İyshaya 59 bob
1 Bilip qoyın', Jaratqan İyenin' qolı qutqara almaytug'ınday qısqa emes, Qulag'ı da esitpeytug'ınday, awır emes.
2 Qılmısların'ız Qudayın'ız benen aran'ızg'a suwıqlıq saldı, Gu'naların'ız Onın' ju'zin sizlerden jasırdı, Sonlıqtan Ol sizlerdi esitpeydi.
3 Qolların'ız qan menen, Barmaqların'ız qılmıs penen haramlandı. Awzın'ız jalg'an aytıp, Tilin'iz o'tirik so'zler so'yleydi.
4 Hesh kim a'dillikke shaqırmaydı, Hesh kim hadal dawlaspaydı. O'zlerinin' bos so'zlerine su'yenip, jalg'an so'yleydi, Buzg'ınlıqqa ha'miledar bolıp, jawızlıq tuwadı.
5 Olar uwlı jılannın' ma'yegin qurıq basadı, O'rmekshinin' awın toqıydı. Olardın' ma'yegin jegen o'ledi, Sıng'an ma'yekten za'ha'rli jılan shıg'adı.
6 Aw toqıg'an menen hesh na'rsege erispeydi, Du'zgen jobaları paydasız. Olardın' isleri jaramas isler, Qolları zorlıq qılar.
7 Ayaqları jamanlıqqa juwırar, Biygu'na qan to'giwge asıg'ar. Oyları jawızlıqqa tolı, Talan-taraj ha'm qırg'ın bar jollarında.
8 Sol jollardan ju'retug'ınlar, Tınıshlıqtın' ne ekenin bilmeydi. A'dalat joq jollarında, O'zlerine qıysıq jollar isledi, Tınıshlıqtın' ne ekenin bilmeytug'ınlar, Sol jollardan ju'redi.
9 Sonlıqtan a'dalat bizden uzaqta, A'dillik bizge jetip kelmedi. Nurdı ku'temiz, biraq tek qaran'g'ılıq bar, Jaqtılıq izleymiz, biraq tu'nekte ju'remiz.
10 Soqırdın' diywaldı sıypalag'anına uqsap, Ko'zli kibi qarmalanamız, Ku'pa'-ku'ndiz ımırt jabılg'anday su'rnigemiz, Ku'shliler arasında o'lideymiz.
11 Ha'mmemiz ayıwlar kibi baqıramız, Kepterler kibi shırıldaymız. A'dalattı ku'ttik, biraq ol joq, Qutqarılıwdı ku'ttik, biraq ol bizden alısta.
12 Aldın'da qılmıslarımız ko'p, Gu'nalarımız bizge qarsı gu'walıq bermekte. Qılmıslarımız ko'z aldımızda, Ayıplarımızdı o'zimiz bilemiz.
13 Boysınbay, Jaratqan İyeni ta'rk ettik, Qudayımızdan ju'z burdıq, Zulımlıq penen so'yledik, bas ko'terdik, Ju'regimiz ha'miledar bolg'an jalg'andı so'yledik.
14 A'dalat shegindi, a'dillik uzaqta qaldı. Haqıyqat qala maydanında quladı, Hadallıq aramızg'a kire almaydı.
15 Hesh jerde haqıyqat joq, Zulımlıqtan bas tartqan talanadı.Jaratqan İye bunı ko'rip, A'dalattın' joqlıg'ına qapa boldı.
16 Jaratqan İye hesh kimnin' joqlıg'ın ko'rdi, Aralasatug'ın hesh kimnin' joqlıg'ına hayran qaldı. O'z qolı Onı jen'iske eristirdi, A'dilligi Og'an su'yenish boldı.
17 Ol a'dillikti sawıt kibi kiydi, Qutqarılıw duwlıg'asın basına kiydi. O'sh alıwdı Ol kiyim kibi kiyip alıp, G'a'zepti shapan kibi jamıldı.
18 l ha'r kimge isine jarasa jaza beredi. Dushpanlarına qa'ha'rin to'gip, Jawlarına jazasın tartqızadı. Ha'tte, shetki atawlarg'a da esesin qaytaradı.
19 Batıstag'ılar Jaratqan İyenin' atınan, Shıg'ıstag'ılar Onın' dan'qınan qorqadı. Sebebi Ol burqasınlag'an da'ryaday, Jaratqan İyenin' demi onı quwıp shıg'adı.
20 Jaratqan İye bılay deydi: «Men A'mengeri sıpatında Siong'a, Yaqıptın' urpaqlarının' ta'wbe qılg'anlarına kelemen».
21 «Mag'an kelsek, olar menen du'zetug'ın kelisimim mınaw: Sag'an bergen Ruwxım ha'm awzın'a salg'an so'zim bu'ginnen baslap ma'n'gige senin' de, balaların'nın' da, balaların'nın' balalarının' da awzınan tu'speydi», – deydi Jaratqan İye.
