İyshaya 8 bob
1 Jaratqan İye Eshuag'a bılay dedi: – Qorqpa ha'm qa'weterlenbe. Barlıq a'skerlerdi janın'a alıp, Ay qalasına ju'ris qıl. Mine, Ay patshasın, xalqın, qalasın ha'm onın' jerin sag'an ta'slim qıldım.
2 Erixo qalasına ha'm onın' patshasına ne islegen bolsan', Ay qalasına ha'm onın' patshasına da sonı isle. Biraq ondag'ı mal ha'm zatlardı olja etip alın'lar. Qalanın' art betine bekinis jasa.
3 Solay etip, Eshua barlıq a'skerler menen birlikte Ay qalasına ju'ris qılıwg'a tayarlandı. Ol tan'lag'an otız mın' ma'rt jawıngerdi tu'nde jolg'a atlandırıp atırıp,
4 olarg'a bılay dep buyırdı: – Endi sizler barıp, qalanın' art betindegi bekiniste jatın'lar. Qaladan onsha alıslap ketpen'ler. Ha'mmen'iz tayar bolıp turın'lar.
5 Men janımdag'ı adamlar menen birlikte qalag'a jaqınlasaman. Dushpan qaladan shıg'ıp, a'welgidey bizlerge qarsı kelgende, bizler olardan qashqanday bolıp,
6 olardı qaladan uzaqlastırg'ansha izimizden ertip baramız. Olar bizlerdi burıng'ıday qashıp baratır dep oylaydı. Bizler olardan qashıp baratırg'anımızda,
7 sizler bekiniste jatırg'an jerin'izden shıg'ıp, qalanı qolg'a kirgizesizler. Qudayın'ız Jaratqan İye ol jerdi sizlerge ta'slim etejaq.
8 Qalanı qolg'a kirgizgenin'izden son', og'an ot berin'ler. Jaratqan İyenin' buyrıg'ı boyınsha ha'reket etin'ler. Minekey, menin' sizlerge buyrıg'ım usı.
9 9Son'ınan Eshua olardı jolg'a atlandırdı. Adamlar ketip, Beyt-El menen Ay qalasının' arasındag'ı, yag'nıy Ay qalasının' batıs ta'repindegi bekiniste jattı. Al Eshua bolsa, tu'ndi qalg'an adamlar menen birge o'tkizdi.
10 Eshua tan' azannan turdı da, a'skerlerdi ko'zden o'tkerip, olardı sapqa turg'ızdı. Keyin o'zi ha'm İzraildın' aqsaqalları a'skerlerdin' aldına tu'sip, Ay qalasına qaray jolg'a shıqtı.
11 Eshua ha'm onın' janındag'ı barlıq a'skerler qalag'a ju'ris qıldı. Olar jaqınlap barıp, qalanın' arqa ta'repine orda qurdı. Olar menen qalanın' arasında bir oypatlıq bar edi.
12 Eshua bes mın'g'a shamalas adamg'a Beyt-El menen Ay qalası arasına, qalanın' batıs ta'repine bekinis qurg'ızdı.
13 Son'ınan arqada orda qurg'anlar da, batısta bekiniste jatırg'anlar da urıs maydanına tu'siwge tayar turdı. Eshua sol tu'ni oypatlıqqa keldi.
14 Bunı ko'rgende Ay patshası adamları menen izraillılarg'a qarsı urısıw ushın qaladan asıg'ıs tu'rde shıqtı. Eshua jobalastırg'anday olar İordan tegisliginin' janındag'ı bir jerge shıqtı. Degen menen, olar o'zlerine qarsı qalanın' artqı ta'repinde bekinis jasalg'anınan xabarsız edi.
15 Eshua ha'm onın' janındag'ı izraillılar qala xalqınan jen'ilip atırg'anday bolıp, sho'lge qaray qasha basladı.
16 Qaladag'ı pu'tkil xalıq izraillılardın' izinen quwıwg'a shaqırıldı. Olar Eshuanı quwa berip, qaladan uzaqlasıp ketti.
17 İzraillılardı quwıwg'a Ay qalası menen Beyt-Elden bir adam qalmay shıqqan edi. Olar izraillılardı quwıwg'a shıg'ıp baratırıp, qalanı qorg'awsız, ashıq qaldırg'an edi.
18 Sonda Jaratqan İye Eshuag'a: – Qolın'dag'ı semserdi Ay qalasına qaray soz. Men sol jerdi sag'an ta'slim etip atırman, – dedi. Eshua qolındag'ı semserdi tuwrı qalag'a qaray sozdı.
