Eremiya 23 bob
1 Jaylawımdag'ı qoylardı nabıt qılıp, tarqatıp jibergen shopanlar ha'siret shegedi! – deydi Jaratqan İye.
2 Sonlıqtan İzraildın' Qudayı Jaratqan İye O'z xalqın baqqan shopanlar haqqında bılay deydi: Sizler Menin' su'riwimdi dag'ıttın'ız, olardı tarqatıp jiberip, g'amxorlıq qılmadın'ız. Men sizlerdi jawız islerin'iz ushın jazalayman, – deydi Jaratqan İye.
3 – Su'riwimnen aman qalg'anların O'zim quwıp jibergen barlıq ellerden jıynap, qaytadan jaylawlarına alıp kelemen. Olar sol jerde ko'beyip, o'sip-o'nedi.
4 Men olardın' u'stinen olardı bag'atug'ın shopanlardı qoyaman. Olar endi qorqıp, qa'weterge tu'speydi ha'm joytılmaydı, – deydi Jaratqan İye.
5 Mine, sonday ku'nler keledi, – deydi Jaratqan İye, – Dawıttın' na'silinen a'dil bir Shaqanı shıg'araman. Sol patsha taxtqa otırıp, danalıq penen basqaradı, Jer ju'zinde a'dalat ha'm tuwrılıq hu'kimdarlıq qıladı.
6 Onın' da'wirinde Yahuda qutqarıladı, İzrail qa'wipsizlikte jasaydı. Onın' atı bılay dep ataladı: «Jaratqan İye – a'dilligimiz».
7 Sonlıqtan sonday ku'nler keledi, – deydi Jaratqan İye, – artıq: «İzraildı Mısırdan alıp shıqqan tiri Jaratqan İye haqı ant ishemen», – dep aytılmaydı.
8 Al: «İzrail xalqın arqadag'ı ellerden ha'm O'zi quwıp jibergen basqa barlıq ellerden alıp shıqqan tiri Jaratqan İye haqı ant ishemen», – dep aytılatug'ın boladı. Solay etip, olar o'z jerlerinde jasaydı.
9 Al: «İzrail xalqın arqadag'ı ellerden ha'm O'zi quwıp jibergen basqa barlıq ellerden alıp shıqqan tiri Jaratqan İye haqı ant ishemen», – dep aytılatug'ın boladı. Solay etip, olar o'z jerlerinde jasaydı.
10 Jer buzıqlarg'a tolı, El na'let zardabınan aza tutpaqta. Sho'ldegi jaylawlar ku'yip ketken. Adamlar jaman jolg'a tu'sip, Ku'shlerin nahaqlıqqa qollanbaqta.
11 Payg'ambarlar da, ruwxaniyler de iplas, Ha'tte, olardın' jamanlıqların, O'z U'yimde de ko'rdim, – deydi Jaratqan İye. –
12 Sonlıqtan ju'rgen jolları olarg'a, Qaran'g'ılıqtag'ı tayg'aq jolday boladı. Sol jerde su'rnigip, jıg'ıladı. Sebebi olardı jazalaytug'ın jılda, Olardın' basına apatshılıq jawdıraman, – deydi Jaratqan İye.
13 Samariya payg'ambarları arasında, Men mına jerkenishli isti ko'rdim: Olar Baaldın' atınan payg'ambarshılıq etip, Xalqım İzraildı joldan azg'ırdı.
14 Al Erusalim payg'ambarları arasında, Bunnan da qorqınıshlıraq isti ko'rdim. Olar buzıqshılıq etip, jalg'ang'a erip, Jamanlıq qılg'anlardı qollap atır. Sonlıqtan hesh kim jamanlıqtan qol u'zbeydi. Olardın' ha'mmesi Men ushın Sodomday, Onın' turg'ınları Gomoraday bolıp ketti.
15 Sonın' ushın, payg'ambarlar haqqında A'lemnin' Jaratqan İyesi bılay deydi: Men bul xalıqqa ashshı juwsan jegizip, Za'ha'rli suw ishkizemen. O'ytkeni Erusalim payg'ambarlarının' iplaslıg'ı, Pu'tkil jer ju'zine jayıldı.
16 Sonlıqtan A'lemnin' Jaratqan İyesi bılay deydi: Payg'ambarlar sizlerge so'ylegende, qulaq salman', Olar sizlerdi bosqa u'mitlendiredi. Olar Menin' so'zlerimdi emes, O'zleri qıyal etken ayanlardı aytıp ju'r.
17 Olar Menin' so'zimdi hu'rmet etpeytug'ınlarg'a, «Jaratqan İye: Sizlerde paraxatshılıq boladı, – dep ayttı», – deydi. Ju'reklerinin' qaysarlıg'ı menen jasaytug'ınlardın' ha'mmesine: «Apat kelmeydi», – deydi.
18 Kim Jaratqan İyenin' ken'esinde qatnasıptı? Kim Onı ko'rip, so'zin esitipti?
19 Mine, Jaratqan İyenin' g'a'zebi dawılday du'bep, Quyın sıyaqlı zalımlardın' basına do'nedi.
20 Ju'rektegi niyetin tolıq iske asırmag'ansha, Jaratqan İyenin' g'a'zep otı so'nbeydi. Sizler bunı waqtı kelgende anıq tu'sinesiz.
