İyshaya 45 bob
1 Jaratqan İye maylag'anına, On' qolınan uslag'anına, yag'nıy Kirge bılay deydi: «Aldın'da milletlerdi bas iydiremen, Patshalardı qurallarınan mahrum etemen. Aldın'da da'rwazalar ashılıp, Olar jabılmaydı.
2 Men aldın'da ju'rip, tawlardı tegisleymen, Qola da'rwazalardı buzıp, temir ta'mbilerdi sındıraman.
3 Sag'an qaran'g'ılıqta jasırıng'an g'a'ziynelerdi, Jasırın jerlerde saqlang'an baylıqlardı beremen. Usı arqalı atın'dı aytıp shaqırg'an Men – Jaratqan İye, İzraildın' Qudayı ekenimdi bilesen'.
4 Sen Meni tanımasan' da, Qulım Yaqıp, tan'lag'anım İzrail haqı, Seni atın'dı aytıp shaqırdım, Sag'an hu'rmetli at qoydım.
5 Men – Jaratqan İyemen, basqası joq. Mennen basqa quday joq. Meni tanımasan' da, sag'an ku'sh beremen+.
6 Shıg'ıstan batısqa deyingi adamlar, Mennen basqasının' joq ekenin bilip qoysın. Men – Jaratqan İyemen, basqası joq.
7 Nurdı do'retken, qaran'g'ılıqtı jaratqan Men bolaman, Abadanlıqtı beretug'ın, apatshılıqtı jiberetug'ın da Menmen. Bulardın' ha'mmesin isleytug'ın Men – Jaratqan İyemen.
8 Ko'kler, sen joqarıdan qutqarılıwdı to'k, Bultlar onı to'menge jawdırsın. Jer ashılıp, qutqarılıw o'sip shıqsın, Onın' menen birge a'dillik te o'ssin. Bunı Men – Jaratqan İye jarattım».
9 Jaratıwshısı menen dawlasatug'ınlar, sorın'ız qurısın! Topıraqtan jasalg'an gu'zenin' sınıg'ı! Ilay gu'lalshıg'a: «Ne islep atırsan'?» Yamasa: «İslep atırg'an na'rsen'nin' uslag'ıshı joq», – dep ayta ma?
10 A'kesine: «Meni nege du'nyag'a keltirdin'?» Anasına: «Meni nege tuwdın'?» – deytug'ınlar, Ha'siret shegesiz!
11 İzraildın' Muxaddesi ha'm Onın' Jaratıwshısı, Jaratqan İye bılay deydi: «Balalarımnın' keleshegi haqqında sorawg'a tutpaqshımısız? Qolımnın' isleri tuwralı buyrıq bermekshimisiz?
12 Men jerdi do'retip, Onın' u'stine adamdı jarattım, O'z qollarım menen ko'klerdi kerdim, Aspan denelerine buyrıq berdim.
13 Kirdi a'dil niyetimdi a'melge asırıw ushın ha'reketke keltirdim, Onın' pu'tkil jolların tegisleymen. Ol Menin' qalamdı qayta quradı, Tutqın bolg'an xalqımdı to'lemsiz ha'm parasız azat etedi». Bunı aytqan A'lemnin' Jaratqan İyesi boladı.
14 Jaratqan İye İzrailg'a bılay deydi: «Mısırdın' baylıg'ı, Kushtın' paydası seniki boladı, Uzın boylı Seba urpaqları sag'an keledi. Olar sag'an eredi, Kisenba'nt bolıp sag'an kelip, Ta'jim etip, jalbarınıp: „Quday tek senin' menen birge, basqa biri joq, Onnan basqa quday joq“, – deydi».
15 İzraildın' Qudayı – Qutqarıwshı, Haqıyqattan da, O'zin jasırg'an Quday – Sensen'!
16 But sog'atug'ınlardın' ha'mmesi uyatqa qalıp, masqara boladı, Ha'mmesi birge shermende boladı.
17 Biraq İzrail Jaratqan İye ta'repinen ma'n'gige qutqarıladı: Sizler ma'n'gige uyatqa qalmaysız, Masqara bolmaysız.
18 Ko'klerdi jaratqan – Ol Quday. Du'nyanı bina' etip, og'an tu'r-tu's bergen, Onı bekkemlegen, Onı bos turıw ushın emes, Al adam jasawı ushın jaratqan, Jaratqan İye bılay deydi: «Men Jaratqan İyemen, Mennen basqası joq.
19 Men jasırın da, qaran'g'ılıqta da so'ylemedim. Men Yaqıptın' urpaqlarına: „Meni hesh na'rse joq jerden izlen'“, – demedim. Men Jaratqan İyemen, haqıyqattı aytaman, Men shınlıqtı bayan etemen».
20 «Milletlerden qashıp qutılg'anlar, Kelip, bir jerge jıynalıp, qasıma jaqınlan'lar! Ag'ash butlardı ko'terip, Qutqarmaytug'ın qudayg'a sıyıng'anlar, Hesh na'rseni bilmeydi.
21 Aytın', dawan'ızdı bayan etin', Olar birge ma'sla'ha'tlessin! Bunı a'zelden aytqan kim? O'tmishte ayan etken kim? Jaratqan İye bolg'an Men emespen be? Mennen basqa quday joq, Men a'dil Qudayman ha'm Qutqarıwshıman, Mennen basqası joq.
22 Pu'tkil du'nya, Mag'an ju'z burın', qutqarılasız! Men Qudayman, basqası joq.
23 Men O'zim haqı ant ishtim, Awzımnan shıqqan so'z tuwrı, Ol bosqa shıqpas: „Ha'r bir dize aldımda iyilip, Ha'r bir til Mag'an ant ishedi“.
24 Olar Men tuwralı: „A'dalat ha'm ku'sh, Jalg'ız Jaratqan İyede“, – deydi». Og'an g'a'zeplengenlerdin' ha'mmesi, Aldına kelip, uyalıp qaladı.
25 Biraq İzraildın' pu'tkil na'sili, Jaratqan İyede aqlanıp, Onın' menen maqtanadı.