19 Ol qolın sozıwdan-aq, bekiniste jatırg'anlar orınlarınan ushıp turıp, qalag'a kirdi. Olar qalanı qolg'a kirgizip, onı da'rhal jag'ıp jiberdi.
20 Ay qalasının' turg'ınları artına qarag'anda, janıp atırg'an qalanın' tu'tini aspang'a ko'terilip atırg'anın ko'rdi. Sho'lge qaray qashqan izraillılar artqa qaytıp, olarg'a hu'jim jasag'anda, olar tıg'ılarg'a tesik taba almay qaldı.
21 Ay qalasının' turg'ınları artına qarag'anda, janıp atırg'an qalanın' tu'tini aspang'a ko'terilip atırg'anın ko'rdi. Sho'lge qaray qashqan izraillılar artqa qaytıp, olarg'a hu'jim jasag'anda, olar tıg'ılarg'a tesik taba almay qaldı.
22 Qalanı qolg'a kirgizgenler de hu'jimge o'tkende, qala xalqı eki jaqtan kelgen izraillılardın' ortasında qaldı. İzraillılar olardan aman qalg'anlardın' da, qashqanlardın' da birde birewin qaldırmay, ha'mmesin o'ltirdi.
23 Olar Ay patshasın tiriley tutqıng'a alıp, Eshuanın' aldına a'keldi.
24 Ay qalasınan shıg'ıp, qır dalada ha'm sho'lde o'zlerinin' izinen quwg'anlardın' ha'mmesin izraillılar qılıshtan o'tkizgennen son', qalag'a qaytıp kelip, sol jerde qalg'an adamlardı da qılıshtan o'tkizdi.
25 ol ku'ni pu'tkil Ay qalasının' xalqı, hayal-erkegi ha'mmesi bolıp on eki mın' adam o'ltirildi.
26 Qala turg'ınlarının' ha'mmesin tolıq qırıp bolg'ansha, Eshua semser uslag'an qolın to'men tu'sirmedi.
27 zraillılar Jaratqan İyenin' Eshuag'a bergen buyrıg'ına qulaq asıp, tek qaladag'ı mallar menen zatlardı g'ana olja etip aldı.
28 Son'ınan Eshua Ay qalasın jag'ıp jiberip, onı ma'n'gi qarabaqanag'a aylandırdı. Sol qala bu'gin de solay turıptı.
29 Eshua Ay qalasının' patshasın ag'ashqa ildirip qoyıp, onı keshke shekem sol jerde qaldırdı ha'm quyash batarda onın' o'li denesin ag'ashtan tu'sirtip, qala da'rwazasının' kirer awzına taslattı. Al onın' o'li denesinin' u'stine taslardı taslap, bir u'yindi isledi. Bul u'yindi bu'gin de bar.
30 Bunnan son', Eshua Ebal tawında İzraildın' Qudayı Jaratqan İyege arnap qurbanlıq ornın qurdı.
31 Bul orın Jaratqan İyenin' qulı Muwsanın' İzrail xalqına bergen buyrıg'ı boyınsha, Muwsanın' Nızam kitabında jazılg'anınday qılıp qurıldı. Yag'nıy, temir tiymegen ha'm jonılmag'an taslardan qurıldı. Ol jerde Jaratqan İyege arnap jandırılatug'ın qurbanlıqlar ha'm tatıwlıq qurbanlıqları berildi.
32 Muwsanın' İzrail xalqı aldında jazg'an Nızamının' ko'shirmesin Eshua sol jerdegi taslarg'a jazdı.
33 Al pu'tkil izraillılar bolsa, aqsaqallar, qadag'alawshılar, qazılar ha'm kelgindi adamlar menen birlikte Jaratqan İyenin' Kelisim sandıg'ının' eki ta'repinde sandıqtı ko'tergen lebiyli ruwxaniylerge qarama-qarsı bolıp dizildi. Xalıqtın' birinshi yarımı Gerizzim tawı ta'repinde, ekinshi yarımı Ebal tawı ta'repinde turg'an edi. O'ytkeni Jaratqan İyenin' qulı Muwsa jarılqaw alıw ushın usı ta'rizde turıwdı aldın buyırg'an edi.
34 Keyin Eshua Nızam kitabında jazılg'anınday etip, jarılqaw ha'm g'arg'ıs so'zlerdin' barlıg'ın oqıdı.
35 Solay etip, Eshua pu'tkil İzrail ja'miyetinin', hayallardın', balalardın' ha'm xalıqtın' arasında bolg'an kelgindi adamlardın' aldında Muwsanın' buyrıqlarınan birde bir so'z qaldırmay oqıp berdi.
