Eremiya 17 bob
1 – Yahudanın' gu'nası temir qa'lem menen jazıldı. Bul olardın' ju'reklerinin' taxtasına, Qurbanlıq orınnın' shaqlarına, Shaqmaq tas penen oyıp jazıldı.
2 Ha'r bir biyik to'beshiktegi, Qoyıw japıraqlı terektin' astındag'ı, Qurbanlıq orınlar menen kiyeli ag'ashlarg'a, Olardın' balaları da tabınıwın dawam etpekte.
3 Jerimdegi tawım u'stinde, Pu'tkil aymag'ın'ızda qılg'an gu'naların'ız ushın, Men senin' baylıg'ın'dı, Barlıq g'a'ziynelerin'di, Sıyınıw orınların' menen birge, Dushpang'a olja qılıp beremen.
4 O'z ayıbın' sebepli, O'zin'e bergen u'lesimnen juda bolasan'. Men seni o'zin' bilmeytug'ın jerdegi, Dushpanların'a qul qılaman. Sizler Menin' g'a'zebimdi tutandırdın'ız, Ol ma'n'gige janadı.
5 Jaratqan İye bılay deydi: – İnsang'a isengen, İnsannın' ku'shine su'yengen, Ju'regi Jaratqan İyeden alıslag'an, Adamg'a na'let jawsın!
6 Ol sho'ldegi putag'a megzeydi, Jaqsılıq kelgende, onı ko'rmeydi. Ol ku'ydiretug'ın sho'lde, Adamsız duzlı jerde jasaydı.
7 Jaratqan İyege u'mit baylag'an, Og'an su'yengen adam qanday baxıtlı!
8 Ol suw jag'asına otırg'ızılg'an terekke megzeydi, Tamırın o'zekke qaray jayadı. Issıdan qorqpaydı, Japırag'ı ba'rqulla jasıl boladı. Jıl qurg'aq kelse de, qayg'ıg'a batpaydı, Miywe beriwin toqtatpaydı.
9 Adam ju'regi ha'mme na'rseden de hiyleker, Hasla du'zelmeydi, Og'an kim tu'sine aladı?
10 Men – Jaratqan İye ha'r bir adamnın' tutqan jolına, İslegen islerine qaray qaytarıw ushın, Adamnın' ju'regine qarayman, Qa'lbin sınayman.
11 Haram baylıq jıynag'an adam, O'zi tuwmag'an ma'yekke qurıq basqan keklikke uqsaydı. O'mirinin' ortasında baylıg'ı qoldan ketip, Aqırında ol aqmaq bolıp shıg'adı.
12 – Muxaddes İbadatxanamız – a'zelden ko'terilgen, Jaratqan İyenin' saltanatlı taxtı!
13 Jaratqan İye, İzraildın' U'miti! Seni ta'rk etkenlerdin' ha'mmesi uyatqa qaladı. Sennen ju'z burg'anlardın' atları, Qumg'a jazılg'anday joq boladı. Sebebi olar tiri suw bulag'ın, Jaratqan İyeni ta'rk etti.
14 Shıpa ber mag'an, Jaratqan İye, sawalayın, Meni qutqar, qutqarılayın. Sebebi tek O'zin'e alg'ıs aytaman.
15 Olar mag'an: «Jaratqan İyenin' so'zi qay jerde? Ol a'melge assın», – dey beredi.
16 Men xızmetin'de shopan bolıwdan qashpadım. Apatshılıq ku'ninin' keliwin de tilemedim. Awzımnan shıqqan ha'r bir so'zdi O'zin' bilesen'. Ol so'zler Senin' aldın'da aytılg'an.
17 Menin' hu'reyimdi ushırma, Apatshılıq ku'ni panam O'zin'sen'.
18 Meni quwg'ın qılg'anlar uyatqa qalsın, Biraq meni uyatqa qalıwdan saqlay go'r. Olardı qorqıwg'a sal, Biraq meni qorqıwdan saqlay go'r. Olarg'a apatshılıq ku'nin jawdırıp, Eki ese awır soqqı berip, joq qıl.
19 Jaratqan İye mag'an bılay dedi: – Yahuda patshaları kirip-shıg'atug'ın Xalıq da'rwazasına barıp, sol jerde tur. Son'ınan Erusalimnin' basqa da'rwazalarına da barıp tur.
20 Xalıqqa bılay dep ayt: «Mına da'rwazalardan o'tetug'ın Yahuda patshaları, pu'tkil Yahuda xalqı ha'm pu'tkil Erusalim turg'ınları, Jaratqan İyenin' so'zin tın'lan'!
21 Jaratqan İye bılay deydi: Eger o'mirin'izdi saqlap qalmaqshı bolsan'ız, onda Shabbat ku'ni ju'k tasıman', onı Erusalim da'rwazaları arqalı alıp o'tpen'.
22 Sol ku'ni u'yin'izden ju'k shıg'arman', hesh qanday jumıs islemen'. Menin' ata-babaların'ızg'a buyırg'anımday, Shabbat ku'nin muxaddes saqlan'.
23 Degen menen, ata-babaların'ız Meni tın'lamadı, qulaq ta salmadı. Qaysarlıq etip, Meni tın'lamadı, ta'rbiyamdı almadı.
24 Biraq eger sizler Mag'an qulaq salıp, – deydi Jaratqan İye, – Shabbat ku'ni bul qalanın' da'rwazalarınan ju'k alıp o'tpesen'iz, hesh qanday jumıs islemey, Shabbat ku'nin muxaddes saqlasan'ız,
25 onda Dawıttın' taxtında otıratug'ın patshalar o'z ha'meldarları menen arbalarg'a ha'm atlarg'a minip, Yahuda xalqı ha'm Erusalim turg'ınların ertip, bul qalanın' da'rwazalarınan kiredi. Bul qalada ma'n'gige adamlar jasaydı.
26 Yahuda qalalarınan, Erusalimnin' a'tiraplarınan, Benyamin jerinen, batıstag'ı taw eteklerinen, tawlı u'lkeden, Negebten adamlar kelip, Jaratqan İyenin' İbadatxanasına jandırılatug'ın qurbanlıqları menen basqa qurbanlıqların, g'a'lle sadaqaların, xosh iyisli tu'tetki menen minnetdarshılıq qurbanlıqların alıp keledi.
27 Eger de Meni tın'lamasan'ız, Shabbat ku'ni Erusalim da'rwazalarınan ju'k penen kirip, muxaddes Shabbat ku'nin muxaddes saqlamasan'ız, onda qala da'rwazalarına ot beremen. Ot Erusalim sarayların jandırıp joq qıladı, ol hesh qashan so'nbeydi».
