Eremiya 20 bob
1 Jaratqan İyenin' İbadatxanasının' bas xızmetkeri ruwxaniy İmmer ulı Pashxur Eremiyanın' payg'ambarshılıq etip usı so'zlerdi aytıp atırg'anın esitti.
2 Pashxur Eremiya payg'ambardı urıp, Jaratqan İyenin' İbadatxanasının' Joqarg'ı Benyamin da'rwazası janında bug'awlatıp qoydı.
3 Erten'ine, Pashxur onı bug'awdan bosatqan waqtında, Eremiya og'an bılay dedi: – Jaratqan İye seni Pashxur dep emes, al Magor-Missabib dep atadı.
4 Sebebi Jaratqan İye bılay deydi: «Basın'a tu'setug'ın isler arqalı Men seni ha'm ha'mme dosların'dı qorqınıshqa salaman. Olardın' dushpan qılıshınan qalay qulag'anın o'z ko'zlerin' menen ko'resen'. Men pu'tkil Yahudanı Babiloniya patshasının' qolına beremen. Bul patsha olardı Babilong'a su'rgin qıladı yamasa qılıshtan o'tkeredi.
5 Men bul qalanın' pu'tkil baylıg'ın, mal-mu'lkin, qımbatbaha zatların, Yahuda patshalarının' barlıq g'a'ziynelerin dushpanlarının' qolına beremen. Olardı talan-taraj etip, Babilong'a alıp ketedi.
6 Al Pashxur, sen ha'm u'yin'de jasaytug'ınlardın' ha'mmesi Babiloniyag'a su'rgin qılınasız. Sen de, o'zin' payg'ambarshılıq etken dosların' da sol jerde o'lip, sol jerde jerlenesiz».
7 Jaratqan İye, Sen meni aldadın', Men de aldandım. Sen mennen ku'shlisen', meni jen'din'. Ha'r bir adam u'stimnen ku'lip, Ku'ni boyı meni mazaqlap ju'r.
8 Qashan so'yley baslasam, pa'riyad etemen, «Zorlıq ha'm qırg'ın boladı», – dep baqıraman. Jaratqan İye, Senin' so'zin' sebepli, Ku'n boyı ayaq astı bolıp, ku'lkige qalaman.
9 Eger ishimnen: «Endi Sen tuwralı oylamayman, Senin' atın'nan so'ylemeymen», – desem de, So'zlerin' ju'regimdi ot kibi, Su'yeklerimdi shoq kibi o'rteydi, Onı ishimde saqlawdan sharshadım, Artıq shıday almayman.
10 Ko'plerdin': «Ja'n-jaqtı qorqınısh qaplag'an, U'stinen shag'ım qılın'! Bizler de shag'ım qılayıq!» – degen sıbırlısın esitemen. Sırlas doslarımnın' ha'mmesi, Qulawımdı ku'tip, ko'z tigip: «Ba'lkim ol aldanar, qolg'a tu'ser, Sonda o'shimizdi alarmız», – deydi.
11 Biraq Jaratqan İye, Sen batır jawınger kibi, Menin' menen birgesen', Sonlıqtan meni quwg'ın qılıwshılar su'rnigip, Meni jen'e almaydı. Tabısqa erise almay, Olar qattı uyatqa qaladı, Olardın' ayaq astı bolg'anı, Hesh qashan umıtılmaydı.
12 A'lemnin' Jaratqan İyesi, a'dillerdi sınaytug'ın, Ju'rek-qa'libti anıq ko're alatug'ın Sensen'! Dawamdı isenip Sag'an tapsıraman, Olardan qalay o'sh alg'anın'dı ko'rset mag'an.
13 Jaratqan İyege alg'ıs aytın'! Jaratqan İyege qosıq aytın'! Jaratqan İyeni alg'ıslan'! Sebebi jarlının' janın, Zalımlardın' qolınan Ol qutqaradı.
14 Men tuwılg'an ku'nge na'let jawsın! Anam meni tuwg'an ku'n qutlı bolmasın!
15 «Ullı boldın'», – dep a'keme xabar bergen, Onı quwandırg'an adamg'a na'let jawsın!
16 Sol adam Jaratqan İye ayawsız qırg'an, Qalalarg'a uqsasın. Ol tan' azanda ahıw-nala, Tu'ste urıs su'renin esitsin.
17 O'ytkeni ol anamnın' qursag'ında meni o'ltirmedi. Sonda anam menin' qa'birim bolar edi, Onın' qursag'ı ma'n'gige ha'mile menen qalar edi.
18 Men ne ushın qursaqtan shıqqan ekenmen? Azap ha'm qayg'ını bastan keshirip, Shermendelik penen o'mir su'riw ushın ba?
