Eremiya 14 bob
1 Qurg'aqshılıq haqqında Eremiyag'a Jaratqan İyeden mınaday so'z tu'sti:
2 – Yahuda aza tutıp, Qalaları quwrap atır. Adamları joqlaw aytıp, jerde otır, Erusalimnen zarlag'an dawıslar shıg'ıp atır.
3 Aqsu'yekler qulların suwg'a jiberdi, Olar suw saqlag'ıshlarg'a barıp, suw tappay, Bos ıdısları menen u'ylerine qayttı. Olar albırap, qısınıp, ju'zin jawıp aldı.
4 Jerge jawın jawmag'annan keyin, Jer qaq ayırıldı. Diyxanlar u'mitsizlikke tu'sip, Basın usladı.
5 Ha'tte, sho'ldegi ana suwın da, Ot-sho'p bolmag'anı ushın, Jan'a tuwg'an balasın taslap ketpekte.
6 Qulanlar jalan'ash to'belerde turıp, Sag'allar kibi suwıq demin almaqta. Otlaq bolmag'anlıqtan, Ko'zlerinin' nurı so'ngen.
7 – Ayıplarımız bizge qarsı gu'walıq berse de, O'z atın' hu'rmeti bir na'rse qıl, Jaratqan İye! Qıyanetimiz ju'da' awır, Sag'an qarsı gu'na isledik.
8 İzraildın' u'miti, Azap ku'ninde Qutqarıwshı! Nege jerimizge kelgen kelgindige, Tu'nep ketetug'ın jolawshıg'a uqsaysan'?
9 Nege Sen albırag'an adamg'a, Qutqarıwg'a ku'shi jetpeytug'ın, Jawıngerge uqsaysan'? Biraq Sen bizlerdin' aramızdasan'-g'o, Bizler Senin' atın' menen shaqırıldıq, Bizlerdi ta'rk etpe, Jaratqan İye!
10 Bul xalıq tuwralı Jaratqan İye bılay deydi: – Olar, haqıyqattan da, qan'g'ırıp ju'rgendi jaqsı ko'redi, Ayaqların tıya almaydı. Sonlıqtan Menin' olarg'a kewlim tolmaydı, Endi ayıpların eske alaman, Gu'naları ushın olardı jazalayman.
11 Keyin Jaratqan İye mag'an bılay dedi: – Bul xalıqtın' abadanlıg'ı ushın duwa etpe.
12 Olar oraza tutsa da, olardın' jalbarınıwlarına qulaq salmayman. Jandırılatug'ın qurbanlıq ha'm g'a'lle sadaqasın usınsa da, Men olardı qabıl qılmayman. Kerisinshe, olardı qılısh, ashlıq ha'm oba keselligi menen qırıp taslayman.
13 Sonda men: – Quday İye, payg'ambarlar bul xalıqqa qılısh ju'zin ko'rmeysiz, ashlıq ta bolmaydı, bul jerde haqıyqıy abadan turmıs keshiresiz dep atır, – dedim.
14 Jaratqan İye mag'an bılay dep juwap berdi: – Payg'ambarlar Menin' atımnan jalg'an payg'ambarshılıq qılmaqta. Olardı Men jibermedim. Olarg'a buyrıq ta bermedim, olar menen so'ylespedim de. Olar sizlerge jalg'an ayanlardı, ashqan paydasız palın ha'm o'zlerinin' ju'rekleri qa'legen jalg'anlardı aytıp payg'ambarshılıq etip ju'r.
15 Sonlıqtan Menin' atım menen payg'ambarshılıq etip ju'rgenlerge bılay deymen: «Olardı Men jibermegen bolsam da, olar: „Bul jerge qılısh ta, ashlıq ta jolamaydı“, – deydi. Biraq bul payg'ambarlardın' o'zleri qılısh ha'm ashlıqtan qaza tabadı.
16 Olar payg'ambarshılıq qılg'an xalıq ta ashlıq ha'm qılısh sebepli Erusalim ko'shelerine ılaqtırıladı. Olardın' o'zlerin de, hayalların da, ul-qızların da jerleytug'ın hesh kim bolmaydı. Olardın' jawızlıqların o'zlerinin' baslarına jawdıraman».
17 – Sen olarg'a mına so'zdi jetkiz: «Ku'ni-tu'ni ko'z jasım toqtamasın. Sebebi pa'k qızım – xalqım awır jaraqatlandı, Ku'shli soqqı jedi.
18 Dalag'a shıqsam, Qılıshtan qaza tapqanlar, Qalag'a kirsem, Ashlıqtan o'limshi bolg'anlardı ko'remen. Payg'ambar da, ruwxaniy de, O'zleri bilmeytug'ın jerde qan'g'ıp ju'r».
19 – Yahudadan pu'tkilley bas tartqanın' ba? Sionnan da jerkenetug'ın boldın' ba? Ne ushın bizdi shıpasız qılıp jaraqatladın'? Bizler paraxatshılıq ku'ttik, Biraq jaqsılıq ko'rmedik. Shıpa alatug'ın waqıttı ku'ttik, Ornına za'rremiz ushtı.
20 Jaratqan İye, islegen jamanlıqlarımızdı, Ata-babalarımızdın' ayıpların moyınlaymız. Aldın'da gu'na isledik.
21 Atın' hu'rmeti bizlerden ju'z burma, Saltanatlı taxtın' hu'rmeti ayaq astı qılma. Bizler menen du'zgen kelisimin'di eske al, Onı buzba.
22 Milletlerdin' jaramsız butlarının' arasında, Jawın jawdıra alatug'ını bar ma? Yamasa aspan o'zliginen no'ser quydıra ala ma? Qudayımız Jaratqan İye, bunı tek g'ana Sen isley alasan'. Bulardın' ha'mmesin isleytug'ın Sensen', U'mitimiz Sennen!
