Eremiya 30 bob
1 Eremiyag'a Jaratqan İyeden so'z tu'sti.
2 İzraildın' Qudayı Jaratqan İye bılay dedi: – Sag'an aytqan so'zlerimnin' ha'mmesin bir orama kitapqa jaz.
3 Sonday ku'nler keledi, – deydi Jaratqan İye, – xalqım İzrail menen Yahudanın' burıng'ı abadanshılıg'ın qayta tikleymen. Men olardı atababalarına bergen jerime qaytarıp alıp kelemen, olar sol jerge iyelik qıladı, – deydi Jaratqan İye.
4 İzrail ha'm Yahuda haqqında Jaratqan İye aytqan so'zler mınalar:
5 «Jaratqan İye bılay deydi: Sizler tınıshlıq emes, Ala-sapıran ha'm qorqınısh dawısın esitip tursız.
6 Endi soran' ha'm ko'rin'! Erkek bala tuwa ma? Nege tolg'aq tutqan hayalday, Ha'r bir erkektin' qolın belinde ko'rip turman? Nege ha'mmesinin' ju'zi solg'ın?
7 Qanday qorqınıshlı ku'n! Og'an uqsag'an ku'n basqa bolmag'an. Bul Yaqıp urpag'ı ushın apat waqtı, Biraq olar onnan qutqarıladı.
8 Sol ku'ni, – deydi A'lemnin' Jaratqan İyesi, – Men moynın'dag'ı moyıntırıqtı sındıraman, Bug'awlardı qoparaman. Artıq basqa milletlerge xızmet etpeydi.
9 Onın' ornına, Qudayı Jaratqan İyege, Men taxtqa otırg'ızg'an, Dawıt a'wladınan bolg'an patshag'a xızmet etedi.
10 Sen, qulım Yaqıp, qorqpa, – deydi Jaratqan İye, – Qa'weterlenbe, İzrail! Men seni qutqarıp, uzaq elden, Urpaqların'dı tutqın bolg'an elinen qaytaraman.Yaqıp, sen qaytıp kelesen', Biyqa'ter ha'm tınısh jasaysan'. Seni qorqıtatug'ınlar da bolmaydı.
11 Al Men senin' menen birgemen, – deydi Jaratqan İye, – Seni qutqaraman. Seni arasına shashqan, Millettin' ba'rin joq qılaman. Tek seni joq qılmayman. Biraq seni a'dalatlıq penen ta'rbiyalayman, Seni jazasız qoymayman.
12 Jaratqan İye bılay deydi: Jaraqatların' shıpasız, Jaran' awır.
13 Senin' dawan'dı hesh kim qorg'amaydı, Jaran'a shıpa beretug'ın da'ri joq, Sag'an hesh qanday shıpa joq.
14 Oynasların'nın' ha'mmesi seni umıttı, Olar seni izlemeydi. Ayıbın' awır, Gu'nan' sheksiz bolg'anı ushın, Seni dushpan kibi soqqıladım, Ayawsız jazaladım.
15 Nege jaraqatın' ushın, Shıpasız da'rtin' ushın pa'riyad etesen'? Qılmısın' awır, Gu'nan' sheksiz bolg'anı ushın, Sag'an solay isledim.
16 Biraq seni jalmag'anlar, jalmanadı, Barlıq dushpanların', Olardın' ha'r biri su'rgin etiledi. Seni talag'anlar, talanadı, Seni olja qılg'anlardın' o'zlerin, Men olja qılaman.
17 Seni: „Taslap ketilgen“, – dep atap, „Sionnın' hesh kimge keregi joq“, – dep aytsa da, Men sag'an shıpa berip, Da'rtin'nen jazaman, – deydi Jaratqan İye.
18 Jaratqan İye bılay deydi: Men Yaqıptın' shatırının' abadanshılıg'ın qayta tikleymen, Onın' turaq jaylarına rehim etemen. Qala qarabaqanaları u'stine qayta qurıladı, Burıng'ı ornına saray salınadı.
19 Olardan ta'riyiplew qosıqları, Quwanısh sesleri esitiledi. Men olardı ko'beytemen, endi azaymaydı, Olardı abıraylı qılaman, ayaq astı bolmaydı.
20 Balaları burıng'ıday o'mir su'redi, Ja'miyeti aldımda bekkemlenedi. Olarg'a ja'bir ko'rsetkenlerdi jazalayman.
21 Ko'semi olardın' o'zinen boladı, Hu'kimdarı olardın' arasınan shıg'adı. Men onı jaqınlataman, Ol Mag'an jaqın boladı, O'zinshe Mag'an jaqınlawg'a kim ju'rek etedi? – deydi Jaratqan İye. –
22 Sizler Menin' xalqım bolasız, Men sizlerdin' Qudayın'ız bolaman».
23 Mine, Jaratqan İyenin' dawılı, G'a'zepke minip, ko'terildi. Ku'shli quyın ko'terilip, Nahaqlardın' basına do'nedi.
24 Ju'rektegi niyetin a'melge asırmag'ansha, Jaratqan İyenin' lawlag'an g'a'zebi so'nbeydi. Waqtı kelgende sizler bunı tu'sinesiz.
