İyshaya 44 bob
1 «Biraq, endi, ha'y, qulım Yaqıp, Tan'lag'anım İzrail, qulaq sal!
2 Seni jaratqan, qursaqta seni qa'liplestirgen, Sag'an ja'rdem beretug'ın Jaratqan İye bılay deydi: Qorqpa, qulım Yaqıp, Saylap alg'anım Eshurun!
3 Kewip qalg'an jerge suw jiberip, Qurg'aq jerlerge saylar ag'ızaman. Urpaqların'nın' u'stine Ruwxımdı, Perzentlerin'nin' u'stine jarılqawımdı jawdıraman.
4 Olar jasıl jaylawdag'ı otlar, Ag'ın suw jag'asındag'ı tallar sıyaqlı o'sip-o'nedi.
5 Birewi: „Men Jaratqan İyege tiyislimen“, – deydi, Ekinshisi o'zin Yaqıptın' atı menen atar, Basqası: „Jaratqan İyege tiyislimen“, – dep qolına jazıp, O'zin İzrail dep atar».
6 İzraildın' Patshası ha'm A'mengeri Jaratqan İye, A'lemnin' Jaratqan İyesi bılay deydi: «Men birinshi ha'm son'g'ıman, Mennen basqa quday joq.
7 Mag'an uqsag'anı bar ma? Ol xabar bersin. A'yyemgi xalqımdı jaratqan ku'nnen baslap bolıp o'tkenlerdi, Keleshekte ne bolatug'ının bildirip, bayanlasın. Endi bolatug'ın na'rselerden xabar bersin.
8 Qaltıraman', qorqpan'! Sizlerge a'wel bastan aytıp, bildirmedim be? Sizler Menin' gu'walarımsız. Mennen basqa quday bar ma? Basqa Jartas joq, basqa birde birewin de bilmeymen».
9 But soqqanlardın' ha'mmesi – hesh kim emes, Olar qa'dirlegen na'rseler – paydasız. Olardın' o'zleri bug'an gu'wa, Sebebi butları ko'rmeydi de, tu'sinbeydi de. Sonlıqtan olar shermende boladı.
10 Payda bermeytug'ın qudaydı kim sog'adı? Buttı kim quyadı?
11 Payda bermeytug'ın qudaydı kim sog'adı? Buttı kim quyadı?
12 Temirshi quralın alıp, Ko'mir shog'ında taplaydı, Sho'kkish penen islew berip, Bileginin' ku'shi menen pishim beredi. Temirshi ash bolıp, ha'lsireydi, Suw ishpey, haldan tayadı.
13 Ag'ash ustası ag'ashtı jip penen o'lshep, Ushlı qural menen sızıp aladı. Qashaw menen pishim berip, Asha tayaq penen tamg'alap, Adam qa'lpine keltiredi. Onı butxanag'a qoyıw ushın, Pu'tkil adam go'zzallıg'ın beredi.
14 Ol kedr ag'ashın kesip aladı. Sa'rwi yaki emen ag'ashın tan'lap alıp, O'siw ushın tog'aydag'ı terekler arasında qaldıradı. Yamasa kedr ag'ashın otırg'ızadı, Jawın onı o'siredi.
15 Keyin ag'ash otın boladı, Adam otınnın' bir bo'legin jag'ıp ısınsa, Basqa bo'legi menen nan pisiredi. Al qalg'anınan o'zine bir quday sog'ıp alıp, tabınadı, But sog'ıp alıp, aldına jıg'ılıp, ta'jim etedi.
16 Otınnın' yarımın jag'ıp, awqat tayarlaydı, Ka'bap pisirip, toyg'ansha jeydi. Ol jılınıp, bılay deydi: «Men jılındım, ottın' ha'wirin sezdim».
17 Awısqan otınnan ol quday, yag'nıy o'zine but islep alıp, Onın' aldında ta'jim etedi, og'an sıyınadı. Og'an duwa etip, bılay deydi: «Meni qutqar, o'ytkeni sen qudayımsan'».
18 Bunday adamlar hesh na'rseni bilmeydi, tu'sinbeydi de. O'ytkeni ko'rmesin dep ko'zleri, Tu'sinbesin dep ju'rekleri jabılg'an.
19 Hesh kim oylanıp ko'rmeydi: «Otınnın' yarımın jaqtım, Qozına nan pisirdim, Go'shten ka'bap pisirip jedim, Endi qalg'anınan jerkenishli na'rse sog'ayın ba? Bir bo'lek ag'ashqa tabınayın ba?» – Dep aytıwg'a aqıl-parasatı jetpeydi.
20 Ol ku'ldin' izinen quwadı, Aldang'an ju'regi onı joldan adastıradı. Ol o'z janın qutqara almaydı, «On' qolımdag'ı na'rse jalg'an na'rse emes pe?» – dey almaydı.
21 «Yaqıp, bulardı este tut, İzrail, sen Menin' qulımsan'. Men seni jarattım, sen Menin' qulımsan'. İzrail, Men seni umıtpayman.
22 Senin' qılmısların'dı bult kibi, Gu'naların'dı azang'ı duman kibi, taratıp jiberemen. Mag'an qayt, Men sen ushın to'lem to'ledim».
23 Ha'y ko'kler, quwanısh penen qosıq aytın', Sebebi bunı Jaratqan İye ju'zege asırdı. Ha'y jerdin' teren'likleri, baqırın'! Taw ha'm tog'aylar, Tog'aydag'ı ha'mme terekler qosıq aytın', Sebebi Yaqıptı Jaratqan İye azat etti, İzrailda O'zin dan'qqa bo'ledi.
24 Seni qursaqta qa'liplestirgen A'mengerin', Jaratqan İye bılay deydi: «Ha'mme na'rseni jaratqan, Ko'klerdi jalg'ız O'zi sozg'an, Jalg'ız O'zi jerdi jayg'an,
25 Jalg'an payg'ambarlardın' belgilerin pushqa shıg'arg'an, Palkerlerdi aqmaq qılg'an, Danalarg'a soqqı berip, Bilimlerin nadanlıqqa aylandırg'an,
26 Qulının' so'zin tastıyıqlag'an, Xabarshılarının' aytqanların a'melge asırg'an, Erusalimge: „İshinde ja'ne adam jasaydı“, – dep aytqan, Yahuda qalalarına: „Olar qaytadan qurıladı, Qarabaqanaların tikleymen“, – degen,
27 Shuqır suwlarg'a: „Qurıp ket, da'ryaların'dı qurıtaman“, – degen,
28 Kirge: „Menin' shopanım, barlıq maqsetlerimdi ol a'melge asıradı“, – degen, Erusalimge: „Jan'adan qurıladı“, İbadatxanag'a: „Qayta tiklenedi“, – degen, Jaratqan İye Men bolaman».
