İyshaya 60 bob

Erusalimnin' saltanatlı keleshegi (1-22).

¹ «Tur, jarqıra, senin' nurın' keldi, Jaratqan İyenin' saltanatı u'stin'e shashıldı.

² Mine, jer ju'zin qaran'g'ılıq, Xalıqlardı tas tu'nek qapladı. Biraq senin' u'stin'de Jaratqan İye jarqırap, Onın' ullılıg'ı ko'rinedi.

³ Milletler senin' nurın'a, Patshalar tan' nurın'nın' shug'lasına keledi.

⁴ Basın'dı ko'terip, aylanag'a qara, Ha'mmesi jıynalıp, sag'an kiyatır. Ulların' uzaqlardan keler, Qızların'dı qollarında ko'terip a'keler.

⁵ Sonda olardı ko'rip, ju'zin' jarqırar, Shadlıqtan ju'regin' ha'wlirer. Sebebi ten'iz arqalı keletug'ın baylıqlar sag'an nesip eter, Xalıqlardın' baylıqları sag'an keler.

⁶ Tu'ye ka'rwanı jerin'di qaplap keter, Midyan ha'm Efadan kelgen jas tu'yeler ka'rwanına tolarsan'. Olardın' ha'mmesi Shebadan keler, Altın ha'm xosh iyisli zatlar alıp kelip, Jaratqan İyege alg'ıslar aytar.

⁷ Kedardın' barlıq su'riwleri sende jıynalar, Nebayottın' qoshqarları sag'an xızmet eter, Olar qurbanlıq ornımda qurbanlıqqa qabıl etiler, Men saltanatlı u'yimdi dan'qqa bo'leymen.

⁸ Bultqa uqsap, Uyasına kiyatırg'an kepterge uqsap, ushıp kiyatırg'an mınalar kimler?

⁹ Atawlar meni ku'tedi. Qudayın' Jaratqan İye, İzraildın' Muxaddesi hu'rmeti, Tarshish kemeleri birinshilerden bolıp, Ulların'dı alıslardan, Gu'mis ha'm altını menen birge alıp keledi. Sebebi Jaratqan İye seni dan'qqa bo'ledi.

¹⁰ at jerliler diywalların'dı qurar, Patshaları sag'an xızmet eter. G'a'zeplengenimde, seni jazalag'an bolsam da, Miyrimim tu'skende, rehim etemen.

¹¹ Da'rwazaların' mudamı ashıq bolar, Olar ku'ni-tu'ni jabılmas. Milletler o'z patshaları menen su'rgin qılınıp, Baylıqların sag'an alıp kele beredi.

¹² Sag'an xızmet etpegen millet ha'm patshalıq joq bolar, Bunday xalıqlar pu'tkilley wayran qılınar.

¹³ Muxaddes u'yimdi bezew ushın, Lebanonnın' sa'nli ag'ashları: Sa'rwi, shınar ha'm qarag'ay ag'ashları sag'an alıp keliner. Men ayaq basqan jerimdi saltanatlı qılaman.

¹⁴ Sag'an ja'bir qılg'anlardın' balaları kelip, Sag'an ta'jim etedi. Seni kemsitkenlerdin' ha'mmesi ayag'ın'a jıg'ıladı. Seni Jaratqan İyenin' qalası, İzraildın' Muxaddesinin' Sionı dep ataydı.

¹⁵ Ta'rk etilip, jek ko'rinshi boldın', Sen arqalı hesh kim o'tpedi. Biraq Men seni ma'n'gige ullı qılıp, A'wladtan-a'wladqa shadlıqqa bo'leymen.

¹⁶ Milletler seni ana kibi emizer, Patshalar sag'an ko'kirek su'tin berer. Sonda sen Menin' Jaratqan İye – Qutqarıwshın', A'mengerin', Yaqıptın' Ku'shli Qudayı ekenimdi bilesen'.

¹⁷ Sag'an qola ornına altın, Temir ornına gu'mis, Ag'ash ornına qola, Tas ornına temir beremen. Paraxatshılıqtı ha'kimin', A'dillikti hu'kimdarın' qılaman.

¹⁸ Jerin'de bunnan bılay zorlıq-zombılıq, Shegaran' ishinde qırg'ın ha'm wayranshılıq esitilmeydi. Diywalların'dı „Qutqarılıw“, Da'rwazaların'dı „Alg'ıs“ dep ataysan'.

¹⁹ Sag'an ku'ndiz quyash nurı, Tu'nde ay sa'wlesi ha'jet bolmaydı. O'ytkeni Jaratqan İye senin' ma'n'gi nurın' boladı, Qudayın' senin' ullılıg'ın' boladı.

²⁰ Bunnan bılay, quyashın' batpas, Ayın'nın' da sa'wlesi o'shpes. O'ytkeni Jaratqan İye senin' ma'n'gi nurın' bolar, Qayg'ılı ku'nlerin' tamam bolar.

²¹ Pu'tkil xalqın' a'dil bolıp, Jerdi ma'n'gi iyeler. Ullılıg'ımdı ayan qılıw ushın, Men olardı ektim, olar Menin' qollarımnın' isi.

²² Olardın' en' azı – mın' adamg'a, En' kishkenesi – ku'shli milletke aylanar. Men – Jaratqan İyemen. O'z waqtında, bunı tez a'melge asıraman».