İyshaya 49 bob
1 Atawlar, Meni tın'lan'! Uzaqtag'ı xalıqlar, qulaq tu'rin'! Jaratqan İye meni ana qursag'ında bolg'an waqtımda-aq shaqırdı. Anamnın' ishinde waqtımda-aq atap atımdı qoydı.
2 Ol so'zimdi qılıshtay o'tkir qıldı, Meni qolının' sayasına jasırdı. Meni ushqır oq qıldı, O'zinin' oq qabında saqladı.
3 Ol mag'an: «Menin' qulımsan', İzrail, Men sen arqalı dan'qqa erisemen», – dedi.
4 Biraq men: «Miynetim zaya ketti, Bosqa, biyhuda ku'shimdi sarpladım, Ba'ri bir, Jaratqan İye haqımdı beredi, Quday miynetimnin' esesin qaytaradı», – dedim.
5 Yaqıptın' urpaqların Og'an qaytarıwım, İzraildı Onın' aldına jıynawım ushın, Qursaqta meni qa'liplestirip, O'zine xızmetshi qılg'an. Jaratqan İye so'yledi. Men Jaratqan İyenin' na'zerinde hu'rmetke eristim, Qudayım menin' ku'sh-qu'diretim boldı.
6 Ol bılay dedi: «Yaqıptın' tiyrelerin qayta tiklew, İzraildın' tiri qalg'anların qaytarıw ushın, Qulım bolıwın' jeterli emes, Seni milletlerge nur qılaman, Menin' qutqarıwım jerdin' shetine deyin jetip barsın».
7 İnsanlar kemsitip, xalıq jek ko'rgenge, Hu'kimdarlardın' qulına, İzraildın' A'mengeri, Onın' Muxaddesi, Jaratqan İye bılay deydi: «Patshalar seni ko'rip, ornınan turadı, Ko'semler jıg'ılıp, ta'jim qıladı, Seni tan'lag'an İzraildın' Muxaddesi, Sadıq Jaratqan İye haqı solay qıladı».
8 Jaratqan İye bılay deydi: «Miyrimim tu'sken waqıtta, Men sag'an juwap beremen, Qutqarılıw ku'ninde ja'rdem beremen. Seni qorg'ayman, Xalqım menen du'zgen kelisimimdi, Sen arqalı a'melge asıraman. Sen eldi qayta tiklep, Wayran bolg'an jerlerdi qayta iyeleysen'.
9 Tutqınlarg'a: „Shıg'ın'lar!“, Qaran'g'ılıqta bolg'ang'a: „Azatsan'!“, – deysen'. Olar jol jag'alarında otlaydı, Tap-taqır to'beshiklerde jaylaw tabadı.
10 Olar ash ta bolmaydı, sho'llemeydi de, Quwratıwshı samal da, quyash ta olarg'a zıyan tiygizbeydi. Miyrim ko'rsetiwshi olardı jetekleydi, Suw ko'zlerine alıp baradı.
11 Ha'mme tawlarımdı jolg'a aylandıraman, Da'rbent jollarımdı biyikletemen.
12 Mine, olar alıstan, Kimisi arqadan, kimisi batıstan, Kimisi Sinim* jerlerinen kiyatır.
13 Ko'kler, quwanısh penen baqırın'! Jer, shadlan! Tawlar, qosıq aytın'lar! Jaratqan İye O'z xalqın jubatıp, Azap shekkenlerge rehim etejaq.
14 Biraq Sion bılay deydi: „Jaratqan İye meni ta'rk etti, İyem meni umıttı“.
15 Ana emiziwli balasın umıta ma? O'zi tuwg'an balasına rehimi tu'spey me? Ha'tte, ana o'z balasın umıtsa da, Men seni umıtpayman.
16 Qara, atın'dı alaqanlarıma jazdım, Qıyralg'an diywalların' ba'rqulla ko'z aldımda.
17 Ulların' asıg'ıp keledi, Seni qırıp, wayran etkenler shıg'ıp ketedi.
18 Basın'dı ko'terip, aylanag'a qara, Ha'mmesi jıynalıp, sag'an kiyatır». Jaratqan İye bılay deydi: «Tiriligim haqı ant ishemen: Olardın' ha'mmesi sen ushın bezeniw buyımınday boladı, Kelinshektey olardı tag'ıp alarsan'.
19 Awa, jerin' wayranlanıp, bosap qalıp, Qarabaqanag'a aylang'an bolsa da, Endi jer xalqın'a tarlıq eter, Seni jalmap kelgenler sennen uzaqlasar.
20 Tutqın bolg'an waqıtta tuwılg'an balaların', Ele sag'an bılay deydi: „Bul jer bizlerge tarlıq etip atır, Jasaw ushın ko'birek jer ber“.
21 Sonda sen ishin'nen bılay dersen': „Bulardı mag'an kim tuwıp berdi? Men balalarımdı joytıp, na'silsiz bolıp qalg'an edim, Su'rgin etilip, qor bolg'an edim. Bulardı kim o'sirdi? Men jalg'ız o'zim qalg'an edim, Bular qaydan payda boldı?“»
22 Quday İye bılay deydi: «Men milletlerge qol menen belgi beremen, Xalıqlarg'a bayrag'ımdı ko'teremen. Olar ulların'dı qolına, Qızların'dı iynine ko'terip alıp keledi.
23 Patshalar sag'an a'kelik qılıp, Xanshalar sag'an su't beriwshi ana boladı. Olar aldın'da beti jerge tiygenshe iyilip ta'jim etedi, Ayaqların'dag'ı shan'dı artadı. Sonda sen Menin' Jaratqan İye ekenimdi, Mag'an u'mit baylag'anlar uyatqa qalmaytug'ının bilesen'».
24 Ku'shliden oljasın tartıp alıw mu'mkin be? Yamasa zalımnın' qolınan tutqın qutıla ala ma?
25 Biraq Jaratqan İye bılay deydi: «Awa, ku'shlinin' qolınan oljası tartıp alınadı, Zalımnın' oljaları qaytarıladı. Sag'an qarsı shıqqang'a, Men qarsı turaman, Balaların'dı qutqaraman.
26 Seni ezgenlerge o'z denesin jegizemen, Sharap ishkendey, o'z qanların iship ma's boladı. Sonda pu'tkil adamzat Menin' Jaratqan İye ekenimdi, Senin' Qutqarıwshın' ha'm A'mengerin' ekenimdi, Yaqıptın' Ku'shli Qudayı ekenimdi biledi».
