İyshaya 56 bob
1 Jaratqan İye bılay deydi: «A'dalattı saqlan', tuwrı bolg'an islerdi islen', Sebebi tez arada Menin' qutqarıwım kelip, Azat qılıwım ayan boladı.
2 Mınalardı bekkem ustanatug'ın adam, qanday baxıtlı! Bunday adam Shabbat ku'nine a'mel qıladı, onı qorlamaydı, Qolın jawız islerden tıyadı.
3 Jaratqan İyege bag'ıshlang'an jat jerlilerdin' hesh biri: „Jaratqan İye meni O'z xalqınan birotala ayırıp taslaydı“, – demesin. Hesh bir aqta da: „Men tek bir quwrap qalg'an terekpen“, – dep aytpasın».
4 Sebebi Jaratqan İye bılay deydi: «Shabbat ku'nime a'mel qılıwshı, Mag'an unag'an na'rselerdi tan'lawshı, Kelisimime sadıq bolg'an aqtalarg'a,
5 İbadatxanamda, diywallarımnın' ishinde, Ullarım menen qızlarımnan da go're jaqsıraq, Estelik belgi ha'm at beremen. Men olarg'a jog'almaytug'ın, ma'n'gilik bir at beremen.
6 Jaratqan İyege xızmet etiw, Onın' atın su'yiw, Onın' qulı bolıw ushın, Jaratqan İyege o'zin bag'ıshlag'an jat jerlilerdi, Shabbat ku'nine a'mel qılıp, onı qorlamag'anlardı, Kelisimimdi bekkem saqlag'anlardı,
7 Muxaddes tawıma alıp kelemen. Duwa etetug'ın İbadatxanamda olardı quwanıshqa bo'leymen. Olardın' jandırılatug'ın qurbanlıqları ha'm basqa qurbanlıqları, Qurbanlıq ornımda qabıl etiledi. Menin' U'yim barlıq xalıqlar ushın, Duwa etiletug'ın u'y dep ataladı».
8 İzraildın' quwg'ın bolg'anların jıynap alatug'ın, Quday İye bılay deydi: «Men jıynag'anlarıma qosa, Basqalardı da jıynayman».
9 Ha'y, daladag'ı jabayı haywanlar, Ha'y, tog'aydag'ı jabayı haywanlar, Kelip, jen'ler!
10 İzraildın' gu'zetshileri soqır, Olardın' ha'mmesi nadan, Barlıg'ı u'rmeytug'ın tilsiz iytler, Olar jatıp alıp, tu's ko'redi, Uyqını jaqsı ko'redi.
11 Olar toyg'anın bilmeytug'ın ashko'z iytler. Aqılsız shopanlardın' ha'r biri, O'z paydasın go'zlep, O'z jolınan ketedi.
12 Olar: «Kelin', sharap isheyik! O'tkir ishimlikke toyayıq! Erten' de bu'gingidey boladı, Ha'tte, bunnan da jaqsıraq bolar», – deydi.
