Eremiya 28 bob

Jalg'an payg'ambar Xananiya (1-17).

¹ Sol jılı, to'rtinshi jıldın' besinshi ayında, Yahuda patshası Sedekiyanın' patshalıg'ının' basında, gibonlı Azzur ulı payg'ambar Xananiya Jaratqan İyenin' İbadatxanasındag'ı ruwxaniyler menen xalıqtın' aldında mag'an bılay dedi:

² – İzraildın' Qudayı A'lemnin' Jaratqan İyesi bılay deydi: «Babiloniya patshasının' moyıntırıg'ın sındıraman.

³ Eki jıl o'tpey, Babiloniya patshası Nabuxodonosor bul jerden Babilong'a alıp ketken Jaratqan İyenin' İbadatxanasına tiyisli zatlardın' ha'mmesin qaytarıp alıp kelemen.

⁴ Ja'ne Yahuda patshası Ehoyakimnin' ulı Exoniya menen Babilong'a su'rgin etilgen pu'tkil yahudalılardı bul jerge qaytarıp alıp kelemen, – deydi Jaratqan İye. – Men Babiloniya patshasının' moyıntırıg'ın sındırıp taslayman».

⁵ Sonda men, Eremiya payg'ambar Jaratqan İyenin' İbadatxanasında turg'an ruwxaniylerdin' ha'm pu'tkil xalıqtın' aldında payg'ambar Xananiyag'a

⁶ bılay dedim: – Awmiyin! Jaratqan İyenin' aytqanı kelsin! Jaratqan İye O'z İbadatxanasınan alıp ketilgen zatlardı ha'm tutqınlardı Babilonnan bul jerge qaytarıp, senin' payg'ambarshılıq etip aytqan so'zlerin'di a'melge asırsın.

⁷ Biraq menin' sag'an ha'm mına xalıqtın' ha'mmesine aytatug'ın so'zimdi tın'la.

⁸ Mennen de, sennen de burın jasap ketken payg'ambarlar ko'p jerlerge ha'm ullı patshalıqlarg'a qarsı urıs, ashlıq ha'm illet boladı dep payg'ambarshılıq etken.

⁹ Biraq tınıshlıq boladı, dep payg'ambarshılıq etken payg'ambardın' so'zi ju'zege asqannan keyin g'ana, sol payg'ambardı haqıyqattan da Jaratqan İye jibergeni belgili bolg'an edi

¹⁰ Sonda Xananiya payg'ambar Eremiya payg'ambardın' moynındag'ı moyıntırıqtı alıp, sındırdı da,

¹¹ toplanıp turg'an xalıqqa bılay dedi: – Jaratqan İye bılay deydi: «Eki jıl o'tpey, Men Babiloniya patshası Nabuxodonosordın' moyıntırıg'ın barlıq milletlerdin' moynınan alıp, usılay sındıraman». Bunnan keyin, Eremiya o'z jolı menen ketti.

¹² Xananiya payg'ambar Eremiya payg'ambardın' moynındag'ı moyıntırıqtı sındırg'anınan keyin ko'p o'tpey, Eremiyag'a Jaratqan İyeden so'z tu'sti:

¹³ – Barıp, Xananiyag'a ayt: «Jaratqan İye bılay deydi: Sen ag'ashtan islengen moyıntırıqtı sındırdın', endi onın' ornın temirden islengen moyıntırıq iyeleydi.

¹⁴ İzraildın' Qudayı, A'lemnin' Jaratqan İyesi bılay deydi: Men bul milletlerdin' ha'mmesin Babiloniya patshası Nabuxodonosorg'a xızmet etiwge ma'jbu'rlew ushın, moynına temir moyıntırıq saldım, olar og'an xızmet etedi. Ha'tte, jabayı haywanlardı da onın' ıqtıyarına tapsırdım».

¹⁵ Eremiya payg'ambar Xananiya payg'ambarg'a bılay dedi: – Qulaq sal, Xananiya! Seni Jaratqan İye jibermedi, sen bul xalıqtı jalg'ang'a iseniwge ma'jbu'r qıldın'.

¹⁶ Sonın' ushın Jaratqan İye bılay deydi: «Men seni jer betinen sıpırıp taslayman. Jaratqan İyege qıyanet etiwge shaqırg'anın' ushın, usı jılı-aq o'lesen'».

¹⁷ Solay etip, sol jıldın' jetinshi ayında Xananiya du'nyadan o'tti.