Eremiya 10 bob
1 Ha'y, İzrail xalqı, Jaratqan İyenin' sizlerge aytıp atırg'an so'zlerin tın'lan'!
2 Jaratqan İye bılay deydi: Milletlerdin' jolların u'yrenben', Basqa milletler qorqqanı sıyaqlı, Aspan belgilerinen qorqpan'.
3 Xalıqlardın' da'stu'rleri paydasız. Olar tog'aydan ag'ash kesip alıp, Ustanın' quralı menen og'an pishim beredi.
4 Onı gu'mis ha'm altın menen bezeydi, Jıg'ılıp ketpesin dep, Shege menen sho'kkishlep qag'ıp qoyadı.
5 Bul butlar palız atızındag'ı qaraqshıg'a uqsaydı, So'yley almaydı, Ko'terip ju'riw kerek, O'zleri ju're almaydı. Olardan qorqpan', Olardın' qolınan jamanlıq islew de, Jaqsılıq islew de kelmeydi.
6 Jaratqan İye, Sag'an uqsag'anı joq! Sen ullısan', atın' da qu'diretke iye!
7 Milletler Patshası, Sennen qorqpaytug'ın kim bar? Sen bug'an ılayıqlısan'. Milletlerdin' barlıq danıshpanları, Barlıq patshalıqları arasında, Sag'an uqsag'anı joq.
8 Bul xalıqlar aqmaq ha'm aqılsız. Jansız ag'ashtan ta'lim aladı.
9 Tarshishten sho'kkishlep tegislengen gu'mis, Ufazdan altın alıp kelinedi. Usta ha'm zerger islegen na'rsege, Qızg'ısh ko'k ha'm shım qızıl kiyim kiygizedi. Ha'mmesi sheber o'nermentlerdin' isi.
10 Biraq Jaratqan İye – haqıyqıy Quday, Ol tiri Quday ha'm ma'n'gilik Patsha. Ol qa'ha'rlense, jer titireydi, Milletler Onın' g'a'zebine shıdam bere almaydı.
11 Butqa sıyınatug'ın xalıqlarg'a bılay dep ayt: «Jer ha'm aspandı jaratpag'an qudaylar, Jer betinen ha'm aspan astınan joq boladı».
12 O'zinin' qu'direti menen jerdi jaratqan, Danalıg'ı menen du'nyanı qurg'an, Aqılı menen ko'klerdi jayg'an, Jaratqan İye boladı.
13 Ol gu'rkiregende, ko'ktegi suwlar shuwıldaydı, Ol jerdin' shet-shebirinen bultlardı ko'teredi. Jawın jawdırıw ushın shaqmaq shaqtırıp, Saqlap qoyg'an jerinen samal estiredi.
14 Ha'mme adam aqmaq ha'm bilimsiz, Ha'r bir zerger soqqan butları sebepli uyatqa qaladı, Olardın' mu'sinleri aldamshı ha'm jansız.
15 Olar paydasız, masqarapazdın' isi, Jazalag'an waqıtta-aq joq boladı.
16 Biraq Yaqıptın' Qudayı olarg'a uqsamaydı, Ol – pu'tkil barlıqtı jaratqan Quday. İzrail urıwı – Onın' miyrası, Onın' atı – A'lemnin' Jaratqan İyesi.
17 Qamalda jasag'anlar, Barı-jog'ın'ızdı jıynan'!
18 O'ytkeni Jaratqan İye bılay deydi: – Mine, endi bul jerdin' turg'ınların ılaqtırıp taslayman. Tawıp alıwı ushın, Olardı tar jerge quwıp alıp baraman.
19 Sorım qurısın, sorlap qaldım! Jaraqatım awır! Biraq men o'zime: «Basımda bul da'rt te bar eken, Shıdawım kerek», – dedim.
20 Shatırım quladı, u'zildi barlıq jipleri, Balalarım taslap ketti, endi olar joq. Shatırımdı qayta tigetug'ın, Perdelerin tag'atug'ın hesh kim joq.
21 Shopanlar aqıldan adastı, Jaratqan İyeden ma'sla'ha't soramadı. Sonlıqtan isleri on'ınan kelmedi, Ha'mme su'riwleri tarap ketti.
22 Tın'lan'lar, bir xabar kiyatır! Yahuda qalaların sho'lge, Sag'allar ma'kanına aylandırıw ushın, Arqadan ullı shawqım kiyatır!
23 Jaratqan İye, men adam jolının' o'z qolında emesligin, O'z adımın o'zi basqara almaytug'ının bilemen.
24 Jaratqan İye, g'a'zebin' menen emes, Al a'dalatın' menen meni ta'rbiyala! Bolmasa meni qurtasan'.
25 G'a'zebin'di O'zin'di tanımag'an milletlerge, Atın'dı aytıp shaqırmag'an qa'wimlerge to'k. Sebebi olar Yaqıptı jalmadı, Pu'tkilley qırıp, joq qılıp, Ma'kanın wayran etti.
