İyshaya 38 bob
1 Sol ku'nleri Xizkiya awırıp, o'lim to'seginde jattı. Sonda Amos ulı İyshaya payg'ambar og'an kelip bılay dedi: «Jaratqan İye bılay deydi: „U'y-ishin'e wa'siyatnaman'dı qaldırıp, ırzalasa ber, sebebi ta'wir bolmaysan', o'lesen'“».
2 Xizkiya ju'zin diywalg'a qaratıp, Jaratqan İyege duwa etip:
3 «O, Jaratqan İye! Aldın'da menin' shın ju'rekten sadıqlıq penen jasag'anımdı ha'm na'zerin'de tuwrı islerdi islep ju'rgenimdi esley go'r!» – dedi ha'm o'ksip-o'ksip jıladı.
4 Sonda İyshayag'a Jaratqan İyeden mınaday so'z tu'sti:
5 «İzin'e qaytıp, Xizkiyag'a mına xabardı jetkiz: „Baban' Dawıttın' Qudayı Jaratqan İye bılay deydi: Duwan'dı esittim, ko'z jasların'dı ko'rdim. O'mirin'di on bes jılg'a uzaytaman.
6 O'zin'di de, bul qalanı da Assiriya patshasının' qolınan qutqarıp, bul qalanı qorg'ayman.
7 Jaratqan İyenin', yag'nıy Menin' sag'an O'z so'zimdi orınlaytug'ınımdı bildiretug'ın belgi mınaw:
8 Axaz soqtırg'an tekshenin' u'stine tu'sip turg'an sayanı on adım artqa jıljıtaman“». Sonda tekshenin' u'stine tu'sip turg'an saya on adım artqa jıljıdı.
9 Yahuda patshası Xizkiya awırıp turg'annan keyin, mına jırdı jazdı:
10 Men: «O'mirimnin' gu'llengen shag'ında, O'liler ma'kanının' da'rwazasınan o'tip ketemen. Qalg'an o'mir jıllarımnan mahrum etildim», – dedim.
11 Ja'ne: «Tiriler a'leminde Jaratqan İyeni ko'rmeymen, Bunnan bılay, insan zatına ko'zim tu'spes, Bul du'nyada jasag'anlardın' janında da bolmaspan», – dedim.
12 U'yim shopannın' shatırı kibi, Suwırılıp, qolımnan alındı. O'mirimdi toqıwshı sıyaqlı o'tkerdim, Jaratqan İye meni toqıw u'skenesinen kesip alıp tasladı. Bir ku'n ishinde o'mirimdi aqırına jetkerdin'.
13 Azang'a shekem to'zim berip shıdadım, Ol arıslan kibi, barlıq su'yeklerimdi sındırdı. Bir ku'n ishinde o'mirimdi aqırına jetkerdin'.
14 Men qarlıg'ash yaki tırna kibi baqırdım, Kepter kibi zarladım. Joqarıg'a qarawdan ko'zlerim taldı, Men zulımlıqqa ushıradım, ja'rdem ber, İye!
15 Ne deyin? Menin' menen so'ylesken de, onı a'melge asırg'an da O'zi. Qa'lbimdegi qayg'ını eske alıp, O'mirim boyı, abaylap jasayman.
16 İye, Senin' qararın' adamlarg'a o'mir bere aladı, Menin' o'mir jıllarım da mag'an qayta berildi, Densawlıg'ımdı tiklep, o'mirimdi saqlap qala go'r!
17 Mine, shekken azabım men ushın jaqsılıqqa boldı, O'mirimdi nabıt bolıw shuqırınan qutqardın'. Barlıq gu'nalarımdı artın'a ılaqtırdın'.
18 O'liler ma'kanı Seni alg'ıslamas, O'lim Sag'an maqtaw aytpas, Tun'g'ıyıqqa tu'skenler Senin' sadıqlıg'ın'a u'mit baylamas.
19 Bu'gin menin' islegenim sıyaqlı, Tiriler, tek tiriler g'ana Sag'an alg'ıs aytar, A'keler balalarına Senin' sadıqlıg'ın' tuwralı aytıp berer.
20 Jaratqan İye meni qutqarar, Pu'tkil o'mirimiz boyı, Jaratqan İyenin' İbadatxanasında, Tarlı saz a'sbapları menen qosıq aytamız.
21 İyshaya patshanın' adamlarına: «Keptirip nıg'ızlang'an a'njir alıp kelip, onı jarag'a qoyın', ol sawalıp ketedi», – degen edi.
22 Sonda Xizkiya İyshayadan: «Jaratqan İyenin' İbadatxanasına baratug'ınımdı qanday belgi arqalı bilemen?» – dep sorag'an edi.
