İyshaya 47 bob
1 «Ha'y, pa'k qız Babilon, To'menge tu'sip, topıraqqa otır! Ha'y, kaldeylerdin' qızı, Jerge otır, endi taxtın' joq. Endi seni: „Na'zik ha'm mu'la'yim“, – dep atamaydı.
2 Digirmandı alıp, un tart, Pa'renjen'di alıp tasla, etegin'di tu'rip, Baltırın'dı ko'rsetip, da'ryalardı keship o't.
3 Denen' ashılıp, uyatlı jerin' ko'rinsin. Men o'sh alaman, hesh kimdi ayamayman».
4 A'mengerimiz – İzraildın' Muxaddesi, Onın' atı – A'lemnin' Jaratqan İyesi.
5 «Ha'y, kaldeylerdin' qızı, Qaran'g'ıg'a barıp, u'ndemey otır! Seni artıq: „Patshalıqlardın' xanımı“, – dep atamaydı.
6 Xalqıma qa'ha'rlendim, Miyrasımdı qorlap, Senin' qolın'a berdim, Sen de olarg'a rehim etpedin'. Ha'tte, g'arrılarg'a da, Ju'da' awır moyıntırıq taqtın'.
7 Sen: „Men ma'n'gige xanım bolaman“, – dedin'. Bularg'a dıqqat bermedin', Aqıbetinin' ne bolatug'ının oylamadın'.
8 Ha'y, ra'ha'tti su'yetug'ın, Qa'wipsizlikte jasap, ishinen: „Mine men, mag'an ten' keletug'ını joq, Men hesh qashan jesir bolıp otırmayman, Perzent dag'ın da ko'rmeymen“, – deytug'ın sen, Endi mınanı tın'la!
9 Bulardın' ekewi de bir ku'nde, Tosattan basın'a tu'ser: Perzentlerin'nen ayırılarsan', jesir qalarsan'. Sıyqırshılıqtın' ko'pligine, Duwaxanlıqtın' ullı ku'shine qaramastan, Olar ba'ri bir basın'a tu'sedi.
10 Sen o'z jawızlıg'ın'a isendin', „Meni hesh kim ko'rmeydi“, – dep oyladın'. Danalıg'ın' ha'm bilimin' seni joldan adastırdı. İshin'nen: „Mine men, mag'an ten' keletug'ını joq“, – dedin'.
11 Sonlıqtan apatshılıqqa ushıraysan', Sıyqırshılıq penen onnan qutıla almaysan'. Basın'a baxıtsızlıq tu'sedi, To'lem menen onı qaytara almaysan'. Oylamag'an wayranshılıq, Tosattan u'stin'e keledi.
12 Jaslıg'ın'nan beri shug'ıllanıp kelgen, Duwaxanlıg'ın' ha'm sansız sıyqırshılıg'ın'dı dawam et. Ba'lkim, olardan sag'an payda tiyer, Yaki olar menen birewdi qorqıtarsan'.
13 Ma'sla'ha'tlerdin' ko'pligi seni sharshattı. Juldızlardı izertlewshiler, Jan'a aydın' basında ne bolatug'ının aytatug'ınlar, Basın'a tu'setug'ın na'rselerden seni qutqarsın.
14 A'ne, olar sabang'a uqsaydı, Ot olardı jandıradı. Jalmag'an o'rtten o'zlerin de qutqara almaydı. Bul jılınatug'ın qoz da, Janında otıratug'ın jalın da emes.
15 Usılayınsha senin' menen miynet etip, Jaslıg'ın'nan aldı-sattı islegenlerdin' ha'r biri, Bası awg'an ta'repke rawana boladı, Seni hesh kim de qutqarmaydı».
