İyshaya 34 bob
1 Ha'y milletler, jaqınıraq kelip, qulaq salın'! Ha'y xalıqlar, dıqqat awdarın'! Jer ha'm onı toltırıp turg'anlar, Du'nya ha'm onda tuwılg'anlardın' barlıg'ı esitsin!
2 Jaratqan İyenin' pu'tkil milletlerge qa'ha'ri kelip, Olardın' pu'tkil la'shkerlerine qarsı g'a'zebi lawladı. Ol olardı pu'tkilley joq qılıp, Bawızlaw ushın tapsırdı.
3 Olardın' o'likleri dalag'a ılaqtırıp taslanıp, Shirip, sasıp jatar, Tawlar olardın' qanına bılg'anar.
4 Pu'tkil aspan deneleri shirip keter, Aspan orama qag'azday shıyırılar. Ju'zim ag'ashının' japırag'ınday, A'njir ag'ashının' japırag'ınday bolıp, Ondag'ı pu'tkil barlıq solıp to'giler.
5 Jaratqan İye bılay deydi: «Qılıshım ko'klerde qang'a toydı. Endi, qılıshım jazalaw ushın Edomnın' u'stine, Pu'tkilley joq qılıwdı qarar etken xalıqtın' u'stine tu'sedi».
6 Jaratqan İyenin' qılıshı qang'a toyınıp ha'm mayg'a bılg'anıp, Qozı menen tekenin' qanına, Qoshqardın' bo'teke mayına toyg'an. Jaratqan İyenin' Bosrada qurbanlıg'ı bar, Edom jerinde ullı qırg'ın boladı.
7 Jabayı bug'alar, tanalar ha'm ku'shli bug'alar da, Olar menen birge qulaydı. Olardın' jeri qang'a suwg'arıladı, Topırag'ı mayg'a toyadı.
8 Sebebi bul ku'n Jaratqan İyenin' o'sh alıw ku'ni, Sionnın' dawası ushın o'sh alatug'ın jıl boladı.
9 Sonda Edomnın' da'ryaları qara mayg'a, topırag'ı ku'kirtke, jeri janıp turg'an qara mayg'a aylanadı.
10 Ol ku'ni-tu'ni o'shpey, tu'tini ma'n'gige 4 ko'terilip turadı. Sol jer a'wladtan-a'wladqa qan'ırap, bos qaladı. Endi hesh qashan ol jerden hesh kim o'tpeydi.
11 Uzaqsha ha'm kirpitikenler ol jerdi iyelep alıp, qulaqlı japalaq ha'm g'arg'alar ma'kan basadı. Jaratqan İye onın' u'stinen ta'rtipsizlik jibin, wayran bolıw aspa rejesin tartadı.
12 Aqsu'yekleri sol jerde patshalıq joqlıg'ın aytadı, pu'tkil hu'kimdarları joq bolıp ketedi.
13 Onın' saraylarına tikenler, qorg'anlarına jantaq ha'm oshag'anlar o'sip, sag'allardın' ma'kanına, u'kilerdin' baspanasına aylanadı.
14 Ol jerde jabayı haywanlar sırtlanlarg'a dus keledi, teke ma'n'irep bir birin shaqıradı. Tu'nde janzatlar sol jerde dem alıp, tınım tabadı.
15 Bayıwlılar sol jerge uya salıp, ma'yek basıp shıg'arıp, palapanların qanatı astına jıynaydı. Lashınlar da sol jerde jup-jubı menen toplanadı.
16 Jaratqan İyenin' kitabınan oqıp, izlen': Bulardan hesh biri jog'almaydı, hesh biri jupsız qalmaydı. Sebebi bul buyrıq Jaratqan İyenin' awzınan shıqtı, Onın' Ruwxı olardı jıynaydı.
17 Jaratqan İye olar ushın shek tasladı, O'z qolı menen jerdi o'lshep berdi. Olar sol jerdi ma'n'gige iyelep, a'wladtan-a'wladqa sol jerde jasaydı.
