Eremiya 18 bob
1 Jaratqan İyeden Eremiyag'a mınaday so'z tu'sti:
2 – Tur, gu'lalshının' u'yine bar, sol jerde O'z so'zimdi ayan qılaman.
3 Men gu'lalshının' u'yine barg'anımda, onın' gu'lal a'sbabın aylandırıp jumıs islep otırg'anın ko'rdim.
4 Ilaydan islep atırg'an ıdısı gu'lalshının' qolında buzılıp ketkende, ol sol ılaydan o'zinin' ko'zine jaqqanday basqa bir ıdıstı shıg'ardı.
5 Sol waqıtta Jaratqan İyeden mag'an so'z tu'sti:
6 – Ha'y, İzrail xalqı, mına gu'lalshının' o'z ıdısına islegenindey na'rseni, Men de sizlerge isley almayman ba? – deydi Jaratqan İye. – Ilay gu'lalshının' qolında qanday bolsa, İzrail xalqı, sizler de Menin' qolımda sondaysız.
7 Qa'legen waqıtta Men qanday da bir millet yamasa patshalıqtı tu'p-tamırı menen suwırıp taslaw, qulatıw ha'm joq qılıw tuwralı sheshim qabıl ete alaman.
8 Biraq Men aytqan sol xalıq jawızlıqları ushın ta'wbe qılsa, onın' basına jawdıratug'ın apatshılıg'ımnan waz keshemen.
9 Aytayıq, Men bir milletti yamasa patshalıqtı qurıp, bekkemlew tuwralı jar salsam,
10 biraq sol millet Menin' na'zerimde jawız islerdi qılıp, so'zime qulaq salmasa, onda Men og'an islemekshi bolg'an jaqsılıg'ımnan waz keshemen.
11 Sonlıqtan endi Yahuda xalqı menen Erusalim turg'ınlarına ayt, Jaratqan İye bılay deydi: – Men sizlerge bir apattı tayarlap, bir joba oylap atırman. Ha'r birin'iz jawız jolların'ızdan qaytıp, is-ha'reketin'izdi du'zetin'.
12 Biraq olar: «Bizler ushın a'were bolman'! O'z niyetimizdi iske asıra beremiz, ha'r birimiz jawız ju'regimizdin' qaysarlıg'ı menen is tuta beremiz», – deydi.
13 Sonlıqtan Jaratqan İye bılay deydi: – Milletlerden soran', Bug'an uqsag'an na'rselerdi kim esitipti? Pa'k qız İzrail, Qorqınıshlı is qıldı.
14 Lebanon jartaslı janbawırlarındag'ı, Qarlar hesh erip, joq bolar ma? Alıs tawlardan ag'ıp kelgen muzday suwlar, Ada bolar ma eken?
15 Biraq Menin' xalqım Meni umıttı. Olar paydasız butlarg'a tu'tetki tu'tetti. Bular olardı o'z jolında su'rniktirdi, Eski jollardan adastırdı. Olar tuwrı joldan shıg'ıp, Teris joldan ju'rip ketti.
16 Olardın' jeri qıyratılıp, Ma'n'gige masqara boladı. Janınan o'tkenlerdin' janı tu'rshigip, Basların shayqaytug'ın boladı.
17 Shıg'ıs samalı kibi, Olardı dushpanlarının' aldına shashaman. Olar apatshılıqqa ushırag'anda, Ju'zimdi burıp, arqamdı ko'rsetemen.
18 Sonda xalıq: «Kelin', Eremiyag'a qarsı til biriktireyik. Ruwxaniyler u'yretetug'ın Nızam da, danıshpanlardın' ma'sla'ha'ti de, payg'ambarlardın' so'zleri de bizlerge jeterli. Eremiyag'a qarsı so'ylep, onın' hesh bir so'zine qulaq aspayıq», – dedi.
19 Jaratqan İye, meni tın'la, Dushpanlarımnın' so'zlerin esit!
20 Nelikten jaqsılıqqa jamanlıq qaytarmaqshı? Olar mag'an go'r qazdı. Olarg'a degen g'a'zebin'di basıw ushın, Olardın' iygiligin go'zlep, Aldın'da qalay jalbarınıp turg'anımdı esin'e al.
21 Bunın' ushın, balaların ashlıqqa ushıratıp, Olardı qılısh ju'zine tapsır. Hayalları perzentlerinen ayırılıp, Jesir bolıp qalsın. Erkekleri a'jel tapsın, Jasları urısta qılıshtan qaza tapsın.
22 Tosattan u'stine qaraqshılardı jibergenin'de, U'ylerinen dad-pa'riyad esitilsin. Sebebi meni tu'siriw ushın go'r qazdı, Ayag'ımnın' astına tor tasladı.
23 Jaratqan İye, Sen olardın' meni o'ltiriw ushın, Du'zgen barlıq jobaların bilesen'. Olardın' ayıpların keshirme, Gu'nalarına ko'z jumba. Olar Senin' aldın'da qulasın, G'a'zeplengenin'de olarg'a qarsı is tut.
