Eremiya 16 bob
1 Mag'an Jaratqan İyeden mınaday so'z tu'sti:
2 – U'ylenbe, bul elde ul-qızların' bolmasın.
3 Bul jerde tuwılg'an ul-qızlar, olardı tuwg'an analar ha'm olardı do'retken a'keler tuwralı Jaratqan İye bılay deydi:
4 Olar awır keselliklerden o'ledi. Olar ushın joqlaw aytılmaydı, olar jerlenbeydi. Olar topıraqta tezek sıyaqlı shashılıp jatadı. Qılıshtan qaza tabadı, ashlıqtan o'ledi. Deneleri ko'ktegi quslarg'a ha'm jerdegi haywanlarg'a jem boladı.
5 Sonlıqtan Jaratqan İye bılay deydi: Namaz bolıp atırg'an u'yge kirme, joqlaw aytıw yamasa kewil bildiriw ushın barma. Men bul xalıqtan tınıshlıg'ımdı, su'yispenshiligimdi ha'm rehimimdi alıp qoydım, – deydi Jaratqan İye.
6 – Bul jerde u'lkeninen kishkenesine deyin ha'mmesi o'ledi. Olardı hesh kim jerlemeydi, olar ushın joqlaw aytıp, o'z denelerin tilip, shashların aldırmaydı.
7 O'lige joqlaw aytıp jılag'anlardı jubatıp, sho'rek sındırıp beretug'ın da, ata-anasın eske alg'anda ta'selle kesesin usınatug'ın da hesh kim bolmaydı.
8 Toy bolıp atırg'an u'yge de kirme, olar menen otırıp, iship-jeme.
9 Sebebi İzraildın' Qudayı, A'lemnin' Jaratqan İyesi bılay deydi: Sizlerdin' ku'nlerin'izde, sizlerdin' ko'z aldın'ızda bul jerdegi quwanısh ha'm shadlıq dawısın, kelin ha'm ku'yewdin' dawısın tıyaman.
10 Bul so'zlerdin' ha'mmesin xalıqqa jetkergenin'de, olar sag'an: «Ne ushın Jaratqan İye bizlerge bul awır azaptın' barlıg'ın jawdırmaqshı ekenin bildirdi? Jazıg'ımız ne? Qudayımız Jaratqan İyege qarsı qanday gu'na isledik?» – deydi.
11 Sonda sen olarg'a bılay dep juwap ber: «Atababaların'ız Meni ta'rk etti, – deydi Jaratqan İye. – Olar basqa qudaylarg'a erdi, olarg'a xızmet etip, tabındı. Meni taslap ketti, Nızamıma a'mel qılmadı.
12 Sizler bolsan'ız, ata-babaların'ızdan da beter jamanlıq qıldın'ız. Mag'an qulaq salmay, ha'r birin'iz qırsıqlıq penen ju'regin'izdin' jamanlıqların islep atırsız.
13 Sonın' ushın Men sizlerdi bul jerden shıg'arıp, o'zlerin'iz de, ata-babaların'ız da bilmeytug'ın jerge ılaqtırıp taslayman. Ol jerde ku'ni-tu'ni basqa qudaylarg'a xızmet etesiz. Men sizlerge rehim qılmayman».
14 «Sonday ku'nler keledi, – deydi Jaratqan İye, – adamlar artıq „İzrail xalqın Mısırdan alıp shıqqan Tiri Jaratqan İye haqı ant ishemen“, demeytug'ın boladı.
15 Bunın' ornına, „İzrail xalqın arqadan, O'zi quwıp jibergen barlıq jerlerden alıp shıqqan Tiri Jaratqan İye haqı ant ishemen“, deytug'ın boladı. Sebebi Men olardı ata-babalarına bergen jerge qaytarıp alıp kelemen.
16 Mine, Men ko'p balıqshılardı jiberemen, – deydi Jaratqan İye, – balıqshılar olardı tutadı. Bunnan keyin, Men ko'p an'shılardı jiberemen. An'shılar barlıq taw, barlıq to'beshik ha'm barlıq jartaslardın' jarıqlarınan olardı awlaydı.
17 Olardın' barlıq jolları Menin' ko'z aldımda, olar Mennen jasırına almaydı, qılmısları da na'zerimnen qasha almaydı.
18 Olar jansız, jerkenishli butları menen jerimdi haramladı, Menin' mu'lkimdi jerkenishli mu'sinlerge toltırdı. Sonlıqtan qılmısları ha'm gu'naları ushın olarg'a eki ese qılıp qaytaraman».
19 – Jaratqan İye, Sen menin' ku'shim ha'm qorg'anımsan', Apatshılıq ku'ni panamsan'! Du'nyanın' to'rt ta'repinen milletler, Senin' aldın'a kelip bılay deydi: «Bizlerdin' ata-babalarımız tek jalg'an qudaylardı, Paydasız, jaramsız butlardı miyrasqa aldı.
20 Adam o'zine qudaylardı sog'a ala ma? Aqırı, bular Quday emes-g'o!»
21 – Solay eken, bul ret Men olarg'a sabaq bereyin, Ku'shimdi ha'm qu'diretimdi ko'rsetip qoyayın. Sonda olar Menin' atımnın' Jaratqan İye ekenin bilip aladı.
