Eremiya 26 bob
1 Yahuda patshası İoshiyanın' ulı Ehoyakimnin' patshalıg'ının' basında Eremiyag'a Jaratqan İyenin' so'zi ayan boldı.
2 Jaratqan İye bılay dedi: – Menin' U'yimnin' ha'wlisine barıp tur da, Yahuda qalalarınan sıyınıw ushın sol jerge kelgenlerdin' ha'r birine sag'an aytıwdı buyırg'an so'zlerimnin' birde birewin qaldırmay, ha'mmesin ayt.
3 Olar qulaq salıp, ha'r biri jaman jolınan qaytıwı mu'mkin. Sonda Men ırayımnan qaytıp, olardın' jawız isleri ushın jawdırmaqshı bolg'an apattı jibermeymen.
4 Olarg'a ayt: «Jaratqan İye bılay deydi: Eger sizler Meni tın'lamasan'ız ha'm o'zlerin'izge bergen Nızamımdı orınlamasan'ız,
5 qayta-qayta jibergen qullarım bolg'an payg'ambarlarımnın' so'zlerine qulaq aspawdı dawam etsen'iz,
6 onda Men bul U'ydi Shilo sıyaqlı joq qılaman. Bul qalanı bolsa, jer ju'zinin' pu'tkil milletleri ushın na'letiy qılaman».
7 Ruwxaniyler, payg'ambarlar ha'm pu'tkil xalıq Jaratqan İyenin' U'yinde Eremiyanın' aytqan bul so'zlerin esitti.
8 Eremiya Jaratqan İyenin' pu'tkil xalıqqa ayt dep o'zine buyırg'an so'zlerinin' ha'mmesin aytıp bolıwdan, ruwxaniyler, payg'ambarlar ha'm pu'tkil xalıq Eremiyanı tutıp alıp: – Sen so'zsiz o'lesen'!
9 Nege sen: «Bul U'y Shiloday boladı, al bul qala adamsız qarabaqanag'a aylanadı», – dep, Jaratqan İyenin' atınan payg'ambarshılıq etesen'? – dedi. Jaratqan İyenin' U'yinde pu'tkil xalıq Eremiyanın' aynalasına toplandı.
10 Yahuda basshıları bunı esitkende, olar patshanın' sarayınan Jaratqan İyenin' U'yine keldi ha'm Jaratqan İyenin' U'yinin' Taza da'rwazasının' kirer awzındag'ı o'z orınlarına otırdı.
11 Sonda ruwxaniyler menen payg'ambarlar basshılarg'a ha'm pu'tkil xalıqqa: – O'z qulaqların'ız benen esitkenin'izdey, bul adam usı qalag'a qarsı payg'ambarshılıq qıldı. Sonlıqtan bul adam o'lim jazasına ılayıqlı! – dedi.
12 Sonda Eremiya barlıq basshılarg'a ha'm pu'tkil xalıqqa bılay dedi: – Jaratqan İye meni bul U'y ha'm qala haqqında jan'a esitken so'zlerin'izdi payg'ambarshılıq etiw ushın jiberdi.
13 Endi jolların'ızdı ha'm islerin'izdi du'zetip, Qudayın'ız Jaratqan İyege qulaq salın'. Sonda Jaratqan İye de ırayınan qaytıp, sizlerge jiberemen degen apatın jiberiwden waz keshedi.
14 Mag'an kelsek, men sizlerdin' qolın'ızdaman, ko'zin'izge ne jaqsı ha'm durıs bolıp ko'rinse, sonı islen'.
15 Biraq mınanı bilip qoyın': eger meni o'ltirsen'iz, bul qala da, onın' turg'ınları da, sizler de to'gilgen biygu'na qan ushın juwapker bolasız. Haqıyqattan da, bul so'zlerdin' ha'mmesin qulag'ın'ızg'a jetkeriw ushın meni Jaratqan İye sizlerge jiberdi.
16 Sonda basshılar menen pu'tkil xalıq ruwxaniyler menen payg'ambarlarg'a: – Bul adam o'limge hu'kim etilmewi kerek. Ol bizlerge Qudayımız Jaratqan İyenin' atınan so'yledi, – dedi.
17 Sonda sol jerdin' aqsaqallarınan bir neshesi aldıg'a shıg'ıp, jıynalg'an xalıqqa bılay dedi:
18 – Yahuda patshası Xizkiyanın' da'wirinde moreshetli Mixa payg'ambarshılıq etip, pu'tkil Yahuda xalqına bılay degen edi: «A'lemnin' Jaratqan İyesi bılay deydi: Sion egin maydanı kibi su'rilip, Erusalim qarabaqanag'a aylanadı, İbadatxana turg'an tawdı, Tog'ay qaplaydı».
19 Bunın' ushın Yahuda patshası Xizkiya yamasa Yahuda xalqınan biri Mixanı o'ltirip pe edi? Qaytama, Xizkiya Jaratqan İyeden qorqıp, Onnan rehim sorag'an joq pa edi? Jaratqan İye de ırayınan qaytıp, olarg'a jiberemen degen apatın jibermey qoyg'an joq pa edi? Bizler bolsaq, o'zimizge u'lken apat jawdırayın dep turmız.
20 Kiryat-Yarimnen Shemaya ulı Uriya degen bir adam da Jaratqan İyenin' atınan payg'ambarshılıq qılıp ju'rgen edi. Ol da tap Eremiyag'a uqsap, bul qala ha'm elge qarsı payg'ambarshılıq qıldı.
21 Patsha Ehoyakim o'zinin' a'skerbasıları ha'm barlıq ha'meldarları menen onın' so'zlerin esitkende, onı o'ltirmekshi boldı. Uriya bunı esitkende qorqıp ketip, Mısırg'a qashıp ketti.
22 Patsha Ehoyakim Axbor ulı Elnatandı bir neshe adamlar menen Mısırg'a jiberdi.
23 Olar Uriyanı Mısırdan alıp shıg'ıp, Ehoyakim patshag'a alıp keldi. Ol Uriyanı qılısh penen o'ltirip, denesin qarapayım xalıq jerlenetug'ın mazarg'a ılaqtırdı.
24 Biraq Shafan ulı Axiqam Eremiyanı qorg'ag'anı sebepli, Eremiya o'ltiriliw ushın xalıqtın' qolına berilmedi.
