İyshaya 61 bob
1 Quday İyenin' Ruwxı menin' u'stimde. Ol meni jarlılarg'a xosh xabar ja'riyalaw ushın mayladı. Meni jaralı ju'reklerdi emlewge, Tutqınlardın' azatlıqqa, Qamaqtag'ılardın' erkinlikke shıg'atug'ının,
2 Jaratqan İyenin' miyrim jılın, Qudayımızdın' o'sh alatug'ın ku'nin ja'riyalawg'a, Barlıq qayg'ıg'a batqanlarg'a jubanısh beriwge,
3 Sionda qayg'ı basqanlarg'a g'amxorlıq qılıwg'a, Ku'l ornına sa'nli taj, Qayg'ı ornına shadlıq mayın, G'amlı ruwx ornına alg'ıs tonın beriwge jiberdi. Olar Jaratqan İyenin' dan'qın ko'rsetiw ushın egilgen, A'dillik terebinfleri dep ataladı.
4 Olar a'yyemgi qarabaqanalardı qayta qurıp, Eski qıyrag'an orınlardı qayta tikleydi. A'wladtan-a'wladqa wayran bolıp, Qıyrap qalg'an qalalardı abat qıladı.
5 Jat jerliler sizlerdin' su'riwlerin'izdi bag'ıp, Shet elliler diyxan ha'm bag'manın'ız boladı.
6 Sizler bolsa, Jaratqan İyenin' ruwxaniyleri, Qudayımızdın' xızmetshileri dep atalasız. Sizler milletlerdin' baylıg'ınan la'zzet alıp, Olardan alg'an qaznalarg'a maqtanasız.
7 Burın uyatqa qalg'anın'ız ushın esesin alasız, Qorlıq ornına alg'an jer u'lesin'iz ushın shadlanasız. O'z jerin'izden eki ese u'les alasız, Ma'n'gilik quwanısh sizlerdiki boladı.
8 «Men, Jaratqan İye a'dalattı su'yemen, Talanshılıq ha'm nahaqlıqtı jek ko'remen. Sadıqlıq penen ılayıqlı sıyın berip, Olar menen ma'n'gilik kelisim du'zemen.
9 Olardın' a'wladları milletler arasında, Urpaqları xalıqlar arasında tanımalı boladı, Olardı ko'rgenlerdin' ha'r biri, Jaratqan İye jarılqag'an xalıq ekenin an'laydı».
10 Men Jaratqan İyede shadlanaman, Janım Qudayımda yoshlanar. O'ytkeni Ol mag'an qutqarılıw kiyimin kiygizdi. Mag'an a'dillik shapanın japtı. Men taj kiygen ku'yewge, Bezeniw buyımların taqqan kelinge uqsayman.
11 Topıraqtın' o'simlikti shıg'arg'anı kibi, Bag'dın' egilgen na'rselerdi o'sirgeni sıyaqlı, Quday İye de a'dillik ha'm alg'ıstı, Pu'tkil milletlerdin' ko'z aldında o'sirdi.
