İyshaya 36 bob
1 Xizkiyanın' patshalıg'ının' on to'rtinshi jılında, Assiriya patshası Sanxerib Yahudanın' barlıq qorg'anlı qalalarına hu'jim jasap, olardı basıp aldı.
2 Son'ınan Assiriya patshası bas wa'zirin u'lken armiya menen Laxishten Erusalimge, patsha Xizkiyag'a jiberdi. Ol kelip, kir juwıwshının' atızına baratug'ın joldag'ı, Joqarg'ı hawızg'a suw quyılatug'ın jerde toqtadı.
3 Saray basqarıwshısı Xilkiya ulı Elyakim, xatker Shebna ha'm jılnamashı Asaf ulı İoax onı qarsı alıwg'a shıqtı.
4 Sonda Assiriya patshasının' bas wa'ziri olarg'a bılay dedi: – Ullı patsha, Assiriya patshasının' mına so'zlerin Xizkiyag'a jetkizin': «Nen'e u'mit artıp tursan'?
5 Urıs ushın joba ha'm ku'sh bar dep aytasan', biraq sen tek bos so'zlerdi aytıp tursan'. Sen kimge u'mit artıp, mag'an qarsı bas ko'terip tursan'?
6 Mine, sen o'zine su'yengennin' alaqanına kiretug'ın sınıq qamıs hasag'a uqsag'an Mısırg'a su'yenip tursan'. Mısır patshası faraon o'zine isengenlerdin' ha'mmesine usınday.
7 Ba'lkim mag'an: Bizler Qudayımız Jaratqan İyege u'mit artamız, – dersizler. Yahuda ha'm Erusalim xalqına: Tek mına qurbanlıq orında sıyının'lar, – dep sıyınıw orınların ha'm qurbanlıq orınların joq qılg'an Xizkiya emes pe edi?»
8 Endi sen, menin' mırzam Assiriya patshası menen mawasag'a kel. Eger men sag'an eki mın' bas at bersem, olarg'a minetug'ın sonsha adam taba alar ma edin'?
9 Solay eken, mırzamnın' en' ha'lsiz a'skerbasısın da jen'e almaysan'-g'o. Yamasa Mısırdın' sawash arbaları menen atlılarına isenip tursan' ba?
10 «Qala berse, men bul jerdi wayran etiw ushın Jaratqan İyenin' erkisiz keldim be? Jaratqan İye mag'an: Sol u'lkege hu'jim qılıp, onı wayran et, – dedi».
11 Xilkiya ulı Elyakim, Shebna ha'm İoax bas wa'zirge bılay dep juwap berdi: «Bul qulların'ız benen arameyshe so'ylese berin', tu'sinemiz. Diywal u'stindegi xalıqqa esittirip, bizler menen evrey tilinde so'ylespen'iz».
12 Bas wa'zir olarg'a: «Mırzam meni bul so'zlerdi tek mırzan'a ha'm sag'an aytıw ushın emes, al sizler menen birge o'z da'retin jep, sidigin ishiwge duwshar bolatug'ın diywal u'stinde otırg'an adamlarg'a da jetkeriw ushın jiberdi», – dedi.
13 Son'ınan bas wa'zir ornınan turıp, evrey tilinde bılay dep baqırdı: «Ullı patshanın', Assiriya patshasının' so'zlerine qulaq salın'lar!
14 Patsha bılay deydi: „Xizkiya sizlerdi aldamay-aq qoysın. Ol sizlerdi qutqara almaydı.
15 Ol: Jaratqan İye bizlerdi qutqaradı, qala Assiriya patshasının' qolına berilmeydi, – dep sizlerdi Jaratqan İyeden u'mitlendirmesin“.
16 Xizkiyag'a qulaq salman'lar. Sebebi Assiriya patshası bılay deydi: „Menin' menen jarasıp, mag'an kelin'ler. Sonda ha'r bir adam o'z ju'ziminin' ha'm a'njir ag'ashının' miywesinen jep, o'z suw saqlag'ıshınan suw ishedi.
17 Son'ınan men kelip, sizlerdi biydayı, sharabı, nanı, ju'zimzarları mol bolg'an, o'z u'lken'izge uqsag'an bir u'lkege ko'shiremen.
18 Xizkiya: Jaratqan İye bizlerdi qutqaradı, – dep aldamasın! Qaysı xalıqtın' qudayı o'z u'lkesin Assiriya patshasının' qolınan qutqara alg'an?
19 Xamat ha'm Arpadtın' qudayları qayda? Sefarwayımnın' qudayları qayda? Samariyanın' qudayları Samariyanı menin' qolımnan qutqara aldı ma?
20 Usı ellerdin' qudaylarının' qaysı biri o'z jerin menin' qolımnan qutqara aldı? Solay eken, Jaratqan İye Erusalimdi menin' qolımnan qalay qutqaradı?“»
21 Xalıq u'ndemedi, juwap ta qaytarmadı. O'ytkeni patsha Xizkiya xalıqqa og'an juwap bermewdi buyırg'an edi.
22 Saray basqarıwshısı Xilkiya ulı Elyakim, xatker Shebna ha'm jılnamashı Asaf ulı İoax kiyimlerin jırtıp, Xizkiyanın' aldına keldi ha'm Assiriya patshasının' bas wa'zirinin' so'zlerin og'an aytıp berdi.
