İyshaya 55 bob
1 «Sho'llegenlerdin' ha'mmesi, suw ko'zlerine kelin'ler! Aqshası joqlar da kelip, awqat alıp jen'ler! Kelin'ler, sharap ha'm su't alın'lar, Biypul, esheyin!
2 Ne ushın aqshan'ızdı nan bolmag'an na'rsege, Miynetin'izdi o'zlerin'izdi qanıqtırmaytug'ın na'rsege sarplaysızlar? Meni qunt penen tın'lap, jaqsı na'rseni jen'ler, Janın'ız toyımlı awqatlardan la'zzet alsın!
3 Qulaq tu'rin'ler ha'm Mag'an kelin'ler, Tın'lan'lar, sonda jasaysız. Dawıtqa bolg'an sadıq su'yispenshiligim haqı, Sizler menen ma'n'gilik kelisim du'zbekshimen.
4 Mine, Men onı xalıqlarg'a gu'wa, Ko'sem ha'm sa'rdar qıldım.
5 Sen tanımag'an xalıqlardı shaqırasan', Seni tanımag'an xalıqlar sag'an keliwge asıg'adı. Sebebi İzraildın' Muxaddesi, Qudayın' Jaratqan İye bolg'an Men, Seni ullılıqqa bo'legenmen».
6 Tabıwg'a pursat barda, Jaratqan İyeni izlen', Jaqın jerde eken, Onı shaqırın'.
7 Zalım o'z jolınan, Jawız adam o'z niyetinen qaytsın. Jaratqan İyege ju'z bursın, Jaratqan İye rehim eter, Qudayımızg'a qaytsın, Onın' keshirimi sheksiz!
8 «Menin' pikirlerim sizlerdikinen o'zgeshe, Menin' jolım sizlerdikinen basqa, – deydi Jaratqan İye.
9 – Aspan jerden qansha joqarı bolsa, Menin' jollarım da sizlerdikinen sonsha joqarı, Menin' oy-pikirlerim de sizlerdikinen ju'da' biyik.
10 Aspannan jawg'an jawın menen qar, Aspang'a qaytpaydı. Al jerdi suwg'arıp, o'simlik ko'gertip o'siredi, Egiw ushın da'n, jew ushın nan beredi.
11 Menin' awzımnan shıqqan so'z de sog'an uqsaydı: Ol orınlanbay, Mag'an qaytpaydı. Ol Menin' erkimdi orınlaydı, Nege jibergen bolsam, sol a'melge asadı+.
12 Sonlıqtan sizler quwanısh penen shıg'asızlar, Paraxatshılıq penen jetelenesizler. Tawlar ha'm to'beshikler aldın'ızda qosıq aytıp, Daladag'ı barlıq ag'ashlar qol shappatlaydı.
13 Tikenli puta ornına sa'rwi ag'ashı, Tikenektin' ornına mirta ag'ashı o'sedi. Bul Jaratqan İyenin' dan'qın asıratug'ın, So'nbeytug'ın ma'n'gi belgi boladı».
