İyshaya 50 bob
1 Jaratqan İye bılay deydi: «Men anan'ızdı quwıp jibergen waqıtta bergen talaq xat qa'ne? Sizlerdi qarız alg'an adamımnın' qaysısına satıppan? Mine, sizler o'z jawız islerin'iz sebepli satıldın'ız, Sizlerdin' qılmısların'ız sebepli anan'ız quwıp jiberildi.
2 Kelgenimde, ne ushın hesh kim joq edi? Shaqırg'anımda, ne ushın hesh kim juwap bermedi. Sizlerdi azat etiw ushın qolım sonday-aq qısqa ma edi? Yamasa sizlerdi qutqarıwg'a Mende ku'sh joq pa? Bir aybat etsem, ten'iz qurıydı, Da'ryalardı sho'lge aylandıraman. Balıqlar suwsızlıqtan sasıp, sho'lden o'ledi.
3 Ko'klerge qara kiydiremen, Aza kiyimin olardın' japqıshı qılaman».
4 Sharshag'ang'a so'z benen ma'det bersin dep, Quday İye mag'an ta'lim berip, dana til berdi. Ha'r ku'ni tan'da Ol meni oyatıp, Sha'kirtlerdey tın'lasın dep, qulag'ımdı ashadı.
5 Quday İye qulag'ımdı ashtı, Men qarsı shıqpadım, ju'z burıp ketpedim.
6 Men o'zimdi urg'anlarg'a arqamdı, Saqalımdı julg'anlarg'a ju'zimdi tuttım. Masqaralag'anda da, tu'pirgende de ju'zimdi jasırmadım.
7 Quday İye mag'an ja'rdem bergenlikten, Men uyatqa qalmadım. O'zimdi miytindey bekkem tuttım, Bilemen, shermende bolmayman.
8 Meni aqlawshı janımda, Menin' menen kim dawlasadı? Kel, ju'zleseyik, Meni kim ayıplay aladı? Ol janıma kelsin!
9 Mag'an ja'rdem beriwshi – Quday İye, Kim meni gu'nalıg'a shıg'ara aladı? Olardın' ha'mmesi kiyimdey tozar, Olardı ku'ye jep qoyar.
10 Aran'ızda Jaratqan İyeden qorqıp, Onın' xızmetshisinin' dawısına qulaq salg'an bar ma? Qaran'g'ılıqta ju'rgenler, nurı bolmag'anlar, Jaratqan İyenin' atına u'mit baylap, Qudayına su'yensin!
11 Biraq ot jag'ıp, shıra uslag'an sizler, ha'mmen'iz, O'z otın'ızdın' jarıg'ında, Jaqqan shıraların'ızdın' jaqtısında ju're berin'. Menin' qolım sizlerge mınanı qıladı: Azap ishinde jatasız.
