İyshaya 65 bob
1 «Men soramag'anlarg'a O'zimdi ayan ettim, İzlemegenler Meni taptı, Atımdı aytıp shaqırmag'an milletke: „Men mındaman, Men mındaman“, – dedim.
2 O'z qa'lewlerine erip, Nadurıs joldan ju'rgen, Qaysar bir xalıqqa, Ku'ni boyı qushag'ımdı ashıp turdım.
3 Ol xalıq bag'larda butlarg'a qurbanlıq berip, Gerbishtin' u'stinde tu'tetki tu'tetip, Ju'zime tik qarap turıp, U'zliksiz g'a'zebimdi keltiredi.
4 Olar qa'birler arasında otırıp, Tu'ndi sırlı jerlerde o'tkeredi. Shoshqa go'shin jep, Qazanlarında haram go'sh qaynatadı.
5 Olar: „Arı tur, jaqınlama, Men sen ushın ju'da' muxaddespen“, – deydi. Olar murnıma ashshı tu'tindey bolıp, Ku'ni boyı pısqıp janıp turg'an otqa megzeydi.
6 Mine, aldımda bılay dep jazılg'an: „Men u'ndemey qalmayman, İsine jarasa qaytaraman, so'zsiz qaytaraman.
7 ine jarasa qaytaraman, so'zsiz qaytaraman+. 7Olardı o'zlerinin' ha'm ata-babalarının' gu'naları ushın jazalayman. Olar tawlarda tu'tetki tu'tetti, To'belerde Meni xorladı. Olardın' islegen islerin o'lshep, esesin qaytaraman“». Jaratqan İye usılay deydi.
8 Jaratqan İye ja'ne bılay deydi: «Ju'zim solqımında ele shire bar gezde, Birew: „Onı zayalama, bereket sonda g'oy“, – deydi. Men de qullarım haqı solay isleymen, Ha'mmesin qırıp taslamayman.
9 Men Yaqıptan jan'a a'wlad, Yahudadan tawlarımnın' miyrasxorların o'rbitemen. Tan'lag'anlarım olardı miyras etip, Qullarım sol jerde jasaydı.
10 Meni izlegen xalıq ushın, Sharon su'riwlerine jaylaw, Axor oypatlıg'ı mallarına tınıg'atug'ın orın boladı.
11 Biraq sizler, Jaratqan İyeni ta'rk etkenler, Muxaddes tawımdı umıtqanlar, Tabıs degen qudayg'a dasturxan jayg'anlar, Ta'g'dir degen butqa toltırıp sharap quyıp bergenler,
12 Men sizlerdin' ta'g'dirin'izge qılıshtı jazaman. Ha'mmen'iz qılıshtan qırılasız. Sebebi shaqırg'anımda, juwap bermedin'iz, So'ylegenimde, qulaq salmadın'ız. Ko'z aldımda jawızlıq islep, Mag'an unamag'an islerdi tan'lap isledin'iz».
13 Sol sebepli Quday İye bılay deydi: «Mine, qullarım jeydi, sizler ash qalasız. Mine, qullarım ishedi, sizler sho'lleysiz. Mine, qullarım shadlanadı, Sizler bolsan'ız shermende bolasız.
14 Mine, qullarımnın' ju'regi shadlanıp, qosıq aytadı, Sizler ju'rek da'rtinen dad salıp, Ruwxıy azap penen pa'riyad etesiz.
15 Menin' tan'lap alg'anlarım ushın, Atın'ızdı g'arg'ıs sıpatında qaldırasız. Quday İye sizlerdi o'limge hu'kim etip, O'z qullarına basqa at beredi.
16 Elde pa'tiya bergen ha'r bir adam, Haqıyqat Qudayının' atı menen pa'tiya beredi, Elde ant ishken ha'r bir adam, Haqıyqat Qudayı menen ant ishedi. Burıng'ı qapashılıq umıtılıp, Qaytıp ko'zime tu'speytug'ın boladı».
17 «Mine, Men jan'a aspan ha'm jan'a jer jarataman. Burıng'ılar endi yadqa alınbas, oyg'a da kelmes.
18 Jaratqanlarıma ma'n'gige quwanıp, shadlanın'. O'ytkeni Men Erusalimdi shadlıq ushın, Xalqın quwanıshqa toltırıw ushın jarataman.
19 O'zim de Erusalim ushın quwanıp, Xalqım ushın shadlanaman. Endi ol jerde jılag'an da, dad salg'an da ses esitilmes.
20 Artıq onda na'resteler qaza tappas, Uzaq o'mir su'rmegen g'arrı da bolmas. Ju'z jasta o'lgen jas sanalar, Ju'z jasqa jetpey o'lgen g'arg'ıs urg'an esaplanar.
21 Olar u'yler qurıp, onda jasar, Ju'zimzarlar otırg'ızıp, miywesin jer.
22 Endi olar qurg'an u'yde, basqalar jasamas, Endi olar otırg'ızg'an na'ldin' miywesin basqalar jemes. Xalqımnın' o'miri tereklerdin' o'mirindey uzaq bolar, Tan'lap alg'anlarım o'z miynetinin' jemisinen la'zzet alar.
23 Olar biyhudag'a miynet etpes, Apat ushın bala tuwmas. Olardın' o'zleri de, urpaqları da, Jaratqan İye jarılqag'an xalıq bolar.
24 Meni shaqırmastan-aq, olarg'a juwap beremen, Aytpay atırıp, esitemen.
25 Qasqır ha'm qozı birge otlar, Arıslan o'giz sıyaqlı ot jer, Al jılan ushın topıraq azıq bolar. Menin' muxaddes tawımnın' barlıq jerinde, Hesh kimge zıyan keltirilmes, Hesh kim joq qılınbas», – deydi Jaratqan İye.
