Eremiya 36 bob
1 Yahuda patshası İoshiya ulı Ehoyakimnin' patshalıg'ının' to'rtinshi jılında Eremiyag'a Jaratqan İyeden so'z tu'sti:
2 – Orama qag'az alıp, İoshiyanın' da'wirinde senin' menen so'ylesken ku'nimnen baslap, usı ku'nge shekemgi İzrail, Yahuda ha'm pu'tkil milletler haqqında aytqanlarımnın' ha'mmesin jazıp qoy
3 Ba'lkim Yahuda xalqı baslarına jawdırmaqshı bolg'an barlıq ba'le-qadalar haqqında esitkende, jaman jolınan qaytar, Men de olardın' ayıpların ha'm gu'naların keshirermen.
4 Eremiya Neriya ulı Baruxtı shaqırdı. Barux Eremiyanın' awzınan Jaratqan İyenin' aytqan so'zlerinin' ha'mmesin orama qag'azg'a jazdı.
5 Keyin Eremiya Baruxqa bılay dep buyırdı: – Mag'an Jaratqan İyenin' İbadatxanasına kiriw qadag'an.
6 Sonlıqtan sen barıp, menin' awzımnan jazıp alg'an Jaratqan İyenin' so'zlerin oraza ku'ni Jaratqan İyenin' İbadatxanasında xalıqqa dawıslap oqıp ber. Onı o'z qalalarınan kelgen pu'tkil Yahuda xalqına dawıslap oqıp ber.
7 Ba'lkim, olar Jaratqan İyenin' aldında jalbarınar, jawız jollarınan qaytar. Sebebi Jaratqan İyenin' bul xalıqqa ja'riyalag'an qa'ha'r-g'a'zebi ullı.
8 Neriya ulı Barux Eremiya payg'ambardın' tapsırmasın tolıq orınladı. Ol Jaratqan İyenin' İbadatxanasına barıp, orama qag'azdag'ı Jaratqan İyenin' so'zlerin oqıdı.
9 Yahuda patshası İoshiya ulı Ehoyakimnin' patshalıg'ının' besinshi jılının' tog'ızınshı ayında Erusalimnen ha'm Yahuda qalalarınan kelgen barlıq xalıq Jaratqan İyenin' aldında oraza ja'riyalag'an edi.
10 Sonda Barux Jaratqan İyenin' İbadatxanasının' Taza da'rwazası janındag'ı joqarg'ı ha'wlide jaylasqan Shafan ulı xatker Gemariyanın' bo'lmesinde turıp, orama qag'azdan Eremiyanın' so'zlerin pu'tkil xalıqqa dawıslap oqıp berdi.
11 Shafannın' aqlıg'ı Gemariyanın' ulı Mixa orama qag'azdag'ı Jaratqan İyenin' so'zlerin esitkende,
12 patsha sarayındag'ı xatkerler bo'lmesine bardı. Ol jerde barlıq basshılar: patsha xatkeri Elishama, Shemaya ulı Delaya, Axbor ulı Elnatan, Shafan ulı Gemariya, Xananiya ulı Sedekiya ha'm barlıq saray ha'meldarları otırg'an edi.
13 Barux orama qag'azdan xalıqqa oqıp bergende esitken barlıq so'zlerin Mixa olarg'a aytıp berdi.
14 Ha'meldarlar: «Xalıqqa oqıp bergen orama qag'azdı alıp, kel», – dep aytıw ushın, Kushiydin' shawlıg'ı Shelemiyanın' aqlıg'ı Nataniya ulı Yahudiydi Baruxqa jiberdi. Neriya ulı Barux orama qag'azdı alıp, olarg'a keldi.
15 Ha'meldarlar Baruxqa: – Endi otırıp, bizlerge de oqıp ber, – dedi. Barux olarg'a da oqıp berdi.
16 Olar bul so'zlerdi aqırına deyin tın'lag'annan son', qorqısıp, bir-birine qarap, Baruxqa: – Bizler patshanı so'zsiz bul so'zlerden xabardar qılıwımız kerek, –dedi.
