Eremiya 34 bob
1 Babiloniya patshası Nabuxodonosor o'zinin' barlıq la'shkerleri, qol astındag'ı jerlerdin' barlıq patshalıqları ha'm xalıqları menen birge Erusalim ha'm onın' do'geregindegi qalalarg'a qarsı urısıp atırg'an waqıtta, Jaratqan İyeden Eremiyag'a so'z tu'sti:
2 – İzraildın' Qudayı Jaratqan İye bılay deydi: Yahuda patshası Sedekiyag'a barıp ayt: «Jaratqan İye bılay deydi: Men bul qalanı Babiloniya patshası Nabuxodonosordın' qolına tapsıraman. Ol qalag'a ot qoyadı.
3 Sen onın' qolınan qutıla almaysan', so'zsiz tutıp alınıp, og'an tapsırılasan'. Sen Babiloniya patshasın o'z ko'zlerin' menen ko'resen', onın' menen ju'zbe-ju'z so'ylesesen'. Sen Babilong'a alıp ketilesen'».
4 Degen menen, Yahuda patshası Sedekiya, Jaratqan İyenin' mına so'zin de tın'la, Sen tuwralı Jaratqan İye bılay deydi: – Sen qılıshtan qaza tappaysan',
5 tınıshlıq penen ko'z jumasan'. Sag'an deyingi bolg'an patshalardın', ata-babaların'nın' hu'rmetine qalay ot jag'ılg'an bolsa, senin' hu'rmetin'e de solay ot jag'ılıp: Way-way taqsırım! – dep joqlaw aytıladı. Bunı Men, Jaratqan İye aytıp atırman.
6 Eremiya payg'ambar bulardın' ha'mmesin Erusalimdegi Yahuda patshası Sedekiyag'a aytıp berdi.
7 Sol waqıtta Babiloniya patshasının' la'shkerleri Erusalim menen, Yahudanın' ele ta'slim bolmag'an qalaları Laxish ha'm Azeqa menen urısıp atırg'an edi. Yahudanın' qorg'anlı qalalarınan tek usılar qalg'an edi.
8 Sedekiya patsha Erusalimdegi pu'tkil xalıq penen kelisim du'zip, qullardı azat etiwdi ja'riyalag'annan keyin, Eremiyag'a Jaratqan İyeden so'z tu'sti.
9 Bul kelisim boyınsha, ha'r bir adam o'zinin' evrey qulın ha'm shorısın azat etip, hesh kim artıq o'z tuwısqanı bolg'an yahudalını qullıqta uslamawı tiyis edi.
10 Pu'tkil basshılar ha'm xalıq bul kelisimge boysınıp, o'zlerinin' qul ha'm shorıların azat etiwge ha'm olardı artıq qullıqta uslamawg'a ırazı boldı ha'm olardı azatlıqqa shıg'ardı.
11 Biraq keyin pikirinen qaytıp, azatlıqqa shıg'arg'an qulların ha'm shorıların ma'jbu'rlep alıp kelip, olardı ja'ne qulg'a aylandırdı.
12 Sonda Eremiyag'a Jaratqan İyeden so'z tu'sti:
13 – İzraildın' Qudayı Jaratqan İye bılay deydi: Men ata-babaların'ızdı Mısırdan, qul bolg'an jerinen alıp shıqqanımda, olar menen kelisim du'zip:
14 «O'zlerin sizlerge qul etip satıp, altı jıl sizlerge xızmet etken evrey tuwısqanın'ızdı jetinshi jılı azatlıqqa shıg'arın'», – degen edim. Biraq ata-babaların'ız Meni tın'lamadı, qulaq aspadı.
15 Endi sizler ta'wbe qılıp, ha'r birin'iz o'z tuwısqanın'ızdın' azatlıg'ın ja'riyalap, Menin' na'zerimde tuwrı bolg'an isti isledin'iz. Menin' atım menen atalg'an İbadatxanamda, aldımda turıp kelisim du'zdin'iz.
16 Keyin so'zin'izden tanıp, Menin' atıma isnat keltirdin'iz. Sizler azat etkennen keyin, o'zleri qa'legen jerge ketken qul ha'm shorıların'ızdı qaytarıp alıp kelip, qul bolıwg'a ma'jbu'rledin'iz.
17 Sonlıqtan Jaratqan İye bılay deydi: – Mag'an qulaq salmadın'ız, ha'r birin'iz tuwısqanın'ızdı ha'm qon'sın'ızdı bosatıp jibermedin'iz. Sol sebepli Men sizlerdi qılısh, oba ha'm ashlıqqa qaray bosatatug'ınımdı ja'riyalayman, – deydi Jaratqan İye. – Sizlerdi ko'rgen jer ju'zindegi barlıq patshalıqlar qorqınıshqa tu'sedi.
18 Kelisim du'zgende tananı ekige bo'lip, onın' arasınan o'tken edin'iz. Men kelisimimdi buzıp, aldımda du'zgen kelisim sha'rtlerin orınlamag'anlardı sol tana kibi ekige bo'lemen.
19 Tananın' eki bo'legi arasınan o'tken Yahuda ha'm Erusalim basshıların, saray xızmetkerlerin, ruwxaniylerin ha'm bul jerdin' pu'tkil xalqın.
20 dushpanlarının' ha'm janın almaqshı bolg'anlardın' qolına beremen. Olardın' deneleri aspandag'ı quslarg'a ha'm jerdegi haywanlarg'a jem boladı.
21 Yahuda patshası Sedekiyanı ha'm onın' ha'meldarların olardın' dushpanlarına ha'm janın almaqshı bolg'anlardın' qolına, sizlerden shegingen Babiloniya patshasının' la'shkerlerine tapsıraman.
22 Men buyrıq berip, – deydi Jaratqan İye, – babilonlılardı bul qalag'a qaytıp alıp kelemen. Olar qalag'a hu'jim etip, onı qolg'a aladı ha'm jag'ıp jiberedi ha'm Men Yahuda qalaların adam jasamaytug'ın sho'lge aylandıraman.
