Eremiya 43 bob
1 Eremiya pu'tkil xalıqqa o'zlerinin' Qudayı Jaratqan İyenin' so'zlerin, o'zlerinin' Qudayı Jaratqan İyenin' o'zin jiberip ayttırg'an so'zlerin tolıq aytıp bolg'anda,
2 Hoshaya ulı Azariya, Qareax ulı Yuxanan ha'm surbet adamlardın' ha'mmesi Eremiyag'a bılay dedi: – Sen jalg'an aytıp tursan'. Qudayımız Jaratqan İye seni bizlerge: «Mısırg'a barıp jasaman'», – dep aytıw ushın jibergen joq.
3 Kaldeyler bizlerdi o'ltirsin yamasa Babiloniyag'a tutqın etip alıp ketsin dep, bizlerdi olardın' qolına tapsırıw ushın Neriya ulı Barux seni bizlerge qarsı iytermelemekte.
4 Solay etip, Qareax ulı Yuxanan, a'skerbasılar ha'm pu'tkil xalıq Jaratqan İyenin' Yahudada qalıw tuwralı aytqan buyrıg'ına qulaq aspadı.
5 Yahudada jasaw ushın tarap ketken jerlerinen qaytıp kelgen yahudiylerdin' aman qalg'anlarının' ha'mmesin Qareax ulı Yuxanan ha'm a'skerbasılar ertip ketti.
6 Bulardan tısqarı, olar babilonlı saqshılar baslıg'ı Nabuzaradannın' Shafannın' aqlıg'ı Axiqam ulı Gedaliyanın' qasında qaldırıp ketken adamlarının' ha'mmesin: erkek ha'm hayallardı, balalardı, patshanın' qızların, Eremiya payg'ambardı ha'm Neriya ulı Baruxtı o'zleri menen alıp ketti.
7 Olar Jaratqan İyege qulaq aspay, Mısır jerine ketip, Taxpanxeske jetip keldi.
8 Taxpanxeste Eremiyag'a Jaratqan İyeden so'z tu'sti:
9 – Qolın'a u'lken taslardı alıp, olardı Taxpanxestegi faraonnın' sarayının' kirer awzındag'ı gerbishler arasına ko'm. Bunı yahudiylerdin' ko'z aldında isle.
10 eyin olarg'a ayt: «İzraildın' Qudayı A'lemnin' Jaratqan İyesi bılay deydi: Mine, Men Babiloniya patshası qulım Nabuxodonosordı bul jerge alıp kelip, onın' taxtın mına ko'milgen taslar u'stine ornataman. Nabuxodonosor patshalıq shatırın usı taslardın' u'stine tigedi.
11 Ol kelip, Mısırdı wayran qıladı. Ta'g'dirine o'lim jazılg'an o'ledi, ta'g'dirine su'rgin jazılg'an su'rginge ketedi, ta'g'dirine qılısh jazılg'an qılısh penen shabıladı.
12 Babiloniya patshası Mısır qudaylarının' butxanalarına ot qoyadı, butlardı jandıradı, bazıların o'zi menen alıp ketedi. Shopan tonın bu'rgeden tazalag'anday, Mısırdı da solay tazalaydı. Keyin ol jerden amanesen shıg'ıp ketedi.
13 Ol Mısır jerindegi Quyash qudayının' butxanasındag'ı Quyash qudayına arnap qoyılg'an kiyeli taslardı buzıp, Mısır qudaylarının' barlıq butxanaların o'rtep jiberedi».
