İyshaya 51 bob
1 «Azatlıqqa umtılıp, Meni, Jaratqan İyeni izlegenler, Mag'an qulaq salın'lar! O'zlerin'iz kesip alıng'an jartasqa, O'zlerin'iz qazıp alıng'an tas ka'nine na'zer salın'.
2 A'ken'iz İbrayımg'a, O'zin'izdi tuwg'an Sarag'a na'zer salın'. Men onı shaqırg'anımda, ol jalg'ız edi, Men onı jarılqap, ko'beyttim.
3 Jaratqan İye bolg'an Men Siong'a, Onın' ha'mme qarabaqanalarına ta'selle beremen. Men Sionnın' sho'llerin Edendey, Dalan'lıqların Jaratqan İyenin' bag'ınday qılaman. Onda shadlıq ha'm quwanısh, Minnetdarshılıq ha'm qosıq dawısları esitiledi.
4 Xalqım, Mag'an dıqqat awdarın', Milletim, Mag'an qulaq tutın'! Nızam Mennen shıg'adı, A'dalatım xalıqlarg'a nur boladı.
5 Azat etiwim tez jaqınlaspaqta, Qutqarıwım jolg'a shıqtı. Qollarım xalıqlardı basqaradı, Atawlar Meni ku'tpekte, Qolımnın' ku'shine u'mit baylamaqta.
6 Basın'ızdı ko'terip, ko'klerge ko'z tigin', To'mende bolg'an jerge qaran', Ko'kler tu'tindey tarqap keter, Jer kiyim kibi tozar, Ondag'ı jasaytug'ınlar shıbınday o'lip keter. Biraq Menin' qutqarıwım ma'n'gi bolar, Menin' azat etiwim hesh qashan tamam bolmas.
7 A'dillikti bilgen, Nızamımdı ju'reginde saqlag'anlar, Meni tın'lan'! Adamlardın' abay etiwinen qorqpan', Olardın' g'arg'ag'anınan qa'weterlenben'.
8 Ku'ye olardı kiyim kibi, Qurtlar olardı ju'n kibi jeydi. Biraq Menin' azat etiwim ma'n'gige boladı, Menin' qutqarıwım a'wladtana'wladqa dawam etedi».
9 Oyan, oyan, ku'shke tol, Jaratqan İyenin' qolı! A'yyemgi waqıtlardag'ıday, a'welgi a'wladtag'ıday oyan! Rahabtı tilkimlegen, Sol ten'iz aydarhasının' denesin tesken Sen emes pe edin'?
10 Ten'izdi, teren' tun'g'ıyıqtın' suwların qurıtqan Sen emes pe edin'? Qutqarılg'anlar o'tsin dep, Ten'iz tu'bin jol qılg'an Sen emes pe edin'?
11 Jaratqan İyenin' azat etkenleri izge qaytadı, Qosıq aytıp, Siong'a qaytıp keledi. Olar ma'n'gilik quwanısh tajın baslarına kiyedi. Quwanısh ha'm shadlıqqa tolıp-tasıp, Qayg'ı ha'm g'am-ta'shiwish qashıp ketedi.
12 Jaratqan İye bılay deydi: «Sizlerdi jubatatug'ın Menmen. Ne ushın basında o'limi bar insannan, Sho'ptey solıp qalatug'ın adamnın' ulınan qorqasan'?
13 Sen o'zin'di jaratqan, ko'klerdi jayg'an, Jerdin' tiykarın qoyg'an, Jaratqan İyeni, Jaratıwshın'dı nege umıttın'? Seni joq qılıw niyetinde bolg'an, Eziwshinin' g'a'zebinen nege ku'ni boyı qorqasan'? Qa'ne, eziwshinin' g'a'zebi qayda?
14 Tez arada tutqınlar azat etiledi, Olar o'lmeydi, qa'birge de tu'speydi, Nang'a da zar bolmaydı.
15 Tolqınları shuwıldasın dep, ten'izdi shayqag'an, Qudayın' Jaratqan İye Men bolaman. Menin' atım A'lemnin' Jaratqan İyesi.
16 So'zlerimdi awzın'a saldım, Seni qolımnın' sayasında jasırdım. Ko'klerdi ornatqan, Jerdin' tiykarın qoyg'an, Siong'a: „Sen Menin' xalqımsan'“ degen Men bolaman».
17 Oyan, ha'y, Erusalim, oyan, ayaqqa tur! Jaratqan İyenin' g'a'zep kesesin Onın' qolınan ishtin', Tu'bine deyin iship, tentireklep ju'rdin'.
18 O'zin' tuwg'an ulların'nın' ishinde, Seni jetekleytug'ın birewi de joq. O'zin' o'sirgen ulların'nın' ishinde, Qolın'nan uslap, su'yeytug'ın birewi de joq.
19 Basın'a qos apat tu'sti, Kim sag'an ta'selle beredi? Nabıt bolıw, wayranshılıq, ashlıq ha'm qılısh, Kim seni jubata aladı?
20 Ulların' esten tanıp, Torg'a tu'sken antilopaday bolıp, Ha'r ko'shenin' basında jatır. Olar Jaratqan İyenin' g'a'zebine, Qudayın'nın' qa'ha'rine ushırag'an.
21 Sonlıqtan azap shekken, Sharapsız ma's bolg'anlar, mınag'an qulaq salın'!
22 İyen', O'z xalqın qorg'aytug'ın Qudayın' Jaratqan İye bılay deydi: «Mine, Men seni tentirekletetug'ın keseni qolın'nan aldım, Bunnan bılay, Menin' g'a'zep kesemnen ishpeysen'.
23 Onı seni ja'birlegenlerdin' qolına beremen. Olar sag'an: „Jerge jat, u'stin'nen basıp o'teyik“, – dedi, Sonda sen arqan'dı tutıp, jerdey, Olar o'tetug'ın ko'shedey qıldın'».
