İyshaya 58 bob
1 «Dawısın'dı qıspay, qattı baqır! Dawısın' ka'rnaydın' sestindey bolıp shıqsın! Xalqıma qılmısların, Yaqıptın' na'siline gu'naların ja'riyala!
2 Olar ha'r ku'ni Meni izler, Jollarımdı biliwden zawıq almaqshımısh! Tuwrı is islegen, Qudaydın' ko'rsetpelerinen ju'z burmag'an xalıq kibi, Mennen a'dil qarar soraydı, Qudayg'a jaqın bolıwdı a'rman etedi.
3 Olar: „Bizler oraza tuttıq, Sen nege ko'rmedin'? O'zimizdi boysındırdıq, Nege itibar bermedin'?“ – deydi. Qara, sizler oraza tutqan ku'nin'izdin' o'zinde, Qa'legenin'izdi qılıp, Jumısshıların'ızdı ezesiz.
4 Qaran', oraza tutıp atırıp daw-ja'njel qılasız, Zorlıq penen mush ko'teresiz. Bu'gingidey oraza menen, Dawısın'ızdı joqarıg'a esittire almaysız.
5 Men qa'legen oraza, Adam o'zin boysındırg'an ku'n usınday bola ma? Qamıs kibi basın'ızdı iyip, Aza kiyimin kiyip, ku'lge jatıwdı, Oraza, yag'nıy Jaratqan İyege unaytug'ın ku'n dep ataysız ba?
6 Men qa'legen oraza, A'dalatsızlıq shınjırların sheshiw, Moyıntırıq jiplerin u'ziw, Ezilgenlerdi azat etiw, Ha'r qanday moyıntırıqtı sındırıw emes pe?
7 Nanın'dı ash penen bo'lisip jep, U'ysiz jarlılarg'a u'yin'nen orın beriw emes pe? Jalan'ashtı ko'rgende kiyim berip, Jaqınların'nan ja'rdemin'di ayamaw emes pe?
8 Sonda nurın' shug'la kibi jarqırap, Tez shıpa tabasan'. A'dilligin' aldın'da ju'rip, Jaratqan İyenin' saltanatı izin'de qorg'anın' boladı.
9 Keyin shaqırsan', Jaratqan İye juwap beredi, Pa'riyad etsen', Ol: „Men mındaman“, – deydi. Aran'ızdan moyıntırıqtı alıp taslap, Barmaq shoshaytıp ko'rsetiwdi ha'm o'sekti toqtatsan',
10 Ashlar ushın janın'dı pida' etsen', Qıynalg'anlardı mu'ta'j zatı menen ta'miyinlesen', Onda qaran'g'ılıqta nurın' sa'wle shashıp, Tas tu'negin' tu'ski waqıttay boladı.
11 Jaratqan İye seni ba'rqulla jetekleydi, Qurg'aq jerde de keregin' menen ta'miyinleydi. Su'yegin'e quwat beredi. Sen suwg'arılg'an bag' kibi, Suwı qurımaytug'ın bulaq kibi bolasan'.
12 Eski qarabaqanaların' qayta tiklener, Ko'p urpaqlardan qalg'an, Qarabaqanalardın' tiykarın qayta tikleysen'. Sen: „Qıyrag'an diywallardı on'laytug'ın, Jasaw ushın ko'shelerdi qayta tikleytug'ın“, – dep atalasan'.
13 Shabbat ku'nin ayaq astı qılıwdan, Muxaddes ku'nimde qa'legenin'di qılıwdan saqlansan', Shabbat ku'nimdi zawıqlı, Jaratqan İyenin' muxaddes ku'nin hu'rmetli dep atasan', O'zin'e unag'anın islep, Keypisapanı izlemesen', Bos so'zlerdi so'ylemesen', Sol ku'ndi hu'rmetlesen',
14 Sonda Jaratqan İyeden zawıq alasan'. Men seni du'nyanın' ba'lentliklerine shıg'arıp, A'ken' Yaqıptın' miyrasın sag'an beremen». Bunı Jaratqan İye aytadı.
