1 Bizlerge jiberilgen xabarg'a kim isendi? Jaratqan İyenin' ku'sh-qu'direti kimge ayan boldı?
2 Jaratqan İyenin' qulı Onın' aldında na'ldey, Qurg'aq jerdegi tamırday o'sip shıqtı. Bizler og'an qarag'anday, Onda sın-sımbat ta, ullılıq ta bolmadı, O'zine tartqanday ko'rinis te joq edi.
3 Ol adamlar ta'repinen kemsitildi, onnan ju'z burıldı. Ol qayg'ının', azap-aqırettin' ne ekenin biletug'ın edi. Adamlar onnan betin jasıratug'ınday da'rejede ol kemsitildi, Onı biz adam qatarında ko'rmedik.
4 Haqıyqatında ol, bizlerdin' keselliklerimizdi o'zine aldı, Awırmanlıg'ımızdı ko'terdi. Bizler bolsa, onı Quday ta'repinen jazalanıp, Urılıp, azap shegip atır, dep oyladıq.
5 Al ol bizlerdin' qılmıslarımız ushın jaraqatlandı, Bizlerdin' jınayatımız ushın azap shekti. Tınıshlıq alıwımız ushın beriletug'ın jazanı ol aldı, Onın' jaraları bizlerge shıpa berdi.
6 Bizlerdin' ha'mmemiz qoylarday joldan adastıq, Ha'r birimiz o'z jolımızdan kettik. Jaratqan İye og'an ha'mmemizdin' qılmısımızdı ju'kledi.
7 Ol ezilip, azap shekse de, awzın ashpadı, Soyılıwg'a alıp baratırg'an qozı kibi, Ju'n qırqıwshının' aldında u'nsiz jatqan qoy kibi, Hesh awzın ashpadı.
8 Ol nahaq hu'kim menen alıp ketildi. Xalqımnın' jınayatı ushın azaplanıp, Tiriler a'leminen shıg'arıp taslandı. Onın' zamanlaslarınan qaysı biri bunı bildi?
9 Ol zalım da bolmag'an, Awzınan jalg'an so'z de shıqpag'an bolsa da, Onın' qa'biri zalımlar janınan belgilendi, Bay adamnın' qasına qoyıldı.
10 Onın' ja'birlenip, azap shegiwi Jaratqan İyenin' qa'lewi edi. Onın' janı gu'na ushın qurbanlıq etip berilgen waqıtta, Ol o'z urpaqların ko'rip, o'miri uzayadı. Ol arqalı Jaratqan İyenin' erki orınlanadı.
11 Jan azabınan son' ol nurdı ko'redi, O'z bilimi arqalı qanaatlanadı. Menin' a'dil qulım ko'plerdi aqlaydı, Olardın' qılmısların o'zine aladı.
12 Sonlıqtan ullılar qatarında og'an pay beremen, Ku'shliler menen olja bo'lisedi. O'ytkeni ol janın qurban etti, Jınayatshılar qatarında sanaldı, Ko'plerdin' gu'nasın o'zine aldı, Qılmısshılar ushın arag'a tu'sti.
