol ku'ni malların' ken' jaylawda jayılıp ju'redi.
24 Jer aydaytug'ın o'giz ha'm eshekler, Gu'rek ha'm jaba menen samalg'a suwırılg'an, Saylandı jem jeydi.
25 Ullı qırg'ın ku'ni, minaralar qulag'anda, Ha'r bir biyik tawda, ha'r bir biyik to'bede suwlar ag'ıp turadı.
26 Jaratqan İye O'z xalqının' jaraların tan'ıp, O'zi bergen jaraqattı jazg'an ku'ni, Aydın' nurı ku'n nurınday, Ku'nnin' nurı jeti ku'nnin' nurınday, Jeti ese jaqtı boladı.
27 Mine, Jaratqan İyenin' O'zi uzaqtan, Lawlag'an qa'ha'ri menen qoyıw bult ishinde kiyatır. Onın' awzı g'a'zepke tolı, Tili jalmaytug'ın otqa megzer.
28 Demi moyıng'a deyin ko'teriletug'ın tasqıng'a uqsar. Ol milletlerdi nabıt bolıw eleginen o'tkeredi. Xalıqlardın' awzına olardı joldan azg'ıratug'ın ju'wen saladı.
29 Biraq sizler muxaddes bayramdı nıshanlag'an tu'ndegidey, Qosıq aytasız. Jaratqan İyenin' tawına, İzraildın' qorg'awshı jartasına, Sırnay sazı astında shıqqanın'ızday, Ju'regin'iz shadlanadı.
30 Jaratqan İye aybatlı dawısın esittirip, Lawlag'an g'a'zebi ha'm jalmaytug'ın ot jalını menen, No'ser jawın, dawıl ha'm burshaq penen, Bileginin' ku'shin ko'rsetedi.
31 Jaratqan İyenin' dawısı Assiriyanı qorqıtıp, titiretedi, Ol hasası menen Assiriyanı uradı.
32 aratqan İyenin' jaza hasası menen, Olardı urg'an ha'r bir soqqısı, Da'p ha'm lira naması astında a'melge asadı. Jaratqan İye qol jumsap, olar menen urısadı.
33 Deneler jag'ılatug'ın orın a'lle qashan tayınlandı, Awa, Assiriya patshası ushın tayın qılıp qoyıldı. Ol jer teren' ha'm ken' bolıp, Otın qalap toltırılg'an. Ag'ıp turg'an ku'kirt kibi, Jaratqan İyenin' demi onı jandıradı.
