İyshaya 66 bob
1 Jaratqan İye bılay deydi: «Ko'kler – Menin' taxtım, Jer – Menin' ayaq basarım! Sonda Mag'an qanday u'y qurmaqshısız? Tınıshlıq ma'kanım qay jerde boladı?
2 Ha'mmesi Menin' qolım menen jaratılg'an, Ha'mmesi Meniki. Bunı Jaratqan İye aytadı. Sonda da Men kishipeyilge, ruwxıy ezilgenge, So'zimnen qaltıraytug'ıng'a na'zer salaman.
3 Bug'anı qurbanlıqqa shalg'an adam, Solay islep turıp, adamdı da qurbanlıqqa beredi, Toqlını qurbanlıqqa shalg'an adam, Solay islep turıp, iyttin' de moynın u'zedi, G'a'lle sadaqasın bergen adam, Solay islep turıp, shoshqa qanın da usınadı, Xosh iyisli tu'tetki tu'tetken adam, Solay islep turıp, butqa da sıyınadı. Olar o'z jolların o'zleri tan'lap aldı, Jeksurın islerinen la'zzet aladı.
4 Men de olar ushın qatal jaza tan'layman, O'zleri qorqqan na'rsesin basına salaman. O'ytkeni Men shaqırg'anda, hesh kim juwap bermedi, Men so'ylegende, hesh kim tın'lamadı. Olar Menin' ko'z aldımda jawızlıq islep, Mag'an la'zzet bag'ıshlamaytug'ın na'rselerdi tan'lap aldı».
5 Jaratqan İyenin' so'zinen qaltıraytug'ınlar, Onın' so'zine qulaq salın': «Sizlerdi jek ko'retug'ın, Menin' atım sebepli quwdalaytug'ın tuwısqanların'ız: „Jaratqan İye ullılansın, Biz de sizin' quwanıshın'ızdı ko'reyik!“, – deydi. Biraq olardın' o'zleri uyatqa qaladı».
6 Mine, qaladan shawqım esitiledi. İbadatxanadan dawıs esitiledi. Dushpanlarına isine ılayıqlı jaza berip atırg'an, Jaratqan İyenin' dawısı bul!
7 «Hayal tolg'atpay-aq, bosanıp, Qıynalmay-aq, ul tuwdı.
8 Usındaydı esitken bar ma? Usındaydı ko'rgen bar ma? El bir ku'nde tuwıla ma? Millet bir ma'writte du'nyag'a kele me? Biraq Sion qızı tolg'ata baslag'annan-aq, Ulların tuwıp aladı.
9 Tuwıw waqtına deyin a'kelip, Tuwdırmay qoyaman ba? – deydi Jaratqan İye. Tuwıwg'a ku'sh berip bolıp, Qursaqtı bekitip qoyaman ba? – deydi Qudayın'.
10 – Erusalim menen birge shadlanın', Onı su'ygenlerdin' ha'mmesi ol ushın quwanın', Ol ushın aza tutqanlar, Onın' menen birge shadlanıp, quwanıshqa bo'lenin'.
11 Onın' jubanısh beriwshi emsheklerin emip, toyasız, Qanıp iship, onın' mol da'wletinen la'zzet alasız».
12 Jaratqan İye bılay deydi: «Mine, Men Siong'a abadanshılıqtı da'ryaday, Milletlerdin' baylıg'ın tolıp aqqan sayday etip ag'ızaman. Ol sizlerdi emizip, qollarına ko'terip, Ayag'ına shayqaydı.
13 Ana balasın jubatqanday, Men sizlerdi jubataman. Sizler Erusalimde jubanısh tabasız».
14 Bunı ko'rgende, ju'regin'iz quwanıshqa tolıp, Denen'iz maysa sho'p kibi gu'llep o'sedi. Jaratqan İyenin' qolı O'z qullarının' u'stinde ekeni ayan boladı, Al Onın' g'a'zebi bolsa, dushpanlarına jawadı.
15 Qaran', Jaratqan İye ot ishinde kiyatır, Onın' sawash arbaları quyınday, Ku'shli g'a'zebin qa'ha'r menen, Ashıwın lawlag'an jalınday to'gejaq.
16 Jaratqan İye pu'tkil adamzattı, Ot ha'm qılısh penen hu'kim qıladı. Jaratqan İye ta'repinen o'ltiriletug'ınlar ko'p boladı.
17 «O'zlerin pa'klep ha'm tazalap, basshılarına erip butlardın' bag'larına kirgenler, shoshqa, tıshqan ha'm sol sıyaqlı haram na'rselerdin' go'shin jegenler joq etiledi, – deydi Jaratqan İye.
18 – Men olardın' islerin de, niyetlerin de bilemen. Pu'tkil milletlerdi ha'm barlıq tillerdi bir jerge jıynaw ushın Men kelemen. Olar kelip, ullılıg'ımdı ko'redi.
19 Men olardın' arasında bir belgi ko'rsetip, aman qalg'anlarının' ayırımların milletlerge xızmet etiwge jiberemen. Olar Tarshishke, Pulg'a, sadaqshılardın' eli bolg'an Ludqa, Tubalg'a, Yawang'a, Men tuwralı esitpegen ha'm ullılıg'ımdı ko'rmegen alıstag'ı atawlarg'a barıp, ullılıg'ımdı milletlerge ja'riyalaydı.
20 İzrail ullarının' g'a'lle sadaqaların hadal ıdıslarda Jaratqan İyenin' İbadatxanasına alıp kelgeni sıyaqlı, olar da barlıq milletler arasınan tuwısqanların'ızdın' ha'mmesin toplap, atlarg'a, ha'r qıylı arbalarg'a, g'ashırlarg'a ha'm tu'yelerge mingizip, – deydi Jaratqan İye, – Menin' muxaddes tawıma, Erusalimge, Jaratqan İyege sıy retinde alıp keledi.
21 Olardın' ayırımların ruwxaniy ha'm ayırımların lebiyli xızmetker etip tayınlayman, – deydi Jaratqan İye.
22 Men jaratatug'ın jan'a aspan ha'm jan'a jer aldımda qansha tursa, – deydi Jaratqan İye, – sizlerdin' na'sillerin'iz benen atın'ız da sonsha turadı.
23 Jan'a aydan Jan'a ayg'a, Shabbattan Shabbatqa pu'tkil adamlar aldıma kelip, Mag'an sıyınadı, – deydi Jaratqan İye.
24 Sırtqa shıqqanda, Mag'an qarsı bas ko'tergenlerdin' o'li denelerin ko'redi. Olardın' denelerin jep atırg'an qurtlar o'lmes, olardı jaqqan ot so'nbes. Pu'tkil adamzat olardan jerkenedi».