17 Keyin olar Baruxtan: – O'tinemiz, bizlerge ayt, Eremiyanın' awzınan shıqqan bul so'zlerdin' ha'mmesin sen qalay jazıp aldın'?
18 Barux olarg'a bılay dep juwap berdi: – Ol bul so'zlerdin' ha'mmesin mag'an aytıp turdı, men olardı sıya menen orama qag'azg'a jazıp aldım.
19 Sonda saray ha'meldarları Baruxqa: – Barıp, Eremiya ekewin'iz de jasırının'. Qay jerde ekenin'izdi hesh kim bilmesin, – dedi.
20 Ha'meldarlar orama qag'azdı xatker Elishamanın' bo'lmesinde qaldırıp, patsha sarayının' ha'wlisine bardı ha'm patshag'a ha'mmesin bayan qıldı.
21 Patsha Yahudiydi orama qag'azdı alıp keliwge jiberdi. Yahudiy onı xatker Elishamanın' bo'lmesinen alıp kelip, patshag'a ha'm onın' janında turg'an barlıq ha'meldarlarg'a oqıp berdi.
22 Sol waqıtta, tog'ızınshı ayda patsha qısqı sarayındag'ı ot janıp turg'an oshaqtın' janında otırg'an edi.
23 Yahudiy orama qag'azdan u'sh yamasa to'rt bo'lekti oqıp bolıwdan, patsha olardı xatkerinin' pıshag'ı menen kesip, otqa taslay berdi. Ol orama qag'azdın' ha'mmesin jag'ıp bolg'ansha solay isledi.
24 Bul so'zlerdi esitkende patsha da, onın' qasındag'ı xızmetkerlerdin' hesh biri de qorqpadı, qayg'ırıp kiyimlerin jırtpadı.
25 Elnatan, Delaya ha'm Gemariya patshadan orama qag'azdı jag'ıp jibermewdi o'tindi, biraq patsha olardı tın'lamadı.
26 Bunın' ornına patsha shahzada Eraxmeelge, Azriel ulı Serayag'a ha'm Abdeel ulı Shelemiyag'a Eremiya payg'ambardı ha'm xatker Baruxtı tutıp alıp keliwdi buyırdı. Biraq Jaratqan İye olardı jasırıp qoydı.
27 Eremiyanın' awzınan Barux jazıp alg'an so'zler jazılg'an orama qag'azdı patsha jag'ıp jibergennen son', Eremiyag'a Jaratqan İyeden so'z tu'sti:
28 – Basqa bir orama qag'az alıp, og'an birinshi orama qag'azdag'ı, Yahuda patshası Ehoyakim jag'ıp jibergen orama qag'azdag'ı so'zlerdin' ba'rin jaz.
29 Yahuda patshası Ehoyakimge bolsa, Jaratqan İye bılay deydi dep ayt: «Orama qag'azda: „Babiloniya patshası so'zsiz keledi, bul jerdi wayran etip, adamlardı ha'm haywanlardı qırıp taslaydı“, – dep jazılg'anı ushın Eremiyag'a aybat etip qag'azdı o'rtep tasladın'.
30 Sonlıqtan Jaratqan İye Yahuda patshası Ehoyakim haqqında bılay deydi: „Onın' na'silinen hesh kim Dawıttın' taxtına otırmaydı, denesi ku'ndizdin' ja'ziyrama ıssısına, tu'nnin' ayazına taslanadı.
31 Ayıpları ushın onın' o'zin, urpaqların ha'm xızmetkerlerin jazalayman. Olar tuwralı aytqan barlıq apatshılıqlardı olardın' o'zlerinin', Erusalim turg'ınları menen Yahuda xalqının' basına jawdıraman. Sebebi olar Mag'an qulaq aspadı“».
32 Eremiya basqa orama qag'az alıp, Neriya ulı xatker Baruxqa berdi. Barux Yahuda patshası Ehoyakim otqa jaqqan orama qag'azdag'ı barlıq so'zlerdi Eremiyanın' awzınan jazıp aldı. Biraq bul so'zlerge a'welgige uqsag'an ko'plegen so'zler qosılg'an edi.