21 Bul payg'ambarlardı Men jibermedim, Olardın' o'zleri ortag'a shıg'ıwg'a asıqtı. Men hesh na'rse aytpasam da, Olar payg'ambarshılıq ete berdi.
22 Eger olar Menin' ken'esimde bolg'anda, Xalqıma Menin' so'zlerimdi aytıp, Olardı jaman jollarınan, Jawızlıqlarınan qaytarg'an bolar edi.
23 Men tek jaqın jerde g'ana Quday bolıp, Alısta Quday emespen be? – deydi Jaratqan İye. –
24 Qupıya jerge jasırıng'andı, Meni ko'rmeydi dep oylaysız ba? – deydi Jaratqan İye. – Aspan menen jerdi Men toltırmayman ba? – deydi Jaratqan İye.
25 Menin' atımnan jalg'an payg'ambarshılıq etken payg'ambarlardın' ne aytıp ju'rgenin esittim. Olar: «Men tu's ko'rdim! Men tu's ko'rdim!» – deydi.
26 O'tirik payg'ambarshılıqtı aytıp, o'z qıyalların ja'riyalaytug'ın payg'ambarlardın' ju'rektegi jalg'an oy-qıyalları qashang'a deyin dawam etedi?
27 Ata-babaları Baalg'a tabınıw arqalı Menin' atımdı umıtqanı sıyaqlı, olar da bir-birine aytqan tu'sleri arqalı xalqıma Menin' atımdı umıttırmaqshı boladı.
28 Tu's ko'rgen payg'ambar tu'sin aytsın, al Menin' so'zimdi esitken, onı sadıq bayan etsin. Kepek penen da'nnin' arasında u'lken ayırmashılıq bar – deydi Jaratqan İye.
29 – Menin' so'zim jalıng'a, – deydi Jaratqan İye, – jartastı maydalaytug'ın sho'kkishke uqsamay ma? – deydi Jaratqan İye.
30 – Sonın' ushın, – deydi Jaratqan İye, – Men bir-birinen so'zimdi urlag'an payg'ambarlarg'a qarsıman.
31 – Awa, Men o'z so'zlerin aytıp, «Jaratqan İye ayttı», deytug'ın payg'ambarlarg'a qarsıman, – deydi Jaratqan İye.
32 – Awa, Men jalg'an tu'sler menen payg'ambarshılıq etetug'ınlarg'a qarsıman, – deydi Jaratqan İye. – Olar o'z tu'slerin aytıp, jalg'an so'zleri ha'm bos u'gitleri menen Menin' xalqımdı joldan azg'ıradı. Olardı Men jibermedim, olarg'a Men tapsırma bermedim. Olardın' bul xalıqqa hasla paydası joq, – deydi Jaratqan İye.
33 – Eger sennen bul xalıq, payg'ambar yamasa ruwxaniy: «Jaratqan İye sag'an qanday awır payg'ambarshılıq ju'kledi?» – dep sorasa, sen olarg'a: «Sizlerdin' o'zlerin'iz Mag'an ju'ksizler. Men sizlerdi ta'rk etemen, – deydi Jaratqan İye» – dep juwap ber.
34 Eger bir payg'ambar, ruwxaniy yamasa xalıq ishinen biri: «Bul Jaratqan İyenin' payg'ambarshılıq ju'gi», – dese, onda Men sol adamdı ha'm onın' u'y-ishin jazalayman.
35 Sizler birbirin'izge ha'm tuwısqan tuwısqang'a: «Jaratqan İye ne dep juwap berdi? Yamasa Jaratqan İye ne dedi?» – dep aytın'lar.
36 Biraq bunnan bılay: «Jaratqan İyenin' payg'ambarshılıq ju'gi», – degen so'zdi qollanban'. Sebebi ha'r kimnin' o'z so'zi o'zine ju'k boladı. Bul arqalı sizler tiri Qudaydın', Qudayımız A'lemnin' Jaratqan İyesinin' so'zin burmalap taslaysız.
37 Payg'ambardan tek: «Jaratqan İye sag'an ne dep juwap berdi? Yamasa Jaratqan İye ne dedi?» – dep soran'lar.
38 Eger sizler: «Jaratqan İyeden kelgen ju'k», – dep ayta beretug'ın bolsan'ız, onda Jaratqan İye sizlerge bılay deydi: Men sizlerge: «Jaratqan İyenin' payg'ambarshılıq ju'gi», – degen so'zdi aytpawdı buyırsam da, sizler «Jaratqan İyeden kelgen ju'k», – degen so'zdi ja'ne ayttın'ız.
39 Sonlıqtan Men joqarıg'a ko'terip, sizlerdi o'zlerin'izge ha'm ata-babaların'ızg'a bergen qala menen birge da'rgayımnan ılaqtırıp taslayman.
40 Men sizlerdi ma'n'gige isnatqa qoyıp, ma'n'gige umıtılmaytug'ın shermendelikke qaldıraman.
