Eremiya 22 bob
1 Jaratqan İye mag'an bılay dedi: – Yahuda patshasının' sarayına bar da, mına so'zdi og'an ayan et:
2 «Ha'y, Dawıttın' taxtında otırg'an Yahuda patshası, sen, ha'meldarların' ha'm bul da'rwazadan o'tetug'ın xalqın', Jaratqan İyenin' so'zin tın'lan'!
3 Jaratqan İye bılay deydi: A'dalattı ha'm tuwrılıqtı ju'zege asırın'. Tonalg'andı eziwshinin' qolınan azat etin'. Kelgindige, jetimge ha'm jesirge nahaqlıq qılman' ha'm azar bermen'. Bul jerde ayıpsız qan to'kpen'.
4 ger bul buyrıqtı muqıyat orınlasan'ız, onda Dawıttın' taxtında otırg'an patshalar atlarg'a ha'm arbalarg'a minip, olardın' o'zleri de, xızmetkerleri de, xalqı da usı saray da'rwazalarınan kiredi.
5 Eger bul buyrıqtı orınlamasan'ız, tiriligim haqı ant ishemen, – deydi Jaratqan İye, – bul saray qarabaqanag'a aylanadı.
6 Sebebi Jaratqan İye Yahuda patshasının' sarayı tuwralı bılay deydi: Sen Menin' ko'zime Giladtay, Lebanonnın' shın'ındaysan'. Biraq Men seni sho'l dalag'a, Adamsız qalag'a aylandıraman.
7 Sag'an qurtıwshılardı jiberemen, Ha'r birinin' qolında quralı bar, Olar senin' sarayın'a qollang'an kedrlerin'di, Otqa ılaqtıradı.
8 Ko'p milletler bul qala janınan o'tkende, bir-birine: „Bul ullı qalanı Jaratqan İye ne ushın bunday qıldı eken?“ – deydi.
9 Olarg'a bılay dep juwap beriledi: „Olar o'zlerinin' Qudayı Jaratqan İyenin' kelisimin buzıp, basqa qudaylarg'a tabınıp, olarg'a xızmet etip ketti“».
10 O'lgen patsha ushın joqlaw aytpan', ol ushın aza tutpan', Jaqsısı, tutqın bolg'an patsha ushın jılan', Ol qaytıp kelmeydi, Ana jurtın ko'rmeydi.
11 A'kesi İoshiyanın' ornına Yahudanın' patshası bolg'an ha'm ol jerden shıg'ıp ketken İoshiya ulı Shallum tuwralı Jaratqan İye bılay deydi: «Ol bul jerge qaytıp kelmeydi
12 Ol tutqın qılıp alıp barılg'an jerinde o'ledi ha'm artıq bul jerdi ko'rmeydi».
13 3Sarayın a'dalatsızlıq penen, Joqarg'ı bo'lmelerin nızamsızlıq penen salg'an, Jaqın adamların esheyin jumsap, Miynet haqısın bermegen ha'siret shegedi!
14 «Joqarg'ı bo'lmelerin ken' qılıp, O'zim ushın za'wlim saray salaman», – deydi birew. Og'an ko'p aynalar qoyıp, Kedr ag'ashı menen qaplap, Onı qızıl ren'ge boyaydı.
15 Kedr ag'ashın ko'p qollang'an menen, Patsha bolıp qalasan' ba? A'ken' toyıp iship-jegeni menen, A'dil ha'm tuwrı islerdi isledi, Sonlıqtan isleri tabıslı boldı.
16 Ol jarlı ha'm biysharanın' huqıqın qorg'adı, Sol sebepli abadan turmıs keshirdi. Meni tanıwdın' ma'nisi usı emes pe? – deydi Jaratqan İye. –
17 Biraq senin' ko'zin' ha'm ju'regin', Haram paydanı, ayıpsız qan to'giwdi, Zulım ha'm zorlıq qılıwdı qa'leydi.
18 Sonlıqtan Jaratqan İye Yahuda patshası İoshiya ulı Ehoyakim tuwralı bılay deydi: «Way-way, tuwısqanım! Way-way, bawırım!» – dep, Ol ushın joqlaw aytılmaydı. «Way-way, mırzam! Way-way, taqsırım!» – dep, Ol ushın joqlaw aytıp jılamaydı.
19 Onın' o'ligin Erusalim da'rwazasınan sırtqa shıg'arıp taslap, Eshektin' o'ligin ko'mgendey etip jerleydi.
20 Erusalim, Lebanong'a shıg'ıp, pa'riyad et. Dawısın' Bashannan esitilip tursın, Abarimnen pa'riyad et, Sebebi barlıq oynasların' qırıldı.
21 Abadanshılıqta bolg'anın'da sag'an eskerttim, Biraq sen: «Men tın'lamayman», – dedin'. Jaslıg'ın'nan solay islep, Meni hesh tın'lamadın'.
22 Barlıq basshıların'dı samal ushırıp ketedi, Awqamlasların'dı su'rgin qılıp alıp ketedi. Sonda islegen zulımlıqların' ushın, Uyatqa qalıp, shermende bolasan'.
23 Ha'y, Lebanonda jasap, Onın' kedrine uya salg'an! Tuwıp atırg'an hayaldın' tolg'ag'ı sıyaqlı, Seni shanshıw tutqanda, azaptan ın'ırsıysan'!
24 O'z tiriligim haqı ant ishemen, – deydi Jaratqan İye, – Ha'y, Yahuda patshası Ehoyakimnin' ulı Exoniya, ha'tte, sen on' qolımdag'ı mo'r ju'zigim bolsan' da, seni shıg'arıp ılaqtırg'an bolar edim.
25 Men seni janın'da qastı barlardın' ha'm o'zin' qorqatug'ınlardın', Babiloniya patshası Nabuxodonosordın' ha'm kaldeylerdin' qolına tapsıraman.
26 Seni ha'm seni tuwg'an ananı kindik qanın' tambag'an o'zge bir jurtqa ılaqtıraman. Sizler sol jerde o'lesiz.
27 Sizler bul jerge qaytıp keliwdi a'rman qılasız, biraq qaytıp kele almaysız.
28 Mına adam – Exoniya sınıq gu'zege, Kereksiz buyımg'a aylanıp qalg'an ba? Ne ushın ol ha'm onın' balaları quwılıp, O'zleri bilmeytug'ın jerge ılaqtırıp taslandı?
29 Ha'y elim, elim, elim, Jaratqan İyenin' so'zin tın'la!
30 Jaratqan İye bılay deydi: Bul adamdı zu'ryadsız, O'mirinde isi kelispegen adam, dep jazıp qoy. Sebebi endi onın' na'silinen hesh birinin' jolı bolmas. Hesh biri Dawıttın' taxtına otırmas, Yahudada hu'kimdarlıq qılmas.
