Eremiya 15 bob
1 Jaratqan İye mag'an bılay dedi: – Ha'tte, Muwsa menen Samuel aldımda turıp jalbarınsa da, bul xalıqqa ju'regim jibimeydi. Bul xalıqtı aldımnan quw, ketsin!
2 Eger olar sennen: «Qay jerge baramız?» – dese, olarg'a bılay dep ayt: «Jaratqan İye bılay deydi: O'limge hu'kim etilgenler – o'lsin, Qılıshqa hu'kim etilgenler – qılısh astına tu'ssin, Ashlıqqa hu'kim etilgenler – ashlıqqa ushırasın, Tutqınlıqqa hu'kim etilgenler – tutqın bolsın.
3 Olarg'a to'rt tu'rli jaza beriwdi qarar ettim, – deydi Jaratqan İye, – o'ltiriw ushın qılıshtı, tilkimlew ushın iytlerdi, jep, joq qılıw ushın ko'ktegi quslar menen jerdegi haywanlardı jiberemen.
4 Yahuda patshası Xizkiya ulı Menashshenin' Erusalimde islegen islerinin' kesiri sebepli, pu'tkil jer betindegi patshalıqlar ushın olardı qorqınıshlı ko'riniske aylandıraman.
5 Erusalim, sag'an kimnin' janı ashıydı? Kim sen ushın aza tutadı? Hal-jag'day soraw ushın, Kim qayırılıp, sag'an keler eken?
6 Sen Mennen ju'z burdın', – deydi Jaratqan İye, – Sen arqan'dı qarattın'. Sonlıqtan qolımdı ko'terip, Seni joq qılaman. Seni ayawdan sharshadım.
7 Bul jerdin' qala da'rwazalarında, Xalqımdı gu'rek penen suwıraman. Perzentlerinen ayırıp, Xalqımdı nabıt qılaman. O'ytkeni olar jaman jollarınan qaytpadı.
8 Olardın' jesirleri ten'iz qumınan da ko'p boladı. Jigitlerinin' analarının' u'stine, Tal tu'ste nabıt qılıwshını jiberemen. Tosattan olardı qayg'ı ha'm qorqınıshqa salaman.
9 Jeti balalı ana ha'lsirep, Son'g'ı demin beredi. Onın' quyashı ku'ndiz-aq batadı. Ol uyatqa qalıp, masqara boladı. Aman qalg'anlardı dushpanlarının' ko'z aldında, Qılıshqa tapsıraman, – deydi Jaratqan İye».
10 – Menin' sorım qurısın! Anajan, sen meni pu'tkil du'nya menen dawlasıp, Ja'njellessin dep tuwıp pa edin'? Men hesh kimge qarız bermedim, qarız da almadım, Sonda da ha'mme meni na'letleydi.
11 Jaratqan İye bılay dedi: – Men seni pu'tkilley dushpanlarg'a beremen. Apatshılıq ha'm baxıtsızlıq waqtında, Olardı sag'an jiberemen.
12 Temirdi, arqadan kelgen temir ha'm qolanı, Kim sındıra aladı?
13 Eldin' ha'mme jerinde islegen gu'naların'ız ushın, Baylıg'ın'ızdı ha'm g'a'ziynen'izdi, Dushpanların'ızg'a an'sat olja qılaman.
14 Men sizlerdi o'zlerin'iz bilmeytug'ın jerdegi, Dushpanların'ızg'a qul qılaman. G'a'zebim sizlerge qarsı tutanıp, Ot bolıp janadı.
15 – Jaratqan İye, Sen bilesen', Meni yadqa al, ja'rdem ber, Meni quwg'ın qılg'anlardan o'shimdi al. Sabırlılıg'ın' menen meni nabıt qılma, Bilesen', Sen ushın xorlıqlarg'a shıdap atırman.
16 So'zlerin'di tawıp, jedim. So'zlerin' mag'an quwanısh, ju'regime shadlıq alıp keldi. A'lemnin' Qudayı Jaratqan İye, Men Senin' atın' menen atalg'anman.
17 Keypi-sapa qurg'anlar menen otırmadım, Olar menen yoshıp, shadlanbadım. Senin' qolın' u'stimde bolıp, Meni g'a'zepke toltırg'anın' ushın, Men jalg'ız otırdım.
18 Nege azabımnın' azarı basılmaydı? Nege jaraqatım awır ha'm shıpasız? Sen men ushın suwı qurıp qala beretug'ın, Aldamshı bir say bolajaqsan' ba?
19 ug'an Jaratqan İye bılay dedi: – Eger ta'wbe qılsan', qayta qabıl etip, Seni xızmetime qoyaman. Eger ma'nissiz so'ylemey, A'hmiyetli so'zlerdi aytsan', Menin' tilim menen so'yleysen'. Bul xalıqtın' o'zleri sag'an qaytadı, Biraq sen olarg'a qayırılıp qarama.
20 Men seni bul xalıq ushın, Qoladan islengen bekkem diywal qılaman. Olar senin' menen urısadı, biraq jen'e almaydı. Qutqarıw ha'm azat qılıw ushın, Men senin' menen birgemen, – dedi Jaratqan İye. –
21 Seni nahaqlardın' qolınan azat etemen, Rehimsizlerdin' pa'njesinen satıp alaman.
