İyshaya 62 bob
1 A'dilligi nur kibi, Qutqarılıwı shom kibi parlap janbag'ansha, Sion haqı u'ndemey qalmayman, Erusalim haqı tınısh turmayman.
2 Milletler a'dilligin'di, Barlıq patshalar ullılıg'ın'dı ko'redi. Sen Jaratqan İye O'z awzı menen qoyatug'ın, Taza at penen atalasan'.
3 Sen Jaratqan İyenin' qolındag'ı go'zzallıq gu'ltajı, Qudayın'nın' qolındag'ı patshalıq tajı bolasan'+.
4 Endi sag'an «Ta'rk etilgen», dep aytpas, Jerin'di «Qan'ırap qalg'an», dep atamas. Biraq sag'an «Su'yiklim», Jerin'e «Kelinshegim», delinedi. Sebebi Jaratqan İye seni su'yedi, Jerin' de xojalıqlı boladı.
5 Jigittin' qızg'a u'ylengenindey, Ulların' da sag'an iyelik etedi. Ku'yewdin' kelin ushın quwang'anı sıyaqlı, Qudayın' da sen ushın quwanadı.
6 Ha'y Erusalim, diywalların'a gu'zetshiler qoydım, Olar ku'ni-tu'ni u'nsiz qalmas. Ha'y, Jaratqan İyeni eske alıwshılar, O'zlerin'izge tınıshlıq bermen'.
7 Erusalimdi bekkemlep, Onı jer ju'zinin' dan'qı qılmag'ansha, Jaratqan İyege tınıshlıq bermen'.
8 Jaratqan İye on' qolı, Qu'diretli qolı menen ant ishti: «Endi g'a'llen'di dushpanların'a azıq ushın bermeymen, Jat elliler miynetin' sin'gen sharabın'nan ishpeydi.
9 Zu'ra'a'tin jıynag'anlar jep, Jaratqan İyege alg'ıs aytadı, Ju'zimin jıynag'anlar, Muxaddes ha'wlilerimde sharabın ishedi».
10 Kelin'ler, kelin'ler, da'rwazalardan shıg'ın'lar! Qaytıp kiyatırg'an xalıqqa jol tayarlan'lar. Biyik etip jol salın'lar! Taslardı alıp taslan'lar! Xalıqlar ushın bayraq tigin'ler!
11 Jaratqan İye jerdin' to'rt ta'repine ja'riyaladı: «Qız Siong'a bılay dep aytın'lar: „Mine, Qutqarıwshın' kiyatır! 2 Onın' sıyı janında, inamı aldında!“»
12 Turg'ınların' «Jaratqan İye qutqarg'an muxaddes xalıq», dep ataladı. O'zin' «Quday izlep tapqan, ta'rk etilmegen qala», dep atalasan'.
