Eremiya 12 bob
1 Jaratqan İye, dawa-arzımdı Sag'an alıp kelsem, Sen ba'rqulla haq bolıp shıg'asan'. Sonda da, hu'kim tuwralı, Senin' menen so'ylespekshimen. Ne ushın jamannın' isi ju'risedi? Ne ushın satqınlar tınıshlıqta jasaydı?
2 Olardı Sen otırg'ızdın', olar tamır jayıp, O'sip, miywe berdi. Atın' awzınan tu'speydi, Biraq ju'regi Sennen alıs.
3 Meni bolsa, Jaratqan İye, Sen tanıysan', Meni ko'resen', O'zin' haqqın'dag'ı pikirlerimdi sınaysan'. Sol adamlardı bawızlanatug'ın qoyday etip su'yrep, Soyılatug'ın ku'n ushın ajıratıp, tayınla.
4 Qashang'a deyin jer aza tutıp, Atızlarda sho'pler solıp jatadı? Ol jerdin' turg'ınlarının' jaman isleri zardabınan, Haywanlar ha'm quslar nabıt bolmaqta. Sebebi bul xalıq: «Ol bizlerge ne bolatug'ının ko'rmeydi», – deydi.
5 – Eremiya, piyadalar menen jarısıp sharshasan', Onda atlılar menen qalay jarısasan'? Jazıq jerde su'rniksen', Onda İordan boyındag'ı qalın' tog'ayda ne qılasan'?
6 Ha'tte, a'ken'nin' u'y-ishi, tuwg'an-tuwısqanların', Sag'an qıyanet etti, Artın'nan qattı so'yledi. Olar sag'an jaqsı so'ylese de, Olarg'a isenbe.
7 Men u'yimdi ta'rk ettim, İyeligimdi taslap kettim. 2 Janımday su'ygen xalqımdı, Dushpanlarının' qolına berdim.
8 O'z xalqım Mag'an tog'aydag'ı arıslanday boldı, Mag'an ırıldadı, sonın' ushın onı jek ko'remen.
9 Xalqım jırtqısh qusqa, Ha'r ta'repten topılısqa ushırag'an jırtqısh qusqa uqsap qalmadı ma? Barıp, barlıq jabayı haywanlardı toplan', Olar Menin' iyeligimdi jalmap jutsın.
10 Ko'p shopanlar ju'zimzarımdı nabıt qıldı, Atızımdı basqılap tasladı, Su'yikli atızımdı taqır sho'lge aylandırdı.
11 Onı wayran qıldı, Kewip, aldımda nala shegip atır. Barlıq jer wayran boldı, Og'an kewil bo'letug'ın hesh kim joq.
12 Sho'ldegi barlıq taqır to'beler arqalı, Qurtıwshılar kiyatır. Jaratqan İyenin', Menin' qılıshım, Jerdin' bir shetinen ekinshi shetine deyin qırıp joyadı. Onnan hesh kim aman qalmaydı.
13 Olar biyday egip, tiken ordı, Tınbay miynet etip, ra'ha't ko'rmedi. Lawlag'an g'a'zebim sebepli, Zu'ra'a't ala almay shermende boldın'ız.
14 Jaratqan İye bılay deydi: Xalqım İzrailg'a bergen mu'lkime qol salg'an barlıq jaman qon'sıların o'z jerlerinen suwırıp taslayman. Yahuda xalqın da olar menen birge suwırıp taslayman.
15 Ha'mmesin suwırıp taslag'anımnan son', olarg'a ja'ne rehim etip, ha'r birin o'z miyrasına, o'z jerine qaytıp alıp kelemen.
16 Eger xalqıma Baaldın' atınan ant ishiwdi u'yretkeni sıyaqlı, o'zleri de xalqımnın' jolın ıqlas penen u'yrenip: «Tiri Jaratqan İye haqı ant ishemen», – dep, Menin' atım menen ant ishiwdi u'yrense, onda olar da xalqımnın' arasına ornalasadı.
17 Biraq Mag'an qulaq salmag'an ha'r bir milletti tu'p-tamırı menen qoparıp, nabıt qılaman, – deydi Jaratqan İye.
