İyshaya 33 bob
1 Ha'y, o'zi wayran etilmegen, Wayran etiwshi, ha'siret shegesen'! Ha'y, o'zine satqınlıq islenbegen, Satqınlıq etiwshi, ha'siret shegesen'! Wayran etip bolg'anın'nan keyin, O'zin' de wayran etilesen', Satqınlıq etip bolg'anın'nan keyin, O'zin'e de satqınlıq islenedi.
2 Jaratqan İye, bizlerge rehim et! Bizler Sag'an u'mit bayladıq. Ha'r tan'da bizge ku'sh-quwat berip, Qıyınshılıqqa ushırag'anımızda qutqara go'r!
3 Qu'diretli dawısın'nan xalıqlar qashıp keter, Ornın'nan turg'anın'da, milletler pıtırap qashar.
4 Oljan'ız shegirtkeler jep taslag'anday joq bolar, Adamlar u'lken shegirtkeler toparının' topılg'anınday oljag'a bas salar.
5 Joqarıda ma'kan qurg'an Jaratqan İye ullı! Toltırar Ol Siondı a'dalatlıq ha'm a'dillikke.
6 Ol senin' da'wirin'nin' bekkem tiykarı bolıp, Mol etip qutqarılıw, danalıq ha'm bilim berer. Jaratqan İyeden qorqıw – bul g'a'ziyne.
7 Mine, batırları ko'shelerde pa'riyad eter, Paraxatshılıq elshileri zar en'irep jılar.
8 U'lken jollar bosap qalar, Jolawshılar ol joldan ju'rmes. Pitimler buzılıp, ishken antlarınan tayar, Adamlar qa'dirin joytar.
9 Jer qurg'ap, kewip barar, Lebanon tog'ayları uyattan quwrap qalar, Sharon tegisligi sho'lge uqsap qalıp, Bashan ha'm Karmeldegi ag'ashlar japıraqların to'ger.
10 Jaratqan İye bılay deydi: «Endi ornımnan turaman, Ko'terilip, dan'qımdı shıg'araman.
11 Sizler pishenge ha'miledar bolıp, Saban tuwasız. Demin'iz o'zlerin'izdi jalmap jutatug'ın otqa aylanadı.
12 Xalıqlar janıp ku'l boladı, Kesilip, otqa jag'ılg'an tikendey boladı.
13 Ha'y uzaqtag'ılar, ne islegenimdi esitin'! Ha'y jaqındag'ılar, qu'diretimdi bilin'!»
14 Siondag'ı gu'nakarlar qorqıwg'a tu'sip, Qudaysızlardı titirew biylep aldı. Olar bılay deydi: «Jalmaytug'ın ottın' janında qaysısımız jasay alamız? Ma'n'gi janıp turg'an jalın janında qaysısımız ornalasa alamız?»
15 Hadal jasap, tuwrı so'ylegen, Zorlıq penen alıng'an paydadan jerkengen, Qolın para alıwdan tıyg'an, Qanxorg'a qulaq tu'rmegen, Jamandı ko'rmew ushın ko'zlerin jumg'an,
16 Bunday adam biyikliklerde jasaydı. Jartaslardag'ı qorg'anlar onın' panası bolar, Onın' nanı mol bolıp, hesh qashan suwsız qalmas.
17 Ko'zin'iz patshanı pu'tkil go'zzallıg'ı ishinde ko'rip, Uzaqlarg'a sozılg'an u'lkeni sholıp o'ter.
18 O'tken qorqınıshlı ku'nler haqqında oylap: «Salıq jıynag'an qay jerde? Salıqtı o'lshep alg'an qay jerde? Minaralardı sanag'an qay jerde?» – deysen'.
19 Bunnan bılay, ga'pine tu'sinbeytug'ın, Basqa tilde so'yleytug'ın, Sol ta'kabbir xalıqtı ko'rmeysiz.
20 Bayramlarımız belgilenetug'ın Sion qalasına qara! Ko'zlerin' tınısh ma'kandı, Bekkem shatır bolg'an Erusalimdi ko'redi. Onın' qazıqları hesh qashan ornınan suwırılmaydı, Birde bir jibi u'zilmeydi.
21 Ken' da'ryalar ha'm saylar ag'ıp turg'an jerde, Qu'diretli Jaratqan İye bizler menen birge boladı. Olardan eskekli kemeler de, Jelqomlı kemeler de o'te almaydı
22 Jaratqan İye bizin' qazımız, Ol bizlerdin' nızam shıg'arıwshımız. Jaratqan İye bizin' patshamız, Ol bizlerdi qutqaradı.
23 Ha'zir kemelerin'izdegi jipler juqarıp, Olar o'rlikti uslap tura almaytug'ın, Jelqomdı da asha almaytug'ın bolsa da, Waqtı kelgende u'lken olja bo'linedi, Ha'tte, aqsaqlar da oljasın aladı.
24 Sion turg'ınlarının' hesh biri: «Men keselmen» – demeydi, Ol jerde jasag'an xalıqtın' gu'nası keshiriledi.
